Automjeti del nga rruga dhe përplaset me shkallët e një banese, humbin jetën dy të rinj

Një aksident me dy viktima është regjistruar në orët e paratë mëngjesit pranë Peqinit.Automjeti tip Golf ka dalë nga rruga dhe është përplasur me shkallët e një banese.

Në aksident kanë humbur jetën 24-vjeçarët Gabriel Lluca dhe Denis Korbi.Të rinjtë u dërguan me urgjencë në  spital, por nuk mundën të mbijetonin.

Policia ndodhet në vendngjarje duke hetuar shkaqet e aksidentit.

Në njoftimin e policisë thuhet:

Peqin/Informacion paraprak

Rreth orës 02:00, në vendin e quajtur “Ura e Teqes”, Peqin, automjeti që drejtohej nga shtetasi G. Ll., 24 vjeç, ka dalë nga rruga.

Si pasojë e aksidentit kanë humbur jetën drejtuesi i automjetit shtetasi G. Ll. dhe pasagjeri në këtë automjet shtetasi D. K., 24 vjeç.

Grupi hetimor në drejtimin e Prokurorisë po punon për zbardhjen e rrethanave dhe shkaqeve të aksidentit.

Reshjet krijojnë probleme në Vlorë, rrezik përmbytjeje për dy banesa dhe një subjekt

Reshjet e dendura të shiut kanë shkaktuar probleme serioze në afërsi të fshatit Xhyherinë, në Vlorë.

Çarja e kanalit të ujërave të larta ka vënë në rrezik dy banesa dhe një subjekt pularie, duke krijuar një situatë emergjente për banorët e zonës.

Në vendngjarje ndodhen shërbimet e policisë, ato të zjarrfikëses, si edhe strukturat e emergjencave civile, të cilat kanë angazhuar një fadromë për të frenuar përhapjen e ujit.

Autoritetet theksojnë se për të shmangur përmbytjen e plotë është e nevojshme ndërhyrja me një mjet skrep, për pastrimin e inerteve që kanë bllokuar kanalin dhe po pengojnë qarkullimin normal të ujit.

 Fier – Arrestime për dr*gë, drejtim mjeti në gjendje të dehur dhe incident në stadium

Drejtoria Vendore e Policisë Fier

Specialistët e Seksionit për Hetimin e Narkotikëve arrestuan në flagrancë shtetasin E. M., 30 vjeç, banues në Fier, pasi gjatë kontrollit në automjetin që drejtonte, u gjet një sasi e vogël me lëndë narkotike e dyshuar kokainë, një sasi kanabisi si edhe një mjet prerës (thikë), të cilat iu sekuestruan me cilësinë e provës materiale.

Specialistët e Sektorit të Qarkullimit Rrugor arrestuan në flagrancë shtetasit O. S., 43 vjeç dhe R. L., 46 vjeç, banues në Lushnjë, pasi u kapën duke drejtuar automjetet, në gjendje të dehur.

Specialistët për Hetimin e Krimeve të Komisariatit të Policisë Mallakastër referuan materialet në Prokurori ku nisi procedimi penal për shtetasin G. K., 18 vjeç, banues në Vlorë, pasi dyshohet se gjatë ndeshjes së futbollit “Bylis-Flamurtari”, ka hedhur lëndë piroteknike në fushë.

Materialet procedurale iu referuan Prokurorisë së Fierit, për veprime të mëtejshme

Stuhia bllokon aksin Fier–Cakran, rrëzohen pemët e dëmtuara nga zjarret

Një stuhi e papritur që shpërtheu rreth orës 13:30 ditën e sotme ka shkaktuar një bllokim të përkohshëm të aksit të vjetër rrugor Fier–Cakran.Shkak për këtë ka qenë renia e disa pemëve pishe, të cilat ishin djegur nga zjarret e mëparshme dhe nuk i kishin rezistuar erës së fortë. Pemët janë rrezuar mbi rrugë, duke paralizuar për disa minuta lëvizjen e automjeteve.

Forcat zjarrfikëse kanë mbërritur menjëherë në vendngjarje dhe kanë hequr pemët, duke rikthyer normalitetin në qarkullim. 

Stuhia ndërpret përkohësisht fluturimet në aeroportin e Rinasit

Një stuhi e fuqishme ka përfshirë Shqipërinë, duke shkaktuar ndërprerjen e përkohshme të fluturimeve në Aeroportin Ndërkombëtar të Tiranës “Nënë Tereza”.

– Advertisement –

Pista është përfshirë nga erë dhe shi i fortë, duke bërë të pamundur operimin normal të fluturimeve.

Autoritetet kanë ndërprerë aktivitetin deri në përmirësimin e kushteve atmosferike.

Në pamjet e siguruara nga Euronews Albania tregojnë pasagjerë që presin fluturimet, ndërsa terminali është mbushur me njerëz.

Zjarr i madh në Vajzë të Vlorës, digjen toka e parcela me ullinj

Një zjarr i madh ka rënë në fshatin Vajzë të Vlorës dhe rrezikon të djegë shtëpitë e banorëve. I favorizuar nga era e fortë dhe temperaturat e larta, zjarri është përhapur me shpejtësi dhe ka shkrumbuar toka e parcela me ullinj.

Siç shihet dhe nga pamjet, situata duket në prag të katastrofës, pasi nuk ka ndërhyrje nga ajri, por gjithçka është lënë në dorë të forcave zjarrfikëse nga toka dhe banorëve që po përpiqen me mjete rrethanore.Mediat lokale në Vlorë raportojnë se nëse situata vazhdon e tillë, rrezikohen seriozisht shtëpinë e banorëve të fshatit Vajzë, ndaj bëjnë thirrje për reagim të menjëhershëm dhe ndërhyrje nga ajri për izolimin e vatrave.

Me aq mundësi sa kanë, banorët e zonës kanë ngarkuar makinat e tyre me ujë dhe po e hedhin atë në vendet ku flakët nuk kanë mbërritur ende, për të parandaluar përhapjen e mëtejshme në brendësi të fshatit.  

Inspektori i IMT vetëdorëzohet në polici pasi u shpall në kërkim, akuzohet se mori para për të mos hequr tendën e një lokali

Klajdi Zhilla, punonjës i Inspektoratit të Mbrojtjes së Territorit (IMT) në Tiranë, është vetëdorëzuar në polici pasi ishte shpallur në kërkim në kuadër të një operacioni të zhvilluar nga SPAK dhe Policia e Shtetit.

Zhilla akuzohet për korrupsion pasiv dhe shpërdorim detyre, pasi dyshohet se ka marrë ryshfet për të mos ndërhyrë ndaj një tende të vendosur pa leje në një lokal në zonën e Kombinatit.

Policia e Shtetit:

Në vijim të operacionit policor të koduar “Hapësira publike”, specialistët e Sektorit për Hetimin e Korrupsionit në Drejtorinë për Hetimin e Krimeve Ekonomike dhe Financiare bënë ndalimin e shtetasit K. Zh., 35 vjeç, banues në Tiranë, inspektor i IMT, bashkia Tiranë, i cili u vetëdorëzua në Policinë e Tiranës.Ky shtetas ishte i shpallur në kërkim, në kuadër të operacionit “Hapësira publike”, për veprat penale “Korrupsioni aktiv i personave që ushtrojnë funksione publike” dhe “Shpërdorimi i detyrës”, të kryera në bashkëpunim.

Materialet procedurale u referuan për veprime të mëtejshme në Prokurorinë e Posaçme kundër Korrupsionit dhe Krimit të Organizuar.

Greqi-Shqiptari vuri zjarrin me çakmak, rrezikoi shtëpitë në zonë. 62-vjeçari arrestohet për zjarrvënie të qëllimshme

Një shtetas shqiptar 62-vjeç është arrestuar nga autoritetet greke, pasi dyshohet se ka qenë i përfshirë në zjarrin që shpërtheu së fundmi në kodrën Paleopanagia, në zonën Kantza të Paianias.

Sipas hetimeve, i dyshuari u identifikua përmes një videoje të transmetuar nga media greke, ku ai shihet duke kaluar me biçikletë malore pranë zonës ku më vonë shpërtheu zjarri. Vetëm pak minuta pas kalimit të tij, në video shfaqet tym i zi që ngrihet nga kodra, element ky që forcoi dyshimet për përfshirjen e tij në zjarrvënie.

Hetimet tregojnë se 62-vjeçari ka përdorur një çakmak për të ndezur zjarrin dhe më pas është përpjekur të eliminojë provat duke hedhur çantën e shpinës në një kosh plehrash. Kjo çantë u gjet nga autoritetet dhe pritet të jetë një provë kyçe në procesin hetimor.

Falë ndërhyrjes së shpejtë të forcave zjarrfikëse të martën pasdite, zjarri u vu nën kontroll përpara se të përhapej në drejtim të banesave apo tokave përreth.
Përveç pamjeve filmike, në identifikimin e të dyshuarit ndihmuan edhe dëshmitë e banorëve lokalë. Ai tashmë ndodhet në paraburgim dhe ndaj tij është ngritur akuza për zjarrvënie të qëllimshme në një zonë pyjore.

1...222324...282Faqja 23 nga 282