Qarku Fier | Informacion zyrtar

Aktualisht në qarkun Fier nuk ka reshje shiu, ndërsa situata hidrologjike vijon të monitorohet nga strukturat përkatëse.

Sipas të dhënave të orës 08:00, nuk raportohet asnjë dëmtim i infrastrukturës kritike. Akset nacionale dhe rurale janë të kalueshme normalisht, ndërsa furnizimi me energji elektrike dhe ujë të pijshëm është në normalitet. Hidrovoret janë në gjendje pune dhe në gatishmëri të plotë.

Ndërkohë:

• Prurjet në lumin Vjosë vijojnë të jenë në kuota të larta, por me tendencë rënieje, sipas matjeve nga ura e Memaliajt.
• Po vazhdon tërheqja e ujërave drejt Hidrovorit të Darëzezës nga tokat bujqësore të përmbytura si pasojë e daljes së Vjosës nga shtrati.
• Lumi Seman paraqet prurje të larta dhe ka dalë nga shtrati në fshatin Murriz, Njësia Administrative Fiershegan, Bashkia Lushnjë, duke sjellë prani uji në oborret e banesave.
• Po ashtu, Semani ka përmbytur qindra hektarë tokë bujqësore brenda argjinaturave në zonat Roskovec–Patos dhe Fier.
• Lumi Shkumbin ka dalë nga shtrati në fshatin Thanasaj, duke kaluar nivelin e argjinaturës dhe duke prekur rreth 20 banesa.

Në terren ndodhen strukturat e Bashkisë Lushnjë, të cilat po shqyrtojnë mundësinë e evakuimit të banorëve të prekur.

Situata mbetet nën monitorim të vazhdueshëm nga autoritetet përgjegjëse.

Bashkia Roskovec po vlerësohet si një shembull pozitiv i menaxhimit të situatave emergjente, pasi pavarësisht reshjeve të dendura të shiut dhe prurjeve të shtuara të ujit, dëmet në tokat bujqësore kanë qenë minimale.

Sipas burimeve vendore, kjo situatë është përballuar falë masave parandaluese të marra në kohë, përfshirë pastrimin e kanaleve kulluese gjatë periudhës së verës, mirëmbajtjen e vazhdueshme të infrastrukturës së ujitjes dhe kullimit, si dhe serviset periodike të pompave në periudhat e pushimit.

Autoritetet lokale bëjnë me dije se edhe hapjet e portave të hidrocentralit të Banjës nuk kanë sjellë pasoja të konsiderueshme në territorin e Bashkisë Roskovec, për shkak të funksionimit normal të sistemit kullues.

Ky model menaxhimi, sipas Bashkisë, reflekton një qasje parandaluese dhe vizion afatgjatë në mbrojtje të bujqësisë dhe ekonomisë lokale, duke minimizuar ndikimin e kushteve të pafavorshme atmosferike.

Bashkia Roskovec është gjithashtu një nga njësitë vendore që ka përfituar fonde nga programet IPA dhe projekte të tjera ndërkombëtare, të investuara në qendra trajnimi për komunitetin, ngritjen e strukturave të bashkëpunimit sipas modelit të Bashkimit Europian, si dhe në përditësimin e kadastrës bujqësore.

Autoritetet vendore theksojnë se ky model menaxhimi mund të shërbejë si praktikë e mirë edhe për bashki të tjera të vendit.

Në Qafën e Llogarasë kanë rinisur reshjet e dëborës, duke shkaktuar vështirësi në qarkullimin rrugor në këtë aks. Problemet janë evidentuar në segmentin nga fshati Dukat deri në zonën e Palasës, ku drejtuesit e mjeteve po lëvizin me kujdes të shtuar.

Shërbimet përkatëse ndodhen në terren për menaxhimin e situatës, ndërsa drejtuesit e automjeteve këshillohen të përdorin goma dimërore dhe mjete antirrëshqitëse.

Hidrocentralet e Ulzës dhe Shkopetit kanë hapur portat si pasojë e rritjes së prurjeve ujore, duke shkaktuar përmbytje në disa fshatra të Kurbinit dhe Lezhës. Sipas informacioneve paraprake, rritja e nivelit të ujit ka sjellë daljen nga shtrati të përrenjve dhe përmbytjen e tokave bujqësore, ndërsa në disa zona uji ka depërtuar pranë banesave.

Situata është bërë problematike për banorët, të cilët po përballen me vështirësi në qarkullim dhe dëme materiale. Strukturat vendore dhe shërbimet e emergjencave civile janë në terren për të monitoruar situatën dhe për të ndërmarrë masat e nevojshme për mbrojtjen e jetës dhe pronës së qytetarëve.

Autoritetet u bëjnë thirrje banorëve të zonave të rrezikuara të tregojnë kujdes maksimal, të shmangin lëvizjet e panevojshme dhe të ndjekin njoftimet zyrtare, ndërsa prurjet vijojnë të mbeten të larta edhe në orët në vijim.

Niveli i lumit Vjosë është rritur sërish mesditën e kësaj të shtune, duke shtuar shqetësimet për një situatë të mundshme emergjente. Gjatë ditës së djeshme dhe në orët e para të ditës së sotme, niveli i ujit ka luhatur në kuotat 5.1–5.2 metra, ndërsa në mbrëmjen e së shtunës është shënuar një rritje e ndjeshme, duke arritur në 6.0 metra.

Sipas parashikimeve dhe informacioneve nga zonat e Përmetit dhe Gjirokastrës, prurjet e Vjosës vijojnë të jenë në rritje të vazhdueshme. Kjo situatë bën që në orët në vijim të priten prurje edhe më të mëdha dhe një rritje e mëtejshme e nivelit të lumit, duke rrezikuar sërish daljen e tij nga shtrati.

Strukturat përgjegjëse janë në monitorim të vazhdueshëm të situatës, ndërsa banorët e zonave pranë lumit këshillohen të tregojnë kujdes dhe të ndjekin njoftimet zyrtare.

Një ish-zyrtare e Ministrisë së Brendshme është arrestuar nga Policia pasi ka thyer masën e sigurisë “arrest në shtëpi” dhe ka tentuar t’i djegë automjetin ish-bashkëjetuesit të saj.

Burime zyrtare nga Policia e Shtetit bëjnë me dije se në pranga ka rënë shtetasja Alma Bine, 43 vjeçe.

Sipas njoftimit zyrtar, 43-vjeçarja dyshohet se ka shkelur vendimin e gjykatës duke dalë nga banesa, si edhe ka tentuar të djegë automjetin e ish-partnerit, duke rrezikuar seriozisht sigurinë e pronës dhe të personave përreth.

“U arrestua shtetasja A. B., 43 vjeçe, pasi dyshohet se ka thyer masën e sigurisë ‘arrest në shtëpi’ si dhe ka tentuar t’i djegë automjetin ish-bashkëjetuesit”, njofton Policia.

Materialet procedurale i janë referuar Prokurorisë për veprime të mëtejshme ligjore.

Ka nisur rënia e nivelit të prurjeve edhe në lumin Seman. Gjatë ditës së sotme, uji është tërhequr nga rruga Belinë–Kallm, si edhe nga zona e stacionit të pompimit, duke përmirësuar situatën në këto pika problematike.

Megjithatë, autoritetet bëjnë me dije se në orët në vijim, për shkak të shkarkimeve të planifikuara nga hidrocentrali i Banjës, mund të ketë një rritje të përkohshme të nivelit të ujit gjatë pasdites. Situata mbetet në monitorim të vazhdueshëm.