Një zjarr i përmasave të mëdha ka përfshirë një pallat përballë Spitalit “Nënë Tereza” në Tiranë, duke shkaktuar panik dhe evakuimin e menjëhershëm të banorëve.

Sipas informacioneve paraprake, flakët janë përhapur me shpejtësi, duke rrezikuar edhe pallatet e tjera në kompleksin pranë QSUT-së. Situata është përkeqësuar për shkak të tymit të dendur dhe përhapjes së zjarrit në zonë.

Shoqatat e transportit publik kanë njoftuar se duke nisur nga dita e nesërme do të reduktojnë me 40% flotën e mjeteve në qarkullim, si pasojë e vështirësive të rënda financiare në sektor.

Në një deklaratë zyrtare, Shoqata Kombëtare e Transportit Qytetas dhe ajo e Transportit Urban dhe Interurban theksojnë se, pavarësisht problematikave të ngritura prej javësh dhe takimeve me institucionet, nuk është marrë asnjë masë konkrete mbështetëse.

Sipas tyre:

• Nuk është miratuar asnjë skemë kompensimi për rritjen e çmimit të karburantit;
• Nuk ka një plan veprimi për lehtësimin e barrës financiare;
• Nuk është dhënë asnjë afat për ndërhyrje nga institucionet;
• Nuk ka nisur rishikimi i elementeve fiskale që ndikojnë në kostot, si akciza, taksa e qarkullimit dhe TVSH.

Operatorët theksojnë se kjo mungesë reagimi ka përkeqësuar ndjeshëm situatën, duke i vendosur në kushte të vështira për vijimin e aktivitetit.

Për këtë arsye, reduktimi i flotës konsiderohet si një masë e detyruar për të përballuar situatën emergjente.

Shoqatat u bëjnë thirrje qytetarëve për mirëkuptim dhe të planifikojnë lëvizjet e tyre, ndërsa shtojnë se situata nuk është rezultat i vullnetit të operatorëve, por i mungesës së ndërhyrjes institucionale.

Ndërkohë, ata shprehen të hapur për dialog dhe kërkojnë masa të menjëhershme dhe efektive për të shmangur përkeqësimin e mëtejshëm të situatës.

Bordi i Transparencës ka vendosur rritjen e çmimeve të karburanteve në vend, duke reflektuar ndryshimet më të fundit në treg.

Sipas vendimit të datës 14 prill 2026, çmimi i naftës është rritur me 6 lekë për litër, duke arritur në 215 lekë/litër nga 209 lekë që ishte më parë. Ndërkohë, edhe benzina ka pësuar një rritje prej 3 lekësh, duke shkuar në 178 lekë/litër nga 175 lekë.

Në detaje, Bordi ka përcaktuar që:

• Nafta (gazoil) do të tregtohet me pakicë jo më shumë se 215 lekë/litër dhe me shumicë jo më shumë se 203 lekë/litër;
• Benzina do të shitet me pakicë deri në 178 lekë/litër dhe me shumicë deri në 166 lekë/litër.

Çmimet e reja kanë hyrë në fuqi sot, më 14 prill, në orën 15:00 dhe do të mbeten në fuqi deri në një vendim të ri të Bordit.

Autoritetet paralajmërojnë operatorët e tregut për zbatim rigoroz të vendimit, ndërsa në rast shkeljesh parashikohet pezullimi i aktivitetit.

Në një sqarim shtesë, bëhet me dije se çmimet aktuale mbeten nën kufijtë e përcaktuar nga akti normativ për akcizën, ndaj niveli i saj do të vijojë të aplikohet i plotë, në masën 100%.

Në doganën e Kakavijes ditën e martë është regjistruar një fluks i lartë i lëvizjes në kufi ndërsa bashkatdhetarët tanë pas përfundimit të festës së Pashkëve rikthehen në Greqi. 

Sipas Policisë Kufitare përgjatë 24-orëve të fundit në Kakavije janë përpunuar 11685 shtetas në hyrje-dalje, nga të cilët 4710 në hyrje dhe 6974 në dalje, si dhe 3735 mjete në hyrje – dalje, nga të cilat 1326 në hyrje dhe 2409 në dalje. 

Gjatë javes së Pashkës ortodokse nëpërmjet doganës së Kakavijes lëvizën në të dyja anët e kufirit më shtetin grek rreth 50 mijë persona.