Nga dita e hënë flota e autobusëve të transportit publik do të reduktohet me 30%, në rast se nuk ka një reagim nga institucionet në lidhje me rritjen e çmimit të karburantit. Në një dalje për mediat shoqatat, që përfaqësojnë operatorët ekonomikë thanë se po përballen me vështirësi të shumta për shkak të rritjes së kostove, por deri më tani nuk ka asnjë reagim nga ana e institucioneve qendrore apo vendore.

Ata përsëritën kërkesat, që sipas tyre do të mundësonin garantimin e vijueshmërisë dhe qëndrueshmërisë së këtij shërbimi në interes të qytetarëve.

Përfaqësuesit e shoqatatve thane se pavarësisht kërkesave të vazhdueshme pranë institucioneve përgjegjëse, deri në këtë moment nuk janë ndërmarrë masa konkrete për të përballuar këtë situatë.

Kërkesat e shoqatave të transportit

1-     Rishikim i barrës fiskale mbi karburantin, veçanërisht në drejtim të akcizës dhe taksës së qarkullimit

2-     Vlerësim i një politike të veçantë për sektorin e transportit publik për heqjen e TVSH-së

3-     Aplikim i mekanizmave subvencionues, ose kompensues

Drejtoria Vendore e Policisë Fier

Në vijim të informacionit paraprak të dhënë dje, për aksidentin në aksin “Divjakë-Lushnjë”, si pasojë e të cilit humbi jetën shtetasi R. D., 76 vjeç, pasi motomjeti që ai drejtonte u përplas me një mjet bujqësor, informojmë se specialistët e qarkullimit rrugor arrestuan drejtuesin e mjetit bujqësor, shtetasin M. M., 67 vjeç, banues në fshatin Zhamec, Divjakë.

Specialistët e Sektorit për Hetimin e Krimeve të Komisariatit të Policisë Fier referuan materialet në Prokurori ku nisi procedimi penal për shtetasit:
-P. F., 63 vjeç, banues në fshatin Peshtan i vogël, pasi u konstatua duke kryer punime, pa leje;
-R. B., 45 vjeç, banues në fshatin Levan, pasi ka kanosur një shtetas dhe i ka dëmtuar automjetin, për motive të dobëta;
-E. K., 28 vjeç dhe R. S.(K)., 30 vjeç (vëllezër), të dy banues në Fier, pas kanë goditur me grushte një shtetas, për motive të dobëta.

Specialistët e Sektorit për Hetimin e Krimeve të Komisariatit të Policisë Lushnjë referuan materialet në Prokurori ku nisi procedimi penal për shtetasin K. E., 44 vjeç, banues në Lushnjë, pasi ka ushtruar dhunë ndaj bashkëshortes së tij.

Specialistët e Sektorit për Hetimin e Krimeve të Komisariatit të Policisë Divjakë referuan materialet në Prokurori ku nisi procedimi penal për shtetasin S. L., 29 vjeç, banues në Tropojë, pasi ka ushtruar dhunë ndaj bashkëshortes së tij.

Specialistët e Sektorit për Hetimin e Krimeve të Komisariatit të Policisë Mallakastër referuan materialet në Prokurori ku nisi procedimi penal për shtetasin F. S., 52 vjeç, banues në Tiranë, pasi ka pushtuar një sipërfaqe toke në pronësi të shtetasit M. M., 48 vjeç, në fshatin Fratar.

Në Komisariatin e Policisë Lushnjë kallëzoi shtetasi A. Ç., 56 vjeç, pronar i një subjekti, se është larguar nga puna, shtetasi indian N. A., 32 vjeç, të cilin e kishte punësuar në subjektin e tij, me gjithë dokumentacionin e nevojshëm.

Materialet procedurale iu referuan Prokurorisë së Fierit, për veprime të mëtejshme.

Fondi Shqiptar i Zhvillimit ka lidhur kontratën për fotografimin ajror të territorit, një projekt që synon përditësimin e hartave dhe mbështetjen e zhvillimit urban e rural.

Kontrata për fotografimin ajror

Shqipëria do t’i nënshtrohet një procesi të ri fotografimi ajror për të rifreskuar hartat kombëtare, të cilat në shumë raste janë të vjetruara prej gati një dekade. Fondi Shqiptar i Zhvillimit ka njoftuar lidhjen e kontratës me kompaninë fituese, me vlerë rreth 265 milionë lekë, ose 2.65 milionë euro.

Procedura ishte hapur në nëntor të vitit të kaluar dhe tashmë është finalizuar me përzgjedhjen e operatorit turk “Mescioğlu Mühendislik ve Müşavirlik A.Ş.” për realizimin e projektit.

Përditësim i të dhënave gjeohapësinore

Projekti përfshin fotografimin ajror dixhital të territorit, prodhimin e imazheve nadir dhe oblik, si dhe skanime LIDAR, me synim përditësimin e Sistemit Kombëtar të të Dhënave Gjeohapësinore. Kjo do të krijojë një bazë të unifikuar të dhënash për të gjithë territorin e vendit.

Sipas dokumenteve zyrtare, mungesa e të dhënave të përditësuara ka krijuar vështirësi në zbatimin e projekteve infrastrukturore dhe zhvillimin urban, veçanërisht në zonat turistike dhe ato me rritje të shpejtë ekonomike.

Mbështetje për zhvillimin dhe investimet

Fotografimi i ri ajror pritet të ndihmojë institucionet publike dhe investitorët në planifikimin e projekteve, duke ofruar informacion të detajuar mbi territorin, përdorimin e tokës dhe zhvillimet urbane.

Kjo bazë të dhënash do të shërbejë edhe për stabilizimin e marrëdhënieve të pronësisë dhe për përmirësimin e planifikimit të infrastrukturës, duke reduktuar pasiguritë në investime.

Monitorim i ndryshimeve dhe rreziqeve

Të dhënat e reja do të mundësojnë analizimin e fenomeneve të rëndësishme si erozioni bregdetar, ndryshimet në përdorimin e tokës, ndërtimet e reja, si dhe ndikimet e fatkeqësive natyrore si rrëshqitjet e tokës apo zjarret në pyje.

Gjithashtu, sistemi do të përdoret për përmirësimin e regjistrit të adresave dhe mbështetjen e sistemeve kombëtare të menaxhimit të territorit dhe popullsisë.

Burimi: Monitor