Presidenti ukrainas, Volodymyr Zelenskyy, ka deklaruar se Ukraina mund të organizojë zgjedhje presidenciale nëse Rusia pranon një armëpushim të plotë prej 60 ditësh.
Në një intervistë për emisionin “This Week” të ABC-së, Zelenskyy iu përgjigj kritikave të presidentit amerikan, Donald Trump, i cili një ditë më parë deklaroi se Ukraina ka nevojë për një president të ri.
“Ju lutem, i thoni Putinit: na jepni dy muaj, 60 ditë armëpushim të plotë, dhe ne do të organizojmë zgjedhje”, tha Zelenskyy.
Trump kritikoi gjithashtu presidentin ukrainas për sulmet ndaj rafinerive ruse të naftës, një ditë pasi SHBA-të hoqën përkohësisht disa sanksione ndaj karburantit rus, të vendosura për të kufizuar të ardhurat e Moskës që financojnë luftën në Ukrainë.
“Mendoj se është koha që Ukraina të ketë një president të ri”, u shpreh Trump për gazetarët në Shtëpinë e Bardhë.
Në përgjigje, Zelenskyy theksoi se janë qytetarët ukrainas ata që duhet të vendosin se kush do t’i udhëheqë, duke shtuar se edhe presidenti rus, Vladimir Putin, do të dëshironte ndryshimin e udhëheqjes në Kiev.
Ai kundërshtoi gjithashtu përpjekjet për të fajësuar Ukrainën për rritjen e çmimeve të karburantit, duke argumentuar se një faktor kryesor është lufta në Lindjen e Mesme.
Më herët të dielën, Zelenskyy deklaroi se Ukraina është e gatshme të ndalë sulmet ndaj rafinerive ruse të naftës, nëse Moska ndërpret sulmet ndaj infrastrukturës energjetike ukrainase.
