Me urdhër të Prokurorisë, pas atentatit në Rrilë të Lezhës, është ndaluar efektivi i policisë i identifikuar si Besart Kovaçi.

Polici akuzohet për veprën penale të shpërdorimit të detyrës, teksa ende nuk dihen arsyet e plota.

Kujtojmë se efektivi ishte rastësisht prezent brenda në berberhanen, ndaj të cilës u qëllua me breshëri plumbash. Gjatë sulmit, efektivi u është kundërpërgjigjur autorëve me armën e shërbimit.

Raportohet se në zonën e Lezhës po kryhen kontrolle të imtësishme për kapjen e autorëve të atentatit. Atentati i rëndë ndodhi mbrëmjen e djehsme dhe viktimë mbeti Sokol Daçi.

Autorët kanë qëlluar mbi 30 plumba në drejtim të sallonit të berberit dhe viktima është goditur me tre plumba në trup. Shënjestër e atentati ishte 21-vjeçari Merando Nikulaj, nipi i Ardian Nikulaj.

Kreu i partisë Demokratike Sali Berisha në “Foltoren” para kryeministrisë i bëri thirrje qytetarëve që të bashkohen masivisht kundër regjimit dhe korrupsionit.

Berisha u shpreh beteja për dinjitetin vazhdon dhe se nuk do të ndalet, Gjithashtu akuzoi kryeministrin Rama se ka kthyer Shqipërinë, ‘në portën kryesore të trafikut të drogës’. Më tej nënvizoi se në protesta do të dalin deri në fitore.

“Ju përfaqësoni guximin, kurajën, vendosmërinë. I përshëndes të gjithë ata shqiptarë që lebetitën një regjim antishqiptar, një regjim armik të kombit. Me protestën e tyre dërguan në të katër anët e botës, mesazhin e qytetarëve shqiptarë që nuk pajtohen kurrë me një regjim që i plaçkit çdo ditë. Nuk pajtohen me regjimin që e ka shndërruar Shqipërinë në portën kryesore të helmeve të drogës. Kjo betejë është për dinjitetin tonë, dinjitetin kombëtar”, tha Berisha, duke shtuar: “Nuk e kemi të lehtë, por jemi të vendosur. Ne do të luftojmë këtu do bëjmë gjithçka të përmbysim këtë të keqe dhe për t’i kthyer ëndrrën shqiptarëve”.

Debat brenda grupit parlamentar të PD-së për bojkotin e reformave Zgjedhore dhe Territoriale

Në mbledhjen e mbyllur të Grupit Parlamentar të Partisë Demokratike, disa deputetë shprehën kundërshtimin ndaj vendimit për bojkotin e reformave Zgjedhore dhe Territoriale.

Mesohet se, mes deputetëve që kërkuan pjesëmarrjen në komisionet përkatëse janë Bledjon Nallbati, Xhelal Mziu, Oerd Bylykbashi, Ina Zhupa, Tritan Shehu, Bledi Himçi, Enno Bozdo, Luan Baçi dhe Arjan Ndoja. Ata argumentuan se pjesëmarrja në proceset e reformës është e domosdoshme për përfaqësimin e opozitës dhe ndikimin në proces.

Kryetari i PD-së, Sali Berisha, i cili udhëhoqi mbledhjen, deklaroi se vendimi përfundimtar mbi bojkotin e reformave do të merret nga Kryesia e partisë, duke lënë të hapur diskutimin brenda radhëve të deputetëve.

Drejtoria Vendore e Policisë Fier

Specialistët për Hetimin e Krimeve të Komisariatit të Policisë Fier arrestuan shtetasit E. K., 37 vjeç, dhe L. D., 29 vjeç, pasi janë konfliktuar fizikisht dhe me sende të forta, me njëri-tjetrin, për motive të dobëta.

Specialistët për Hetimin e Krimeve të Komisariatit të Policisë Divjakë arrestuan shtetasin K. M., 68 vjeç, banues në Lushnjë, pasi ka thyer masën e sigurisë “Arrest në shtëpi”.
Gjithashtu, referuan materialet në Prokurori ku nisi procedimi penal për shtetasin E. C., 42 vjeç, banues në Divjakë, pasi në kundërshtim me vendimin e Gjykatës, i është afruar ish-bashkëshortes së tij.

Specialistët për Hetimin e Krimeve të Komisariatit të Policisë Lushnjë referuan materialet në Prokurori ku nisi procedimi penal për shtetasen E. H., 42 vjeçe, banuese në Lushnjë, pasi ka ushtruar dhunë ndaj nënës së saj.

Specialistët për Hetimin e Narkotikëve të DVP Fier referuan materialet në Prokurori ku nisi procedimi penal për shtetasin E. D., 22 vjeç, banues në Rrogozhinë, pasi gjatë kontrollit fizik, shërbimet e Policisë i gjetën një sasi lënde të dyshuar narkotike kanabis.

Specialistët e Qarkullimit Rrugor të DVP Fier referuan materialet në Prokurori ku nisi procedimi penal për shtetasin A. M., 18 vjeç, banues në fshatin Krutje, Lushnjë, pasi drejtonte pa leje drejtimi, një motomjet pa targa.

Materialet procedurale iu referuan Prokurorisë së Fierit, për veprime të mëtejshme.

Divjakë/Dje, në fshatin Fierseman, është gjetur nga familjarët, pa shenja jete, shtetasi G. S., 54 vjeç, i cili dyshohet se është vetëvarur.

Grupi hetimor po punon për dokumentimin e rrethanave të rastit.

Projekti për modernizimin e hekurudhës Rrogozhinë–Vlorë dhe ndërtimin e degëzimit që do të lidhë qytetin me Aeroportin e Vlorës po hyn në fazën vendimtare. Sipas Hekurudhës Shqiptare, deri në qershor të vitit 2026 do të përfundojë studimi teknik dhe projekti paraprak, çka i hap rrugë shpalljes së tenderit ndërkombëtar për ndërtimin e linjës.

Autoritetet sqarojnë se pas përfundimit të këtij dokumentacioni do të përcaktohet trasa për lidhjen hekurudhore me aeroportin, si dhe parametrat teknikë të gjithë aksit. Ndërkohë, mbetet në diskutim burimi i financimit, i cili mund të vijë ose nga buxheti i shtetit, ose përmes fondeve të huaja.

Studimi po realizohet nga kompania austriake ILF Consulting Engineers Austria, e shpallur fituese e kontratës vitin e kaluar. Sipas të dhënave zyrtare, linja aktuale Rrogozhinë–Vlorë, me gjatësi mbi 84 kilometra, është e amortizuar dhe funksionon larg kapacitetit të saj real, ndaj kërkon një ndërhyrje të thellë rehabilituese.

Në të njëjtën kohë, parashikohet ndërtimi i një linje të re hekurudhore drejt aeroportit, e cila do të jetë elektrike dhe do të lejojë shpejtësi deri në 120 km/orë. Ky investim pritet të kthejë zonën në një nyje të rëndësishme transporti.

Sipas Hekurudhës Shqiptare, lidhja direkte mes trenit dhe avionit do të përmirësojë ndjeshëm lëvizjen e udhëtarëve, duke e bërë udhëtimin më të shpejtë, më të sigurt dhe më miqësor me mjedisin. Po ashtu, synohet rritja e sigurisë në transport dhe ulja e ndjeshme e aksidenteve në rrugë.

Ish-presidentja e Republikës së Kosovës, Atifete Jahjaga, ka reaguar publikisht pas raportimeve mediatike që e lidhin emrin e saj me dosjen “Epstein”, të publikuar së fundmi nga Departamenti amerikan i Drejtësisë. Në një sqarim zyrtar, Jahjaga i ka cilësuar këto raportime si të pavërteta, të pabaza dhe mashtruese për opinionin publik.

“Raportimet mediatike për ‘lidhjen time’ me dosjen ‘Epstein’ janë tërësisht të pavërteta. Si Presidente e Republikës së Kosovës nuk kam pasur asnjëherë njohje, takim apo çfarëdo kontakti me personin në fjalë”, deklaron Jahjaga.

Ajo thekson se përmendja e emrit të saj në disa media lidhet vetëm me një korrespondencë elektronike të palëve të treta, e cila, sipas saj, nuk provon dhe nuk dëshmon asnjë takim, njohje apo lidhje personale. “Emri im nuk përmendet askund në asnjë dokument të publikuar. Në emailin në fjalë përmendet ‘Presidenti i Kosovës’, pa u specifikuar se për kë bëhet fjalë dhe pa ndonjë kërkesë për takim në emrin tim”, sqaron ish-presidentja.

Jahjaga i ka quajtur insinuata çdo interpretim tjetër të kësaj korrespondence dhe ka kërkuar që sqarimi i saj të publikohet nga të gjitha mediat që kanë përmendur emrin e saj në këtë kontekst. “Nuk e kam njohur, nuk e kam takuar dhe nuk kam kërkuar takim me personin në fjalë në asnjë pozicion që kam mbajtur”, thekson ajo.

Reagimi i ish-presidentes vjen pas publikimit, më 29 janar, të mijëra dokumenteve të dosjes Epstein nga autoritetet amerikane. Në mesin e tyre ndodhet edhe një email i vitit 2012, ku një person me emrin “Daniel”, identiteti i të cilit mbetet i panjohur, përmend “Presidentin e Kosovës” në një kontekst të përgjithshëm, pa emër konkret dhe pa prova për ndonjë takim të zhvilluar. Në atë periudhë, detyrën e Presidentes së Kosovës e ushtronte Atifete Jahjaga, çka ka nxitur spekulime dhe raportime mediatike, të cilat ajo i ka hedhur poshtë kategorikisht.

Një aksident i rëndë rrugor është regjistruar këtë të martë në zonën e Ujit të Ftohtë në Vlorë, pranë vendit të njohur si “Kalaja”.

Sipas informacioneve paraprake, një kamion ka humbur kontrollin dhe ka dalë nga rruga, duke përfunduar në zonën e plazhit. Dyshohet se shkak i aksidentit mund të ketë qenë shpejtësia e lartë ose një defekt në sistemin e frenimit.

Si pasojë, drejtuesi i mjetit, Përparim Kapaj, 62 vjeç, ka mbetur i plagosur rëndë dhe është transportuar me urgjencë në Spitalin Rajonal të Vlorës, ku ndodhet nën kujdesin e mjekëve.

Në vendngjarje kanë mbërritur shërbimet e Policisë Rrugore dhe forcat zjarrfikëse, të cilat po punojnë për zbardhjen e plotë të shkaqeve të këtij aksidenti.