Ambasadorja e Shteteve të Bashkuara në Greqi, Kimberly Guilfoyle, ka reaguar pas vizitës së saj në Tiranë dhe pjesëmarrjes në ceremoninë e nënshkrimit të marrëveshjes energjetike mes Shqipërisë dhe kompanive amerikane.
Në një status të publikuar, ajo u shpreh e nderuar që mori pjesë në këtë aktivitet, duke theksuar rëndësinë e bashkëpunimit në sektorin e energjisë dhe objektivat e administratës amerikane në këtë drejtim.
“Isha e nderuar të udhëtoja në Tiranë për të avancuar agjendën energjetike të Presidentit të SHBA dhe për t’iu bashkuar Kryeministrit Edi Rama për të marrë pjesë në ceremoninë e nënshkrimit të një marrëveshjeje historike midis Shqipërisë, Venture Global dhe Aktor LNG USA për një marrëveshje 20-vjeçare për LNG-në amerikane”, shkruan ajo.
Sipas saj, marrëveshja me vlerë rreth 6 miliardë dollarë forcon sigurinë energjetike dhe atë kombëtare në rajon.
Ajo shtoi gjithashtu se bashkëpunimi mes SHBA-së, Shqipërisë dhe Greqisë e bën rajonin më të lidhur, më të sigurt dhe më të begatë.
