Policia e Fierit ka dhënë detaje të reja lidhur me aksidentin e ndodhur pasditen e djeshme në aksin rrugor Lushnjë-Fier, ku mbeti i plagosur një 28-vjeçar.

Sipas uniformave blu, specialistët e qarkullimit rrugor arrestuan për veprën penale “Shkelja e rregullave të qarkullimit rrugor” shtetasin Z. H., 50 vjeç, banues në Lushnjë.

Nga hetimet paraprake rezulton se 50-vjeçari drejtonte automjetin që u përplas me motomjetin që drejtohej nga A. T., 28 vjeç, banues në Vlorë.

I riu vijon të marrë mjekim në Spitalin e Traumës.

Në Lushnjë, specialistët për Hetimin e Krimeve arrestuan shtetasin A. L., 33 vjeç, banues në qytet, pasi theu masën e sigurisë “arrest në shtëpi”.

Po ashtu, u referuan materialet në Prokurori dhe nisi procedimi penal për B. B., 49 vjeç, banues në Lushnjë, i dyshuar se i ka vjedhur një shumë parash një shtetasi në banesën e tij.

Ndërkohë, procedim penal nisi edhe për G. Xh., 57 vjeç, banues në Lushnjë, pasi dyshohet se ka ushtruar dhunë ndaj bashkëshortes së tij. Kjo e fundit është pajisur me urdhër mbrojtjeje.

Në Roskovec, specialistët arrestuan R. D., 46 vjeç, banues në qytet, pasi dyshohet se ka ushtruar dhunë ndaj bashkëshortes së tij, e cila gjithashtu është pajisur me urdhër mbrojtjeje.

Po në Roskovec, u arrestua edhe R. B., 35 vjeç, banues në fshatin Vidhishtë, i dyshuar për përndjekjen e ish-bashkëjetueses së tij, e cila kishte urdhër mbrojtjeje ndaj tij.

Materialet procedurale i janë referuar Prokurorisë së Fierit për veprime të mëtejshme.

Një 28-vjeçare e huaj është gjetur pa shenja jete në një apartament të marrë me qira ditore në bulevardin “Gjergj Fishta” në Tiranë.

Sipas njoftimit të policisë, viktima është identifikuar me inicialet R.T. Nga këqyrja paraprake e trupit nuk janë konstatuar shenja dhune, ndërsa dyshimet e para janë se e reja ka humbur jetën për shkaqe natyrale.

Rasti është referuar në Prokurorinë e Tiranës, e cila do të vijojë me veprimet e mëtejshme për zbardhjen e plotë të ngjarjes.

Lëvizje të reja janë bërë në strukturat drejtuese të Policisë në qarkun Fier.

Përfaqësuesi i Drejtorisë së Përgjithshme të Policisë së Shtetit, Sokol Bizhga, ka qenë sot i pranishëm në Fier, ku është zhvilluar prezantimi i drejtuesit të ri të Policisë Vendore.

Në krye të Drejtorisë Vendore të Policisë Fier është emëruar Erion Ahmeti, i cili zëvendëson në këtë detyrë drejtuesin e komanduar Oliger Torba. Ky i fundit është transferuar me detyrë në Drejtorinë e Policisë Tiranë.

Ndryshime janë bërë edhe në drejtimin e Komisariatit të Policisë Fier. Anesti Salaj është zëvendësuar nga Gerald Toska, i cili do të marrë drejtimin e komisariatit.Saliaj eshte emeruar ne te njejtin pozicion ne Kavaje

Këto lëvizje vijnë pas ndryshimeve të fundit në nivelet më të larta të Policisë së Shtetit, pas emërimit të Skënder Hitës në krye të institucionit.

Një ngjarje tragjike ka tronditur komunitetin shqiptar në Suedi, pasi një i ri nga Fieri ka humbur jetën pas një sulmi me armë zjarri në qytetin Helsingborg.

Ngjarja ndodhi pak para mesnatës, kur autoritetet suedeze morën njoftim për të shtëna me armë. Menjëherë pas sinjalizimit, policia rrethoi zonën dhe nisi hetimet për zbardhjen e plotë të rrethanave të krimit.

Si pasojë e të shtënave humbi jetën Mateo Llupi, 21 vjeç, me origjinë nga Fieri, i cili prej vitesh jetonte në Suedi së bashku me familjen e tij.

Gjatë sulmit mbeti e plagosur edhe një vajzë rreth 25 vjeçe, e cila ndodhej në shoqërinë e të riut në momentin e ngjarjes. Sipas policisë suedeze, deri më tani nuk ka persona të identifikuar apo të arrestuar, ndërsa hetimet janë përqendruar në disa pista.

Ndërkohë, trupi i pajetë i 21-vjeçarit është transportuar drejt Shqipërisë dhe ka mbërritur në Fier, ku familja Llupi ka hapur dyert e mortit.

Ceremonia mortore për përcjelljen e të riut në banesën e fundit pritet të zhvillohet ditën e premte.

Këshilli Bashkiak Fier do të zhvillojë mbledhjen e radhës më 30 prill 2026, në orën 13:00, ndërsa në rendin e ditës është përfshirë edhe një çështje që pritet të ngjallë debat, ajo e mocionit për shkarkimin e kryetares së Këshillit Bashkiak.

Sipas njoftimit zyrtar të shpërndarë për anëtarët e këshillit, kryetarin e Bashkisë Fier dhe prefektin e qarkut, mbledhja do të mbahet në sallën e Këshillit Bashkiak dhe do të shqyrtojë pesë pika kryesore.

Fillimisht këshilltarët do të votojnë për miratimin e rendit të ditës dhe procesverbalit të mbledhjes së zhvilluar më 31 mars 2026. Më pas, pika e tretë parashikon shqyrtimin e kërkesës për mocion për shkarkimin e kryetares së Këshillit Bashkiak Fier.

Në mbledhje do të diskutohet gjithashtu edhe projektvendimi për dhënien e ndihmës ekonomike nga fondi i kushtëzuar 6% për muajin mars 2026, si dhe një projektvendim tjetër për mbështetje financiare për familjen e shtetasit Sazan Allajbeu, banues në Portëz, banesa e të cilit është dëmtuar nga zjarri i datës 12 mars.

Paralelisht me këtë zhvillim, rezulton se kryetari i Bashkisë Fier, Armando Subashi, i kishte drejtuar një kërkesë zyrtare kryetares së Këshillit për thirrjen e mbledhjes brenda datës 30 prill, me qëllim shqyrtimin e ndihmës ekonomike për muajin mars.

Në përgjigjen zyrtare, kryetarja e Këshillit ka bërë me dije se mbledhja ishte planifikuar më herët për datën 30 prill dhe se propozimi i Bashkisë i është përcjellë Kryesisë së Këshillit për përfshirje në rendin e ditës.

Përfshirja e mocionit për shkarkimin e kryetares pritet ta kthejë këtë mbledhje në një nga më të debatueshmet e muajve të fundit në Këshillin Bashkiak Fier.

Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar në gjyq shtetasit Ali Cimili . dhe Afrim Cimili., babë e bir, të akuzuar për “vrasje me paramendim” të mbetur në tentativë, kryer në bashkëpunim, si edhe për “mbajtje pa leje dhe prodhim të armëve, armëve shpërthyese dhe municionit”.

Sipas hetimeve të kryera në kuadër të procedimit penal nr. 474, rezulton se dy të pandehurit kishin një konflikt të mëparshëm me shtetasin Hysen Mernica. Për këtë arsye, ata dyshohet se i kanë zënë pritë këtij të fundit, teksa ai po lëvizte me motomjet së bashku me nënën e tij, S.M.

Hetimet tregojnë se babë e bir, duke udhëtuar me dy automjete të ndryshme, kanë ndjekur lëvizjet e H.M-së dhe më pas kanë qëlluar në drejtim të tij plot nëntë herë, ndërsa të gjithë ishin në lëvizje.

Sipas Prokurorisë, pak para ngjarjes, i biri kishte qenë së bashku me të atin dhe pasi janë përballur rastësisht në rrugë me viktimën, kanë identifikuar itinerarin e tij dhe kanë organizuar sulmin.

Mësohet se njëri prej tyre, që drejtonte një automjet tip “Toyota”, ka qëlluar me armë zjarri drejt viktimave, ndërsa tjetri, në drejtimin e një automjeti tip “Mercedes-Benz”, ka qëlluar me pistoletë.

Prokuroria e Fierit thekson se mbetet e angazhuar në hetimin dhe ndjekjen penale të çdo personi të përfshirë në krime kundër jetës dhe shëndetit.