Një incident i pazakontë është regjistruar këtë të diel në bulevardin “Dëshmorët e Kombit” në Tiranë, ku një automjet ka përfunduar në shkallët e godinës së Kryeministrisë.

Pas ndalimit të mjetit, drejtuesi ka dalë nga makina dhe është drejtuar menjëherë drejt hyrjes së institucionit, ku ka goditur me shkelma derën e godinës.

Më pas, personi është ulur para hyrjes së Kryeministrisë, ndërsa gardistët i kanë kërkuar të largohet nga zona. Sipas raportimeve, ai nuk iu bind menjëherë urdhrit dhe qëndroi aty për disa minuta.

Ende nuk dihen motivet që kanë çuar drejtuesin e mjetit drejt këtij veprimi, ndërsa deri tani nuk ka një reagim zyrtar nga autoritetet lidhur me incidentin.

Një aksident i rëndë është regjistruar mbrëmjen e së shtunës në zonën e Gjirit të Lalëzit, në Durrës, ku dy automjete janë përplasur me njëri-tjetrin.

Si pasojë e përplasjes ka humbur jetën një 57-vjeçar, i cili ndodhej pasagjer në njërin prej mjeteve. Ndërkohë, të plagosur kanë mbetur edhe dy drejtuesit e automjeteve, si dhe një pasagjer tjetër.

Sipas policisë, pas verifikimeve rezultoi se të dy shoferët drejtonin mjetet në gjendje të dehur, ndaj janë arrestuar në flagrancë.

Policia po vijon hetimet për zbardhjen e plotë të rrethanave të aksidentit.

Një aksident në të cilin janë përfshirë dy automjete ka ndodhur në autostradën Fier Lushnje në afërsi të fshatit Bishqethëm.

Nga aksidenti ka pasur vetëm dëme materiale dhe asnjë nga 4 personat që ishin në të dy mjetet nuk ka pësuar lëndime serioze.

Policia e qarkullimit rrugor ka shkuar menjëherë në vendngjarje dhe ka kryer dokumentimin e  rastit.

Sipas të dhënave të para dyshohet se një prej mjeteve ka kryer manovër të gabuar në parakalim dhe për pasojë drejtuesi e të dyja mjetet e përfshira kanë humbur kontrollin dhe kanë përplasur me barrierat e hekurta.

Përplasjet dhe tensionet në Lindjen e Mesme kanë nisur të japin efektet e para edhe në tregun shqiptar, kryesisht përmes rritjes së kostove të transportit dhe furnizimit, duke mbajtur në nivele të larta çmimet e ushqimeve dhe produkteve bazë të konsumit.

Shtrenjtimi i karburanteve në tregjet ndërkombëtare ka ndikuar drejtpërdrejt në koston e importeve, ndërsa efekti po transmetohet gradualisht edhe tek konsumatori final në vend.

Sipas të dhënave të INSTAT, grupi “Ushqime dhe pije joalkoolike” u rrit me 1.3% gjatë muajit prill, ndërsa ushqimet në tërësi shënuan rritje me 1.2%.

Rritjen më të fortë e kanë pësuar peshku dhe produktet e detit, të cilat u shtrenjtuan me 6.5%, duke regjistruar nivelin më të lartë të rritjes në të gjithë grupin ushqimor.

Në rritje mbeten edhe çmimet e mishit, që u zgjeruan me 3.1%, ndërsa mishi i freskët, i ftohur ose i ngrirë rezulton 3.2% më i shtrenjtë krahasuar me një vit më parë.

Po ashtu, vajrat dhe yndyrnat vijojnë të mbeten në nivele të larta, me një rritje prej 3.1%, ndërsa pijet joalkoolike janë shtrenjtuar me 2.8%.

Ekspertët e ekonomisë e lidhin këtë situatë me rritjen e kostove të transportit dhe energjisë në tregjet globale, si pasojë e tensioneve gjeopolitike në Lindjen e Mesme, të cilat kanë ndikuar në zinxhirin e furnizimit dhe në çmimet e importeve.

Megjithatë, disa produkte kanë shfaqur ulje të lehtë çmimesh. Sipas INSTAT, perimet ranë me 0.7%, ndërsa drithërat dhe produktet me bazë drithërash shënuan një ulje prej 0.2%.

Drejtoria e Përgjithshme e Burgjeve ka zhvilluar këtë të shtunë kontrolle të befasishme në IEVP Fier, Vlorë dhe Peqin, në kuadër të masave për forcimin e sigurisë dhe disiplinës në institucionet penitenciare.

Sipas njoftimit zyrtar, aksioni u drejtua nga Drejtori i Përgjithshëm i Burgjeve, Adriatik Kupi, dhe Drejtori i Policisë së Burgjeve, Drejtues i Lartë Paulin Rajta, ndërsa kontrollet u ushtruan nga forcat operacionale të Policisë së Burgjeve.

Gjatë kontrolleve nëpër qeli u konstatuan dhe sekuestruan aksesorë të mjeteve të komunikimit që përbëjnë vepër penale, mjete prerëse të improvizuara, si dhe sende të tjera të palejuara dhe të tepërta.

Për rastet e evidentuara është njoftuar Shërbimi i Kontrollit të Brendshëm të Sistemit të Burgjeve, i cili do të kryejë veprimet e mëtejshme proceduriale.

Drejtoria e Burgjeve thekson se kontrollet do të vijojnë me intensitet të lartë edhe në institucionet e tjera të vuajtjes së dënimit, duke nënvizuar se “toleranca ndaj shkeljeve është zero”.