Prokuroria e Posaçme (SPAK) po heton një skemë të dyshuar financiare të lidhur me kompaninë “Bankers Petroleum Albania Ltd”, për transferime të mundshme fondesh jashtë Shqipërisë përmes transaksioneve ndërkompanish.

Sipas të dhënave hetimore, pavarësisht se kompania në bilancet e saj rezulton me humbje, ajo ka dalë garante për hua të konsiderueshme të marra nga kompani të lidhura me të, çka ka ngritur dyshime për një mekanizëm të strukturuar qarkullimi parash.

Një nga rastet kryesore që po verifikohet lidhet me një hua prej rreth 50 milionë dollarësh, ku përfshihen shoqëria “Petraco Oil” dhe një entitet në Kanada. Në këtë marrëveshje, pala kanadeze figuron si huamarrëse, ndërsa “Bankers Petroleum Albania” si garantore.

Hetuesit dyshojnë se shlyerja e kësaj huaje është mbështetur në të ardhurat e gjeneruara nga aktiviteti në Shqipëri, duke krijuar një qark financiar mes kompanive të lidhura, që mund të ketë shërbyer për kanalizimin e fondeve jashtë vendit përmes huave formalisht të rregullta.

SPAK dyshon se kjo strukturë mund të jetë përdorur për të shmangur detyrimet tatimore dhe për të transferuar para në mënyrë të maskuar jashtë vendit.

Në kuadër të hetimeve janë marrë në pyetje rreth 10 persona, mes tyre inspektorë të hetimit tatimor, drejtues të bankave të nivelit të dytë dhe persona të lidhur me administrimin e kompanisë.

Ndërkohë, SPAK ka dërguar letërporosi në disa shtete, përfshirë Mbretërinë e Bashkuar, Kanadanë, Zvicrën, Austrinë dhe Greqinë, për të gjurmuar lëvizjet e fondeve dhe për të verifikuar dyshimet mbi ekzistencën e transaksioneve të padeklaruara.

Specialistët për Hetimin e Krimeve në Komisariatin e Policisë Fier referuan materialet në Prokurori dhe nisën procedim penal për shtetasin F. Sh., 18 vjeç, banues në Fier, i cili dyshohet se ka goditur një 19-vjeçar për motive të dobëta.

Po nga këta specialistë, u shpall në kërkim shtetasi P. Dh., 53 vjeç, banues në fshatin Pishë-Poro, pasi dyshohet se ka hyrë në banesën e një shtetasi dhe ka tentuar t’i vjedhë para. Punohet për kapjen e tij.

Materialet i janë referuar Prokurorisë së Fierit për vijimin e procedurave.

Një nga vendimet e para të drejtorit të Përgjithshëm të Policisë së Shtetit, Skënder Hita, lidhet me riorganizimin e punës së Policisë Rrugore në të gjithë vendin.

Përmes një telegrami të shpërndarë në të gjitha drejtoritë vendore, Hita ka urdhëruar ndërprerjen e menjëhershme të ndalimeve rutinë të automjeteve me motivacionin “për verifikim”, një praktikë që, sipas tij, ka shkaktuar shqetësime te drejtuesit e mjeteve për mungesë baze të qartë ligjore dhe vonesa të panevojshme gjatë udhëtimit.

Urdhri, i cili ka hyrë në fuqi prej datës 10 prill, parashikon që shkeljet e qarkullimit rrugor të konstatohen kryesisht përmes pajisjeve teknologjike, si radarët për matjen e shpejtësisë në mënyrë automatike dhe përdorimi i dronëve për monitorim.

Në rastet kur situata kërkon verifikime në terren dhe ndërhyrje direkte ndaj drejtuesve të mjeteve, strukturat e Policisë Rrugore udhëzohen të hartojnë plane të qarta kontrolli, ku pikat e ndalimit do të drejtohen nga drejtuesit e sektorëve apo seksioneve përkatëse.

Ky ndryshim synon rritjen e efikasitetit në monitorimin e qarkullimit dhe shmangien e ndërhyrjeve të panevojshme ndaj qytetarëve në akset rrugore.

DVP FIER

Banonte përkohësisht në Patos dhe dyshohet se ushtronte veprimtarinë kriminale të shpërndarjes së drogave të forta (kokainë), vihet në pranga 28-vjeçari nga Norvegjia.

Specialistët e Seksionit për Hetimin e Narkotikëve në DVP Fier, në bashkëpunim me Shërbimet e Forcës së Posaçme “Shqiponja”, në vijim të punës për goditjen e veprimtarisë kriminale të shpërndarjes së lëndëve narkotike, kanë evidentuar dhe goditur një tjetër rast në këtë fushë.

Si rezultat, u kap në flagrancë dhe u vu në pranga shtetasi S. T., 28 vjeç, banues përkohësisht në një ambient të marrë me qira në fshatin Sheqishte, Patos.

Nga kontrolli i ushtruar ndaj tij dhe automjetit (të marrë me qira) që ky shtetas drejtonte, shërbimet e Policisë gjetën dhe sekuestruan një sasi lënde të dyshuar narkotike kokainë, e cila dyshohet se do të shpërndahej me qëllim përfitimi financiar.

Materialet procedurale iu referuan Prokurorisë pranë Gjykatës së Shkallës së Parë Fier, për veprime të mëtejshme për veprën penale “Prodhimi dhe shitja e lëndëve narkotike”.

Një aksident i rëndë është regjistruar paraditen e kësaj të diele në autostradën Rrogozhinë–Lushnjë, pranë fshatit Konjat.

Tre automjete janë përplasur me njëri-tjetrin, ku paraprakisht dyshohet se shkak ka qenë një manovër e gabuar parakalimi nga një prej mjeteve të përfshira. Si pasojë e përplasjes, dy automjete kanë pësuar dëmtime të lehta, ndërsa një mjet tip “Skoda” ka përfunduar i përplasur në barrierën metalike anësore, nga krahu i drejtuesit.

Drejtuesi i këtij mjeti ka mbetur i bllokuar brenda automjetit, duke bërë të nevojshme ndërhyrjen e shërbimeve zjarrfikëse të Lushnjës, të cilat, pasi mbërritën në vendngjarje, bënë të mundur nxjerrjen e tij. I riu, rreth 30 vjeç, është transportuar me urgjencë në spitalin e Lushnjës, ku ndodhet jashtë rrezikut për jetën, megjithëse ka pësuar disa thyerje në trup.

Në ndihmë kanë ardhur edhe kalimtarë të rastit, të cilët kanë kontribuar në spostimin e mjetit nga barriera metalike.

Drejtoria Vendore e Policisë Fier

Specialistët për Hetimin e Krimeve të Stacionit të Policisë Patos arrestuan shtetasin K. I., 23 vjeç, banues në fshatin Dukas, Patos, pasi ka ushtruar dhunë ndaj motrës së tij, e cila u pajis me urdhër mbrojtjeje.

Specialistët për Hetimin e Krimeve të Komisariatit të Policisë Fier referuan materialet në Prokurori, ku nisi procedimi penal për shtetasin B. M., 55 vjeç, banues në fshatin Zhupan, Fier, pasi dyshohet se ka kanosur ish-bashkëshorten e tij nëpërmjet telefonit, duke kundërshtuar vendimin e gjykatës.

Specialistët për Hetimin e Krimeve të Komisariatit të Policisë Mallakastër referuan materialet në Prokurori, ku nisi procedimi penal për shtetasin Xh. M., 69 vjeç, banues në Ballsh, pasi dyshohet se ka zaptuar një sipërfaqe toke shtetërore dhe e ka mbjellë me pemë ulliri.

Specialistët për Hetimin e Krimeve të Stacionit të Policisë Roskovec shpallën në kërkim shtetasen A. Sh. (Z.), 29 vjeçe, banuese në fshatin Kuman, Roskovec, pasi babai i saj, shtetasi Rr. Sh., ka kallëzuar se më datë 14.04.2026 ajo është larguar nga banesa, duke braktisur vajzën e saj të mitur.
Po punohet për gjetjen e saj.

Materialet procedurale iu referuan Prokurorisë së Fierit për veprime të mëtejshme.