Epoka e telefonisë fikse po mbyllet/ AKEP: Interneti kthehet në shërbimin kryesor të komunikimit në vend

Interneti po konsolidohet gjithnjë e më shumë si mjeti kryesor i komunikimit në Shqipëri, ndërsa shërbimet tradicionale po humbasin gradualisht përdorues. Këtë e konfirmojnë të dhënat e fundit të Autoritetit të Komunikimeve Elektronike dhe Postare për tremujorin e tretë të vitit 2025, të cilat tregojnë një zhvendosje të qartë të qytetarëve drejt shërbimeve digjitale.

Sipas raportit, numri i pajtimtarëve me akses broadband nga rrjetet fikse ka arritur në rreth 711 mijë, duke shënuar rritje të qëndrueshme si në krahasim me tremujorin e mëparshëm, ashtu edhe me të njëjtën periudhë të një viti më parë. Kjo rritje lidhet kryesisht me nevojën në rritje për internet në familje, për punë, arsim, shërbime online dhe argëtim.

Zgjedhja më e shpeshtë e qytetarëve mbetet paketa “Vetëm Internet”, e cila përdoret nga mbi gjysma e pajtimtarëve. Në të njëjtën kohë, interesimi për paketat e kombinuara që përfshijnë edhe telefoninë fikse vijon të bjerë, duke reflektuar një ndryshim të qartë në mënyrën e komunikimit. Ndërkaq, paketat që bashkojnë internetin me televizionin mbajnë ende peshën kryesore mes ofertave të integruara.

Në kahun tjetër, telefonia fikse po përjeton rënie të vazhdueshme. Numri i përdoruesve ka zbritur në rreth 155 mijë, një tregues i qartë se ky shërbim po braktiset gjithnjë e më shumë nga qytetarët, të cilët po e zëvendësojnë me komunikimin përmes internetit dhe telefonisë celulare.

Ndryshime vërehen edhe në tregun celular. Gjatë tremujorit të tretë të vitit 2025 ka pasur rritje të përdoruesve krahasuar me tremujorin e mëparshëm, megjithatë në krahasim vjetor shifrat mbeten më të ulëta. Pavarësisht kësaj, përdorimi i internetit nga rrjetet celulare po zgjerohet ndjeshëm dhe tashmë shumica e përdoruesve celularë janë aktivë online, kryesisht për rrjete sociale, aplikacione komunikimi dhe shërbime digjitale.

Të dhënat tregojnë se tregu i komunikimeve elektronike në Shqipëri po kalon një transformim të qartë drejt shërbimeve digjitale, ndërsa format klasike të komunikimit po humbasin gradualisht rëndësinë e tyre në jetën e përditshme të qytetarëve.

SCAN

Turizmi shqiptar promovohet në panairin ne Madrid

Stenda e Shqipërisë në Panairin Ndërkombëtar të Turizmit FITUR 2026, në Madrid, Spanjë, ka tërhequr interes të lartë nga vizitorë dhe operatorë turistikë nga vende të ndryshme të botës, duke reflektuar rritjen e vëmendjes ndërkombëtare ndaj Shqipërisë si destinacion turistik. Ministri i Turizmit, Kulturës dhe Sportit, Blendi Gonxhja, zhvilloi një takim miqësor me ministrin e Industrisë dhe Turizmit të Spanjës, Jordi Hereu i Boher, ku u diskutuan zhvillimet më të fundit në sektorin e turizmit, si dhe mundësitë për shkëmbimin e përvojave dhe modeleve të suksesshme mes dy vendeve.

Gjatë takimit, palët u ndalën në forcimin e bashkëpunimit në fusha me interes të përbashkët, përfshirë turizmin e qëndrueshëm, promovimin e destinacioneve kulturore, diversifikimin e ofertës turistike dhe zgjatjen e sezonit turistik.

Në këtë kontekst, u theksua potenciali në rritje i Shqipërisë si destinacion turistik. Gjithashtu, u vlerësua rëndësia e partneriteteve institucionale dhe të biznesit për nxitjen e investimeve dhe ndërtimin e bashkëpunimit afatgjatë.

Ndërkohë, në këtë panair në stendën shqiptare prezantohen destinacionet kryesore turistike të vendit, vlerat e trashëgimisë kulturore, si dhe produktet tradicionale, të cilat përfaqësojnë një pjesë të rëndësishme të ofertës turistike kombëtare. Ky prezantim synon të pasqyrojë diversitetin e Shqipërisë dhe potencialin e saj për zhvillimin e turizmit gjatë gjithë vitit.

Ky panair mbetet një platformë kyçe për dialogun dhe bashkëpunimin ndërkombëtar në fushën e turizmit.

Kryeministri Edi Rama ka reaguar në pas protestës kombëtare të opozitës

Kryeministri Edi Rama ka reaguar në rrjetin social X pas protestës kombëtare të opozitës, duke dënuar aktet e dhunës dhe shkatërrimin e pronës publike gjatë përplasjeve. Rama shprehu gjithashtu solidaritet me punonjësit e Policisë së Shtetit që u plagosën gjatë protestës.

Në reagimin e tij, kreu i qeverisë theksoi se protesta është një e drejtë demokratike, por sipas tij, dhuna e organizuar dhe sulmet ndaj institucioneve nuk kanë asnjë lidhje me lirinë e shprehjes.

“Ka në Europë protestues, anarkistë, ekologjistë, ekstremistë të djathtë a të majtë, studentë, anti-globalistë, tifozë huliganë, grupime lloj-lloj që dalin në rrugë për arsyet e tyre, maskohen, armatosen me molotovë dhe thyejnë e djegin, duke plagosur punonjës policie e shkatërruar prona.

Po qysh nga koha e partive famëkëqia të 100 vjetëve më parë në Gjermani e Itali, ka vetëm një parti parlamentare në Europë, që të ketë në programin e aktivitetit të saj si pjesë të pandarë të ekzistencës së vet qysh nga lindja, ushtrimin e dhunës, shkatërrimin e pronës, sulmin ndaj godinave të institucioneve, deri edhe ndaj godinës së vet, mobilizimin e paramilitarëve, të cilët deri dje ishin çeta e liderit shpirtëror, kurse tanimë janë thjesht mercenarë të rekrutuar me lekë nga rrugaçët e lagjeve, që veshin maska apo fshehin fytyrën pas tabelave për të mbaruar punë me hedhjen e molotovëve pa u identifikuar nga kamerat!
Tanimë këto farë protestash me pisllëkun që krijojnë në bulevard, ngjajnë si jashtëderdhja në rrugë e plakut të lajthitur që i organizon… Degjenerim i pandalshëm dhe dëshpërim i pangushëllueshëm!
Të shkuara punonjësve të policisë që u plagosën e lënduan nga kjo lukuni e verbër”, shkroi Rama.

PD protestë para Kryeministrisë, policia përgjigjet me g*z lotsjellës

Ka nisur protesta e dytë kombëtare e Partisë Demokratike përpara Kryeministrisë.Kryedemokrati Sali Berisha ka kërkuar nga qytetarët që sot “t’i bëjnë gjyqin kryeministrit”, duke marrë pjesë në protestën e thirrur në orën 17:00 para Kryeministrisë.

Pak orë para protestës, Berisha u ka bërë thirrje të rinjve që të “ngrihen në lartësinë e këtij misioni”.“I bëj thirrje të rinjve të ngriheni në lartësinë e këtij misioni. Sot ju keni shansin e madh të riktheni edhe njëherë shpresën, besimin, lirinë, të drejtat, të ardhmen tuaj dhe të shqiptarëve.”-shkruan Berisha.

Përmes protestës PD kërkon largimin e Edi Ramës, ndërsa detajet e këtij tubimi po mbahen ende diskrete.

Policia e Tiranës ndërkohë ka merr masa, duke nxjerrë në terren 1300 forca policore për ruajtjen e rendit dhe sigurisë politike. Kryeministria nga ana tjetër ka fortifikuar dyert dhe është e rrethuar. Pritet të ketë prezencë dhe të zjarrfikësve dhe ambulancës sipas protokollit.

Protestuesit tentojnë të futen brenda në godinë

Protesta e opozitës është zhvendosur nga Kryeministria drejt godinës së Kuvendit.Përplasjet nuk kanë munguar me policinë, pasi protestuesit kanë tentuar të futen brenda në godinë.

Gjatë tensioneve edhe deputetët e PD-së u përplasën me policinë, ndërsa këta të fundit hodhën gaz lotsjellës për të shpërndarë protestuesit.

Trageti i linjës Vlorë-Brindisi-Vlorë anulon mbërritjen në Port, ndalohet lundrimi i mjeteve të vogla dhe anijeve të peshkimit

Njoftimi: 
Në bazë të parashikimit për situatën hidrometeorologjike detare të përkeqësuar brenda dhe jashtë gjirit të Vlorës, gjatë datave 24-26.01.2026 duke filluar nga ora 12:00 datë 24.01.2026 në drejtimin JUG-JUGLINDJE në forcën deri 7-8bft me shpejtësi ere deri në 25-45m/s dhe lartësi dallge nga 2.50 deri 4.00 metra, ju bëjmë me dije se :

1.Kapiteneria e Portit Vlorë ka ndaluar pajisjen me leje-nisje të mjeteve të vogla lundruese dhe ato të peshkimit të cilat duan të operojnë brenda gjirit të Vlorës dhe në det të hapur, duke filluar nga ora 12:00 datë 24.01.2026 deri në datë 26.01.2026 në orën 06:00.

2.Me qëllim parandalimin e çdo situate të papritur për shkak të kushteve atmosferike, kërkojmë bashkëpunimin e të gjithë subjekteve dhe institucioneve që ushtrojnë veprimtari në fushën e detarisë për të marrë të gjitha masat e nevojshme për sigurimin e mjeteve në port dhe rritje e gadishmerisë së ekuipazhit në mjetet lundruese.

3.Anijet e transportit ndërkombëtar detar do të vazhdojnë të operojnë normalishtë sipas destinacioneve përkatëse.

4.Trageti i linjës Vlorës-Brindisi-Vlorë ka anulluar mbërritjen datën 25.01.2026

5.Përmirësimi i situatës hidrometeorologjike të përkeqësuar të parashikuar për mjetet e vogla lundruese dhe ato të peshkimit do të jetë mbas orës 06:00 të datës 26.01.2025.

Rrugët, vezhgim me kamera -Rregullat për sistemin e monitorimit të trafikut

Rrugët shqiptare nën vëzhgim inteligjent: dalin rregullat për menaxhimin modern të trafikut

Qeveria ka hedhur një tjetër hap drejt dixhitalizimit të rrugëve dhe rritjes së sigurisë në qarkullim. Ministria e Infrastrukturës dhe Energjisë ka miratuar një udhëzim të ri që përcakton mënyrën e zbatimit të sistemeve inteligjente të transportit në të gjithë rrjetin rrugor të vendit.

Ky kuadër i ri synon të krijojë një rrjet shërbimesh që do t’u japë drejtuesve të mjeteve dhe operatorëve informacion në kohë reale për trafikun, kushtet e rrugës dhe incidentet. Sistemet do të mbulojnë edhe udhëtimet multimodale, paralajmërimet e hershme për rrezik, si dhe funksionin e eCall, që lejon automjetet të dërgojnë automatikisht thirrje emergjence në rast aksidenti. Po ashtu, parashikohet ngritja e shërbimeve për parkime të sigurta për automjetet e transportit tregtar.

Të dhënat e mbledhura nga kamerat, sensorët dhe sistemet e monitorimit do të publikohen dhe ndahen përmes një platforme të vetme kombëtare, të administruar nga Autoriteti Rrugor Shqiptar, duke u bërë të aksesueshme si për institucionet ashtu edhe për operatorët privatë.

Udhëzimi vendos detyrime të reja për administratën dhe kompanitë që operojnë në këtë fushë, të cilat do të duhet të përditësojnë dhe standardizojnë informacionin mbi rrugët, qarkullimin dhe ngjarjet në trafik. Një vëmendje e veçantë i kushtohet edhe mbrojtjes së privatësisë, duke kërkuar që të dhënat personale të përpunohen vetëm në formë të anonimizuar ose të koduar, në përputhje me ligjin.

Miratimi i këtij kuadri vjen në një kohë kur Shqipëria po përpiqet të afrohet me praktikat e Bashkimit Europian për menaxhimin modern të trafikut dhe uljen e aksidenteve. Sipas raportit të fundit të Komunitetit të Transportit, vendi ka arritur rreth 44% të nivelit të zbatimit të sistemeve inteligjente. Qendra Kombëtare e Monitorimit të Trafikut tashmë është ngritur dhe pajisur, ndërsa po vijon instalimi i kamerave dhe teknologjive të reja përgjatë afro 200 kilometrave të akseve kryesore rrugore.

Shqipëria shet jashtë zarzavate, por blen fruta të shtrenjta nga importi

Shqipëria po shfaq një kontrast të fortë në tregtinë bujqësore: nga njëra anë po forcon pozitat si eksportuese e zarzavateve, ndërsa nga ana tjetër po thellon varësinë nga importi i frutave, që po bëhen gjithnjë e më të kushtueshme për konsumatorët.

Të dhënat për vitin 2025 tregojnë se vendi importoi rreth 69 mijë ton zarzavate, me vlerë 4.35 miliardë lekë, për të mbuluar nevojat e tregut vendas në periudha kur prodhimi vendas nuk mjafton. Por në të njëjtën kohë, eksportet e zarzavateve ishin shumëfish më të larta, duke arritur në 175 mijë ton dhe një vlerë prej 14.1 miliardë lekësh. Kjo diferencë e madhe tregon se Shqipëria ka ndërtuar një sektor konkurrues, i cili jo vetëm plotëson tregun e brendshëm, por gjeneron edhe të ardhura të konsiderueshme nga jashtë.

Ndryshe paraqitet situata te frutat. Në vitin 2025, importet e frutave arritën në 8.32 miliardë lekë dhe afro 99 mijë ton, një nivel rekord që pasqyron rritjen e konsumit dhe kërkesën për produkte jashtë sezonit, si edhe për fruta tropikale. Eksportet, megjithëse janë rritur vitet e fundit, mbetën në 6.76 miliardë lekë dhe 139 mijë ton, çka do të thotë se Shqipëria nuk arrin të balancojë dot këtë kapitull të tregtisë.

Edhe pse eksportohen më shumë fruta në peshë, ato shiten me çmim më të ulët për kilogram, ndërsa frutat e importuara hyjnë në treg me çmime më të larta. Kjo bën që në terma financiarë bilanci të mbetet negativ dhe konsumatori shqiptar të paguajë më shumë për frutat që blen.

Në thelb, Shqipëria po përfiton nga eksporti i zarzavateve, por po humbet në tregtinë e frutave, një pabarazi që po ndikon si te fermerët vendas, ashtu edhe te çmimet në tregjet e vendit.

1...121314...400Faqja 13 nga 400