Hapja e procedurës tenderuese për ndërtimin e Bypass-it të Tiranës nga Autoriteti Rrugor Shqiptar shënon përmbylljen e të gjitha segmenteve të aksit Milot–Fier, pjesë e Autostradës Adriatiko – Joniane.Kjo, pasi një nga lotet e kësaj autostrade përfshin një pjesë të këtij bypass-i.

Ndërtimi i Autostradës Milot–Fier, një nga projektet më të rëndësishme të infrastrukturës rrugore në vend, po ecën me ritme të ndryshme në pesë lotet e saj. Me një gjatësi totale prej 114 kilometrash, kjo autostradë është pjesë e Korridorit Adriatiko–Jonian dhe përfshin lidhjen e një sërë segmentesh, që aktualisht ndodhen në faza të ndryshme ndërtimi apo tenderimi.

Segmenti më i avancuar është ai Thumanë–Kashar, me një gjatësi prej 21 kilometrash, ku punimet kanë përfunduar dhe është hapur për qarkullimin e automjeteve. Ndërkohë, tre segmentet e tjerë: Milot – Thumanë, Kashar – Lekaj dhe Lekaj – Fier janë gjithashtu të kontraktuara për ndërtim dhe kompanitë ndodhen në procesin e sigurimit të lejeve për nisjen e punimeve. Të katër këto segmente do të realizohen përmes kontratave koncesionare.

Ndryshe paraqitet rasti i bypass-it të Tiranës, i cili do të ndërtohet me financim të drejtpërdrejtë nga buxheti i shtetit. Ky bypass do të ketë një gjatësi totale prej 21.6 kilometrash, nga të cilat 7 kilometra përkojnë me seksionin Kashar – Lekaj. Kjo pjesë e përbashkët nuk do të ndërtohet nga koncesionari i segmentit, por nga kompania që do të realizojë punimet për bypass-in e Tiranës.

Si rezultat, gjurma totale që do të përfshijë ky segment arrin në 33.6 kilometra, por vetëm një pjesë e saj është objekt i kontratës koncesionare.  Për ndërtimin e bypass-it të Tiranës, ARRSH ka hapur pak ditë më parë dy procedura tenderimi, me një fond total limit prej 6 mld lekësh. Bëhet fjalë për fazën e parë dhe të dytë të ndërtimit të segmentit Kashar – Nyja Vaqarr, që përfaqëson një pjesë të gjurmës së bypass-it.

/Scan/

Një aksident rrugor është shënuar këtë të diele në lagjen “4 Shtatori” të qytetit të Dimalit, ku një automjet ka përplasur një 82-vjeçar që po udhëtonte me biçikletë dhe më pas është larguar nga vendngjarja pa dhënë ndihmë.

I moshuari, Sotir Koraqe, banues në të njëjtën lagje, është transportuar menjëherë me ambulancë drejt Spitalit Rajonal të Beratit. Mjekët konfirmojnë se ai është jashtë rrezikut për jetën.

Policia rrugore ka mbërritur në vendngjarje dhe ka nisur hetimet. Nëpërmjet verifikimit të kamerave të sigurisë së bizneseve dhe banesave përreth, si dhe dëshmive të qytetarëve, është bërë i mundur identifikimi i mjetit dhe i drejtuesit që shkaktoi aksidentin.

Autori është shoqëruar në komisariat dhe pritet të japë shpjegime të hollësishme në lidhje me ngjarjen. Policia ka nisur procedurat për zbardhjen e plotë të rrethanave dhe përcaktimin e përgjegjësive ligjore.

Parlamenti Europian miratoi ndalimin e tarifave për bagazhin e dorës në të gjitha fluturimet brenda BE-së.Ditët kur pasagjerët në Europë duhet të paguanin tarifa shtesë për bagazhin e dorës (carry-on) duket se po marrin fund. Parlamenti Europian ka votuar pro ndalimit të tarifave për bagazhin dorës në të gjitha linjat ajrore, që operojnë brenda Bashkimit Europian.

Sipas propozimit të ri, udhëtarët do të mund të marrin me vete në kabinë një bagazh dore deri në 7 kilogramë pa pagesë shtesë, përveç çantës që vendoset poshtë sediljes që të gjitha linjat ajrore e lejojnë falas.

Në një deklaratë zyrtare të Komitetit për Transport dhe Turizëm në Parlamentin Europian, nënkryetari Matteo Ricci e cilësoi këtë vendim si “një hap të rëndësishëm drejt një udhëtimi më të drejtë dhe më transparent” dhe theksoi se “bagazhi i dorës falas deri në madhësinë maksimale 100 cm është një e drejtë themelore, që shmang kostot e pajustifikuara.”

Ky vendim është një fitore e madhe për pasagjerët, por jo të gjithë janë të kënaqur. Linjat ajrore me kosto të ulët, si Ryanair, e cila vitin e kaluar fitoi 4.7 miliardë euro nga tarifat shtesë për vendet, bagazhet dhe shërbime të tjera, pritet të preken më shumë nga kjo masë.

Shoqatat e industrisë ajrore kanë paralajmëruar se kjo reformë mund t’i detyrojë kompanitë të rrisin çmimet e biletave për të kompensuar të ardhurat e humbura. Megjithatë, ndalimi i tarifave për bagazhin dorës është pjesë e një pakete më të gjerë reformash për të drejtat e pasagjerëve të udhëhequr nga Parlamenti Europian.

Ndër masat e tjera të propozuara përfshihen: sigurimi i vendit falas pranë të rriturit shoqërues për fëmijët nën 12 vjeç, ulëse falas për kujdestarët e personave me aftësi të kufizuara dhe detyrimi i linjave ajrore për të shfaqur koston e plotë të biletës, që në fillim të procesit të rezervimit.

Megjithëse vendimi është pranuar në parim, ende nuk është e qartë se kur do të hyjë në fuqi, pasi pritet një votim përfundimtar në Parlamentin Europian. /Monitor

Shqipëria i bashkohet vendeve si SHBA-ja, Japonia, Zvicra, Arabia Saudite, Tajlanda, Italia dhe Egjipti në ambicien për t’u kthyer në një destinacion udhëtimi ultra-luksoz për turistët elitarë.

Ky pozicionim vjen si pjesë e një kuadri 10-vjeçar që synon të transformojë fatin ekonomik të vendit, përmes tërheqjes së turizmit të qëndrueshëm dhe me vlerë të lartë, duke lëvizur përtej vizitorëve të tregut masiv.

Projektet e reja qëndrojnë ndër investimet më të mëdha të huaja në vend, dhe sinjalizojnë qartë një zhvendosje strategjike të Shqipërisë drejt luksit dhe përvojave të personalizuara.

Në këtë valë të re zhvillimi, Shqipëria po ndjek trendet globale të turizmit, ku udhëtarët e nivelit të lartë kërkojnë autenticitet, privatësi dhe destinacione unike. Ishulli i Sazanit, për shembull, ofron një përzierje të natyrës së paprekur dhe afërsisë me qendrat evropiane.

Për më tepër, përvoja është kthyer në monedhë më vlerë në industrinë e turizmit – që nga ankorimet e jahteve private, darkat gurme me shefa të njohur botërisht, e deri te projektet e luksit të personalizuar që synojnë të krijojnë kujtime dhe ndikim në mediat sociale.

Agjencia Kombëtare e Mbrojtjes Civile dhe Ministria e Mbrojtjes raportojnë se gjatë 24 orëve të fundit në Shqipëri janë shënuar 58 vatra zjarri, nga të cilat vetëm një mbetet ende aktive.

Vatra e vetme aktive ndodhet në fshatin Markatomaj, njësi administrative Zejmen, bashkia Lezhë, në një sipërfaqe pyjore me pisha dhe bimësi të përzier. Pavarësisht izolimit rreth orës 05:45 nga katër automjete zjarrfikëse dhe banorët e zonës, trungjet e djegura vazhdojnë të vetëndizen herë pas here për shkak të erës.

Në qarqet e tjera, zjarret janë neutralizuar me sukses:

• Lezhë: 8 vatra – të gjitha të shuara.
• Berat: 5 vatra – të neutralizuara.
• Gjirokastër: 2 vatra – të shuara.
• Fier: 8 vatra – kryesisht në shkurre dhe bimësi.
• Elbasan: 3 vatra në fshatrat Petresh, Labinot Fushë dhe Kodër Bujaras.
• Tiranë: 12 vatra në Tiranë, Kavajë e Rrogozhinë – përfshirë edhe një zjarr në shtëpinë e fëmijëve “Zyber Hallulli” (vetëm dëme materiale).
• Durrës: 5 vatra – të gjitha të izoluara.
• Shkodër dhe Korçë: nga 2 vatra secila – të neutralizuara.
• Vlorë: 3 vatra – të fikura me sukses.

Sipas autoriteteve, janë djegur rreth 32 hektarë sipërfaqe me bimësi, përfshirë lis, arra dhe ullinj. Në operacione morën pjesë 85 automjete zjarrfikëse, 557 forca operacionale, si dhe një helikopter i Forcave të Armatosura.

Instituti i Gjeoshkencave parashikon për sot nivel rreziku të lartë për zjarre në qarqet Lezhë, Durrës, Tiranë dhe Fier, dhe rrezik të moderuar në qarqet e tjera.

Autoritetet u bëjnë thirrje qytetarëve të tregojnë kujdes gjatë temperaturave të larta dhe të kontaktojnë strukturat vendore në rast nevoje.

Vera e vitit 2025 vjen me çmime më të larta, por edhe me më shumë mundësi për pushime që nuk janë vetëm çlodhje, por edhe investim në eksperiencë.

Pavarësisht rritjes së kostove, turizmi mbetet përparësi për shumë konsumatorë që po kursejnë gjatë vitit për të jetuar një verë “të denjë për Instagram”.

Në plazhet me rërë të bardhë të Greqisë, në resortet luksoze me koncepte “all-inclusive” të Antalias, në vilat moderne buzë detit në jug të Shqipërisë, apo në fshatrat piktoreskë të Alpeve shqiptare, destinacionet e pushimeve janë gjithnjë e më të larmishme, por qëllimi mbetet i njëjtë: të shpenzosh me zgjuarsi, me kujdes ndaj buxhetit, por edhe me klas dhe stil.

Pushimet nuk janë më vetëm një shkëputje nga rutina, për shumë shqiptarë, ato janë kthyer në një “moment vjetor kulmor”, që duhet planifikuar me kujdes dhe shijuar në maksimum.

Ndryshe nga vitet e mëparshme, ku një paketë standarde mjaftonte për të qenë i kënaqur, sot udhëtarët shqiptarë, veçanërisht brezi i ri, po bëhen gjithnjë e më kërkues.

Ata nuk ndjekin më klishetë e pushimeve “hotel – shezlong – darkë në bufe”, por kërkojnë përvoja që ndërthurin natyrën, gastronominë vendase, lëvizjen fizike dhe aventurën.

Një ekskursion malor në Theth, një javë pune në distancë në një shtëpi tradicionale në jug, një kurs gatimi në një fermë italiane apo një koncert veror në një qytet mesdhetar, janë kthyer në skenarë realë pushimesh, që mbeten gjatë në kujtime dhe…në galeritë e telefonit.

Sipas të dhënave nga agjencitë turistike dhe platformat online, po vërehet një rritje e qartë e interesit për udhëtime përtej sezonit të pikut, si dhe për formate të reja, më fleksibël.

Qershori dhe shtatori po fiton gjithnjë e më shumë peshë si muaj zgjedhjeje, jo vetëm për çmimet më të ulëta, por edhe për përvojën më të qetë.

Ndërkohë, inflacioni dhe rritja e kostove kanë ndikuar te shporta e përditshme e konsumatorit, por jo domosdoshmërisht te vendimi për të udhëtuar.

Sipas komunikimeve me agjencitë, ata pohojnë se shqiptarët po kursejnë në blerje të tjera, më pak veshje, më pak dalje, më shumë planifikim, për të përballuar një verë që duhet “të jetë e paharrueshme”. Sipas agjencisë Ilirida Travel, tashmë rezervimet e hershme të janar-marsit janë bërë shumë më të zakonshme se 5 vite më parë dhe sipas kësaj logjike prenotimi, kursehet deri në 30%.

Pra, ku do të pushojnë shqiptarët këtë vit? A do t’u qëndrojnë besnikë plazheve të njohura, apo do të eksplorojnë rrugë të reja? Tendencat e reja tregojnë se përgjigjja nuk është më e thjeshtë.

Pushimet janë bërë më shumë sesa një destinacion, janë një përzierje zgjedhjesh personale, përvoje kulturore, buxheti dhe ëndrrash të vogla që duhen realizuar, qoftë për një fundjavë apo për një javë të tërë.

Të rinjtë pushojnë ndryshe

Ndryshe nga vitet e mëparshme, ku një paketë standarde mjaftonte për të qenë i kënaqur, sot udhëtarët shqiptarë, veçanërisht brezi i ri, po bëhen gjithnjë e më kërkues. Ata nuk ndjekin më klishetë e pushimeve “hotel – shezlong – darkë në bufe”, por kërkojnë përvoja që ndërthurin natyrën, gastronominë vendase, lëvizjen fizike dhe aventurën.

Greqia dhe Turqia, zgjedhjet kryesore

Edhe këtë vit, e njëjta panoramë, për pushime shqiptarët zgjedhin kryesisht fqinjët grekë dhe ‘vëllezërit’ turq. Greqia zgjidhet për destinacionet me aksesin e shpejtë dhe të afërt dhe sidomos, nga të pasionuarit e aventurës në ishujt e saj.

Turqia vijon të pëlqehet për komoditetin e chart-erave të linjës direkte dhe resortet “ultra all inclusive”.

Drejtuesit e agjencisë Union Travel thonë se destinacionet më të pëlqyera në Greqi janë Korfuzi, Halkidhikia e Parga.

Afërsia dhe mundësia për të shkuar në këtë destinacion edhe me automjete private e bëjnë më të vizituar dhe të prekshëm nga një pjesë e mirë e shqiptarëve që zgjedhin të pushojnë jashtë.

Por, e pohuar nga të gjitha agjencitë, Greqia këtë vit ka qenë 20% më e shtrenjtë se sa viti i shkuar. Nga agjencia ATHS kjo ka ndodhur sepse Greqia nuk ka oferta të reja strukturash akomoduese dhe ato ekzistueset “justifikohen” me kosto e rritura të mirëmbajtjes.

Ofertat për këtë destinacion janë për hotelet me katër e pesë yje, për 5 apo deri në 10 ditë qëndrim. Alternativë tjetër janë pushime në Korfuz, duke filluar nga 500 euro për person në hotele me 4 yje; në Halkidiki, duke nisur nga 550 euro për person, sipas Union Travel, të cilat janë destinacione të preferuara ndër vite.

Në Turqi, tre janë destinacionet që kërkohen  për shkak të ofertave të shumta: Antalya, Bodrum dhe Alanya.

Nga Union Travel thonë se çmimet fillojnë me 600 euro/personi dhe arrijnë deri në 2000 euro në disa resorte më të kripura. Shqiptarët në Turqi parapëlqejnë të prenotojnë në resorte me katër e pesë yje dhe me shërbime “all” apo edhe “ultra all inclusive”.

Antalia është destinacioni kryesor, i ndjekur nga Kemeri, Bodrumi e Alania. Koha e qëndrimit llogaritet mesatarisht nga 7 net.

“Për prenotimet e hershme, në Antalya ka pasur oferta hotelesh që kanë zbatuar deri edhe në 50% ulje të çmimeve. Një paketë për qëndrim në hotel me pesë yje, për 7 ditë, është ofruar me çmim prej 600 euro/personi”, thonë drejtuesit e agjencisë ATHS.

Shtrenjtohet Greqia

Greqia këtë vit ka qenë 20% më e shtrenjtë se sa viti i shkuar. Nga agjencia ATHS kjo ka ndodhur sepse Greqia nuk ka oferta të reja strukturash akomoduese dhe ato ekzistueset “justifikohen” me kosto e rritura të mirëmbajtjes.

Dubai dhe Egjipti, kërkesa në rritje

Përveç destinacioneve tradicionale si Greqia dhe Turqia, këtë verë po vërehet interes gjithnjë e më i madh për vende si Dubai dhe Egjipti. Këto destinacione, dikur të konsideruara më shumë si “luksoze” apo sezonale vetëm për dimër, tani po shndërrohen në zgjedhje të zakonshme për pushimet verore të shqiptarëve.

Dubai, me paketat e tij me çmime që nisin nga 900 deri në 1,200 euro për person për 5-7 ditë (përfshirë fluturimin, akomodimin dhe guidat), po tërheq udhëtarë që kërkojnë një kombinim të qytetarisë moderne me relaksin oriental.

Ndërkohë, Egjipti, me resortet e shumta “all inclusive” në Sharm El Sheikh dhe Hurghada, ofron një raport cilësi-çmim që është ende konkurrues në treg, paketat variojnë nga 750 në 950 euro personi për javë, duke përfshirë gjithçka.

Agjencitë turistike konfirmojnë rritjen e rezervimeve për këto dy destinacione, të cilat po tërheqin jo vetëm pushues tradicionalë, por edhe çifte të reja dhe të rinj që kërkojnë përvoja ndryshe, përtej Europës klasike.

Klima ekzotike, shërbimi dhe mundësia për të postuar “diçka ndryshe” në rrjete sociale janë kthyer në motivues shtesë në këtë zgjedhje, pohojnë agjentët e kontaktuar nga “Monitor”.

Për ata që duan të pushojnë pa e rënduar shumë buxhetin, paketat ekonomike mbeten një alternativë mjaft e kërkuar, veçanërisht në një verë ku çdo shpenzim po peshohet më shumë se zakonisht.

Greqia kontinentale, Mali i Zi, Maqedonia e Veriut, por edhe bregdeti shqiptar, ofrojnë mundësi reale për pushime 4 deri në 7-ditore, me çmime që variojnë nga 250 deri në 500 euro për person, në varësi të destinacionit, kategorisë së akomodimit dhe mënyrës së transportit.

Nga Matias Travel and Tours pohojnë se kanë përshtatur ofertat e tyre për këtë segment të tregut, duke ofruar paketa ekonomike me autobus, net në hotele me 3 yje, mëngjes të përfshirë dhe ndonjëherë edhe ekskursione lokale. Këto paketa janë veçanërisht të preferuara nga familjet me fëmijë dhe studentët, të cilët kërkojnë çlodhje dhe ndryshim ambienti, por nuk kanë luksin për të shpenzuar pa kufi.

Një nga ofertat tipike të sezonit përfshin një udhëtim me autobus drejt Pargas në Greqi ose Budvës në Mal të Zi, 4 net në hotel të kategorisë mesatare dhe mëngjes të përfshirë, për rreth 270-320 euro për person.

Alternativat vendase, si një fundjavë në Radhimë ose një minipushim në Velipojë apo Shëngjin, mund të jenë edhe më të përballueshme, sidomos kur organizohen vetë, pa ndërmjetës.

Dikur i konsideruar si “fund i sezonit”, shtatori po kthehet gjithnjë e më shumë në një muaj pushimesh të preferuar, sidomos për ata që duan të shmangin fluksin, temperaturat ekstreme dhe çmimet e larta të korrikut dhe gushtit.

Agjencitë turistike raportojnë një rritje të dukshme të kërkesës për udhëtime në shtator, si në destinacionet klasike europiane, ashtu edhe në qytete bregdetare më pak të eksploruara nga shqiptarët.

Një nga destinacionet më të kërkuara të këtij shtatori, sipas Ilirida Travel, është Costa Brava, në Barcelonë, një kombinim i mrekullueshëm mes plazheve mesdhetare dhe kulturës urbane spanjolle.

Paketa kushton 319 euro për person dhe përfshin: biletën e avionit, akomodimin për 4 net, mëngjesin, siguracionin e udhëtimit dhe nisjen nga data 12 shtator.

Çmimi, për një këto ditë pranë Barcelonës, është një mundësi që gjithnjë e më shumë shqiptarë po e shfrytëzojnë, veçanërisht të rinjtë apo çiftet pa fëmijë në shkollë.

Një tjetër destinacion që po zgjon interes është Malta, ishulli mesdhetar që ndërthur historinë, arkitekturën baroke dhe detin e kristaltë.

Kalemi Travel pohon se prenotimet për Maltën në shtator janë shtuar ndjeshëm, falë një oferte që përfshin 4 net qëndrimi, linjë direkte, mëngjes të përfshirë dhe siguracion shëndeti, me një kosto prej 380 euro për person.

Udhëtimi i organizuar dhe lehtësia në procedura, e bën këtë destinacion tërheqës për pushuesit që kërkojnë diçka ndryshe, por brenda një buxheti të arsyeshëm.

Për ata që kërkojnë destinacione më të veçanta, Kapadokia ofron përvojën unike të fluturimit me balonë dhe pamjet e shkretëtirës turke – një paketë 4-ditore me nisje në shtator kushton rreth 460-500 euro për person.

Ndërsa për dashamirësit e natyrës dhe bregdetit, Jugun e Italisë (Puglia, Bari, Leçe) e gjen me paketa nga 350 euro për 5 net.

Rajoni, më shumë në fundjavë

Për shumë shqiptarë, fundjavat jashtë vendit janë kthyer në një mënyrë të shpejtë dhe të përballueshme për të ndryshuar ajër, pa pasur nevojë për ditë të shumta pushimi apo buxhete të mëdha.

Falë linjave të shkurtra me makinë apo autobus dhe ofertave të shumta të agjencive turistike, destinacionet e rajonit, nga Mali i Zi në veri, deri në Selanik apo Ohër në juglindje, janë ndër më të preferuarat për arratisje të shkurtra, veçanërisht në periudhat jashtë sezonit të pikut.

Budva, Kotorri dhe Ulqini në Mal të Zi ofrojnë kombinimin perfekt mes detit dhe gjallërisë së jetës së natës, ndërsa çmimet për një fundjavë 2-3-ditore me akomodim dhe transport fillojnë nga 99 deri në 150 euro për person.

Një tjetër destinacion që po tërheq interes të shtuar është Ohri, me peizazhin e tij të qetë dhe çmime shumë konkurruese, një paketë tipike fundjave kushton rreth 85-110 euro për person, me mëngjes dhe ekskursione lokale të përfshira.

Selaniku dhe Janina, të arritshme lehtësisht me makinë apo autobus, janë gjithashtu zgjedhje të shpeshta për grupe të rinjsh apo çifte që kërkojnë pak shopping, pak det dhe shumë relaks.

Në shumicën e rasteve, këto udhëtime organizohen të premten pasdite me kthim të dielën në mbrëmje, një format që po fiton popullaritet të veçantë për ata që nuk duan të humbasin as ditët e punës, as fundjavën./MONITOR