Specialistët për Hetimin e Krimeve të Komisariatit të Policisë Fier kanë referuar materialet në Prokurori dhe kanë nisur procedim penal ndaj dy shtetasve.

Bëhet fjalë për L. N., 21 vjeç, banues në Fier, pasi gjatë kontrollit të automjetit që drejtonte iu gjet dhe sekuestrua një krehër arme zjarri me disa fishekë.

Gjithashtu, procedim penal nisi edhe për A. H., 19 vjeç, banues në Fier, pasi në automjetin që drejtonte iu gjet një sirenë e ngjashme me atë të Policisë.

Ndërkohë, lidhur me një automjet të shpallur në kërkim që dyshohej se ishte vjedhur gjatë natës në fshatin Ferras, Divjakë, policia njofton se mjeti është gjetur nga shërbimet e Stacionit të Policisë Fushë-Krujë, i aksidentuar dhe i braktisur.

Po vijon puna për identifikimin dhe kapjen e autorit ose autorëve, ndërsa materialet procedurale i janë referuar Prokurorisë së Fierit për veprime të mëtejshme.

Specialistët e Seksionit për Hetimin e Krimeve Ekonomike në Drejtorinë Vendore të Policisë Fier kanë shpallur në kërkim shtetasin E. M., 63 vjeç, banues në Tiranë.

Sipas policisë, ai dyshohet se përmes mashtrimit ka shitur të njëjtin apartament në Fier tek dy persona të ndryshëm, në periudha të ndryshme kohore.

Materialet procedurale i janë referuar Prokurorisë së Fierit për veprime të mëtejshme.

Njoftimi i Policisë së Shtetit:

Masa edhe për fundjavën, për parandalimin e drejtimit të automjeteve, në efektin e alkoolit apo në gjendje të dehur.

Shërbimet e Policisë Rrugore në të gjithë vendin, në zbatim të porosive të Drejtorit të Përgjithshëm të Policisë së Shtetit, për të ndryshuar mënyrën e kontrollit dhe të monitorimit të trafikut, kanë intensifikuar monitorimet në akset rrugore nacionale, duke përdorur mjetet inteligjente.

Kontrolle rigoroze edhe në qendrat urbane, për parkimet e gabuara, për drejtimin e automjetit, në efektin e alkoolit apo në gjendje të dehur, për zhurmat e gjeneruara nga marmitat, për përdorimin e celularit gjatë drejtimit të automjetit, për mospërdorimin e kaskës mbrojtëse nga drejtuesit dhe pasagjerët e motomjeteve, si dhe për mosvendosjen e rripit të sigurimit apo mosdhënien e përparësisë këmbësorëve, në vijat e bardha.

Si rezultat, përgjatë një jave, nga shërbimet e Policisë Rrugore në të gjithë vendin janë vendosur 21 931 masa administrative.

Janë arrestuar 36 drejtues automjetesh, 22 nga të cilët për drejtim në gjendje të dehur dhe 14 pa leje drejtimi.

Në zonat urbane janë vendosur 11 526 masa administrative për parkime të gabuara, ku në dhjetëra raste janë përdorur edhe mjetet ngritëse të Policisë së Shtetit, të cilat kanë hequr automjetet nga korsitë e dedikuara dhe nga trotuaret, pasi pengonin lëvizjen e lirë të qytetarëve.

Në akset rrugore nacionale janë vendosur 4 775 masa administrative për shpejtësi tej normave të lejuara.

Janë vendosur 1 224 masa për mosvendosje të kaskës mbrojtëse, 302 për mosvendosje të rripit të sigurimit, 789 për përdorim të celularit gjatë drejtimit të automjetit, 1 235 për parakalime të gabuara, 83 për drejtim mjeti në efektin e alkoolit dhe në gjendje të dehur, 139 për zhurma dhe manovra të rrezikshme në qendrat urbane, si dhe 1 858 për shkelje të tjera të evidentuara gjatë monitorimeve.

Drejtoria e Policisë Rrugore, nisur edhe nga fakti që gjatë fundjavës ka fluks të shtuar në drejtim të zonave bregdetare dhe turistike, ka marrë masa shtesë duke shtuar patrullimet në akset kombëtare dhe monitorimet me mjete inteligjente.

Në këtë kuadër, apelon për të gjithë drejtuesit e automjeteve që të respektojnë me rigorozitet rregullat e qarkullimit rrugor, pasi të gjitha rrugët monitorohen me mjete inteligjente të Policisë Rrugore dhe çdo shkelje e evidentuar do të ndëshkohet me masë administrative, e cila pasqyrohet në e-Albania.

Sipas të dhënave më të fundit nga Autoriteti i Mbikëqyrjes Financiare (AMF), monedha vendase, leku, vijon të dominojë tregjet financiare në Shqipëri, ndërsa përdorimi i euros mbetet i pranishëm vetëm në disa segmente të caktuara.

Në tregun e sigurimeve, rreth 27.8% e primeve janë realizuar në euro, një rënie e lehtë krahasuar me një vit më parë. Në sigurimet e jetës, përdorimi i valutës së huaj ka pësuar ulje më të ndjeshme, duke zbritur nga 26.5% në 19%.

Edhe në strukturën e depozitave të shoqërive të sigurimit, leku ka peshën kryesore me rreth 63%, ndërsa 37% mbetet në valutë të huaj, ku euro zë shumicën dërrmuese të këtyre fondeve.

Në tregun e kapitaleve, aktiviteti është pothuajse tërësisht i orientuar në lekë. Titujt shtetërorë dhe transaksionet në bursë kryhen në monedhën vendase, ndërsa gjatë vitit 2025 nuk janë regjistruar transaksione në valutë për obligacionet qeveritare.

Megjithatë, euro vijon të ketë rol në tregun e obligacioneve private, ku rreth 58% e tyre janë të emetuara në euro, duke reflektuar ende varësi të bizneseve nga financimi në valutë të huaj.

Në fondet e investimit, pjesa dërrmuese e aseteve, rreth 89%, është në lekë, ndërsa vetëm 10.7% në euro.

Në tërësi, raporti thekson se përdorimi i valutave të huaja lidhet kryesisht me investimet dhe financimet ndërkombëtare, ndërsa tregjet shqiptare po konsolidohen gjithnjë e më shumë mbi monedhën kombëtare.