Për ngjarjen e rëndë në Sarandë, ku mbeti i vrarë biznesmeni 66-vjeçar Rexhep Ismaili, ka reaguar edhe deputeti socialist i zonës, Ardit Bido, i cili e cilësoi ngjarjen një humbje të madhe për komunitetin dhe i bëri thirrje Policisë së Shtetit dhe Prokurorisë që të zbardhin sa më shpejt autorët dhe rrethanat e krimit.

Nderkohe detaje të reja janë zbardhur nga atentati mafioz i ndodhur mbrëmjen e së enjtes në Sarandë, ku viktima është ekzekutuar në ambientet e biznesit të tij, një pikë karburanti në pronësi të Ismailit.

Sipas hetimeve paraprake, autori i dyshuar ka shkuar i armatosur dhe ka hapur zjarr ndaj 66-vjeçarit ndërsa ai ndodhej ulur në një tavolinë me persona të tjerë. Një plumb në kokë ka rezultuar fatal, duke i marrë jetën menjëherë.

Pas të shtënave, situata është përshkallëzuar në shkëmbim zjarri. Persona të pranishëm në lokal kanë përdorur një armë automatike dhe kanë qëlluar me breshëri ndaj autorit në momentin që ai po largohej. Megjithatë, autori ka arritur të arratiset nga vendngjarja.

Policia po vijon hetimet për identifikimin e personave të përfshirë në shkëmbimin e zjarrit, si dhe për kapjen e autorit kryesor, ndërsa pista kryesore mbetet një konflikt i mëparshëm mes tij dhe viktimës.

Është identifikuar viktima që humbi jetën mbrëmjen e kësaj të enjte në një ngjarje të rëndë në Sarandë. Viktimë ka mbetur 66-vjeçari Rexhep Ismaili.

Ngjarja ndodhi në zonën e Gjashtës, ku viktima dyshohet se është qëlluar me armë zjarri në rrethana ende të paqarta.

Sipas informacioneve paraprake, Ismaili ka marrë një plagë në kokë, e cila i ka shkaktuar vdekjen.

Mësohet se 66-vjeçari ishte pronar i një karburanti, si edhe kryetar i shoqatës “Çamëria”, dega Sarandë.

Në vendngjarje kanë mbërritur forca të shumta policie, të cilat kanë rrethuar zonën dhe kanë nisur hetimet për zbardhjen e plotë të rrethanave të ngjarjes dhe identifikimin e autorëve.

Një atentat me armë zjarri është regjistruar mbrëmjen e sotme në Sarandë.

Sipas informacioneve paraprake, viktimë ka mbetur Rexhep Ismaili, i cili është qëlluar me armë zjarri në rrethana ende të paqarta.

Burime nga vendngjarja bëjnë me dije se Ismaili është goditur me një plumb në kokë, duke humbur jetën në vend si pasojë e plagëve të marra.

Menjëherë pas ngjarjes, në zonë kanë mbërritur forca të shumta policie, të cilat kanë rrethuar perimetrin dhe kanë nisur hetimet për zbardhjen e plotë të atentatit, identifikimin dhe kapjen e autorëve të dyshuar.

Deri më tani nuk dihen motivet e ngjarjes, ndërsa grupi hetimor po punon për mbledhjen e provave dhe marrjen në pyetje të personave që mund të kenë dijeni mbi krimin

Shqipëria nuk rrezikohet nga mungesa e furnizimit me hidrokarbure. Garancia u dha nga ministri i Infrastrukturës dhe Energjisë, Enea Karakaçi, gjatë një interpelance në Kuvend, ku prezantoi edhe ndryshimet që parashikon drafti i ri për rezervat e sigurisë.

Sipas Karakaçit, draftligji i nxjerrë për konsultim publik synon që menaxhimi i rezervave të sigurisë të mos kryhet më nga kompanitë tregtare, por nga agjenci shtetërore.

“Për qeverinë shqiptare, siguria energjitike është shumë e rëndësishme, sepse është pjesë e sigurisë kombëtare. Masat e marra për përballimin e krizës janë shumëplanëshe. Është ngritur bordi i transparencës për mbrojtjen e konsumatorit final”, deklaroi ministri.

Ai bëri të ditur se është ngritur edhe një grup pune për verifikime në terren lidhur me mbajtjen e rezervës së sigurisë nga shoqëritë që tregtojnë hidrokarbure.

Karakaçi theksoi se ligji i ri vendos një standard të ri për Shqipërinë, duke kaluar përgjegjësinë e rezervave strategjike te shteti.

“Rezerva e hidrokarbureve nuk bëhet më nga shoqëritë tregtare, por nga agjencitë shtetërore. Rezerva e sigurisë aktivizohet kur ka mungesë produkti në treg, por aktualisht qeveria garanton se nuk ka mungesa në furnizim dhe Shqipëria nuk është e ekspozuar ndaj këtij risku”, u shpreh ai.

Ndër të tjera, ministri paralajmëroi se javën e ardhshme pritet të hyjë në fuqi edhe plani i masave për transportin publik urban dhe interurban, pas përfundimit të konsultimeve me grupet e interesit.

Me një fond limit prej afro 5.8 miliardë lekësh, Autoriteti Rrugor Shqiptar ka hapur dy procedura tenderuese për ndërtimin e segmentit lidhës Tiranë–Elbasan me Korridorin VIII, pjesë e bypass-it të Elbasanit.

Segmenti i ri rrugor, me gjatësi rreth 4 kilometra, nis pa mbërritur te rrethrrotullimi i Bradasheshit dhe përfundon në afërsi të ish-Metalurgjikut. Projekti synon të lehtësojë trafikun në hyrje-daljet e autostradës Tiranë–Elbasan, një nga pikat më problematike të qarkullimit në vend.

Sipas dokumenteve të tenderit, ndërtimi i bypass-it të Elbasanit konsiderohet një ndërhyrje strategjike, pasi do të krijojë një rrugë alternative për devijimin e trafikut të rënduar jashtë zonave urbane të qytetit. Aktualisht, unaza ekzistuese nuk përmbush më kapacitetet dhe parametrat teknikë për të përballuar fluksin në rritje të automjeteve.

Bypass-i është pjesë integrale e Korridorit VIII Pan-Europian, një nga akset më të rëndësishme të transportit rajonal dhe ndërkombëtar. Ky segment do të shërbejë si nyje lidhëse mes akseve Elbasan–Lekaj dhe Elbasan–Qafë Thanë, të cilat janë aktualisht në proces ndërtimi.

Gjurma e projektuar e rrugës do të kalojë kryesisht në zona kodrinore dhe rurale, duke shmangur zonat e banuara, me synim rritjen e sigurisë dhe përmirësimin e efikasitetit të lëvizjes.

Sipas parashikimeve, realizimi i bypass-it do të ndikojë në uljen e kohës së udhëtimit, reduktimin e ndotjes akustike dhe ajrore në qytet, rritjen e sigurisë rrugore dhe lehtësimin e trafikut në hyrje të Elbasanit.

Projekti është përfshirë në Dokumentin e Politikave Prioritare 2027–2029, në listën e investimeve me status “i maturuar”, me një kosto totale të parashikuar prej 240 milionë eurosh.

Policia ka njoftuar masat që do të merren për zhvillimin e tubimit të paralajmëruar nga Partia Demokratike më 8 maj, në orën 19:00, para godinës së Kryeministrisë në bulevardin “Dëshmorët e Kombit”.

Sipas njoftimit, Policia e Tiranës ka marrë masa për garantimin e mbarëvajtjes së protestës, në zbatim të ligjit “Për tubimet”.

Në kuadër të planit të masave, do të ketë kufizime dhe bllokime të qarkullimit në disa segmente rrugore:

• Nga ora 23:45 e datës 7 maj deri në përfundim të tubimit, do të bllokohet lëvizja dhe nuk do të lejohet parkimi i automjeteve në bulevardin “Dëshmorët e Kombit”, nga “Ura e Dajtit” deri te rruga “Ismail Qemali”.
• Nga ora 15:00 e datës 8 maj deri në përfundim të protestës, do të ndalohet qarkullimi i automjeteve në bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”.
• Kufizime do të ketë gjithashtu edhe në rrugët “Ukraina e Lirë”, “Papa Gjon Pali II” dhe “Ismail Qemali”.

Policia u ka bërë thirrje organizatorëve të respektojnë afatin dhe vendin e tubimit, ndërsa qytetarëve u kërkon mirëkuptim për kufizimet e përkohshme të lëvizjes.

Në njoftim apelohen gjithashtu pjesëmarrësit që të distancohen nga çdo veprim i kundërligjshëm që mund të cenojë rendin dhe sigurinë publike.

Kultivuesit e ullinjve në fshatrat e Mallakastrës po përballen me vështirësi të mëdha ekonomike, pasi sasi të konsiderueshme të vajit të ullirit kanë mbetur pa u shitur.

Banorët e zonës thonë se, ndonëse ullinjtë e Mallakastrës njihen për traditën shekullore dhe cilësinë e lartë të vajit, mungesa e tregut dhe e pikave të grumbullimit po i çon drejt falimentimit.

Sipas tyre, prodhimi këtë vit ka qenë i bollshëm, por mungesa e mbështetjes për tregtimin dhe eksportin ka bërë që shumë fermerë të detyrohen ta shesin vajin nën kosto.

Kultivuesit kërkojnë ndërhyrje nga shteti për krijimin e një marke të certifikuar për vajin e ullirit të Mallakastrës, si dhe ngritjen e pikave të grumbullimit që do të ndihmonin në hapjen e tregjeve të eksportit.

Ata theksojnë se kostot e prodhimit janë rritur ndjeshëm, duke nisur nga mirëmbajtja e ullishteve deri te përpunimi në fabrikë, ndërsa fitimet janë minimale ose inekzistente.

Të zhgënjyer nga situata, shumë prej kultivuesve paralajmërojnë se mund të heqin dorë nga kultivimi i ullinjve, pasi prej vitesh po punojnë me humbje.