Drejtoria Vendore e Policisë Fier njofton për disa raste të evidentuara gjatë 24 orëve të fundit në qarqet Fier, Mallakastër, Lushnjë dhe Divjakë.

• Mallakastër – U proceduan penalisht në gjendje të lirë shtetasit E. M., 44 vjeç, banues në Tiranë, dhe A. M., 24 vjeç, banues në Fier, me detyra respektive si inxhinier dhe përgjegjës sektori në një shoqëri për trajtimin e naftës. Ata akuzohen se nuk kanë kontrolluar tubacionet, duke shkaktuar dëmtim dhe rrjedhje hidrokarburesh që ndotën një sipërfaqe toke shtetërore në fshatin Lavdan.
• Fier – Specialistët e Qarkullimit Rrugor arrestuan në flagrancë shtetasin E. J., 38 vjeç, banues në Durrës, pasi u kap duke drejtuar automjetin nën efektin e alkoolit.
• Lushnjë – U proceduan penalisht në gjendje të lirë shtetasit I. Sh. dhe P. K., për veprën penale “Ndërtimi i paligjshëm”.
• Divjakë – U procedua penalisht shtetasja K. E., 29 vjeçe, banuese në Tiranë, pasi me automjetin që drejtonte goditi një automjet të parkuar dhe u largua nga vendi i ngjarjes. Si pasojë pati vetëm dëme materiale.
• Fier – Rreth orës 09:00, në vendin e quajtur “Pushimi i shoferit”, automjeti me drejtues shtetasin E. M., 28 vjeç, u përplas me automjetin që drejtohej nga shtetasja Q. B., 31 vjeçe. Kjo e fundit mbeti e dëmtuar dhe ndodhet jashtë rrezikut për jetën, nën kujdesin e mjekëve.

Materialet procedurale iu referuan Prokurorisë së Fierit për veprime të mëtejshme.

Të dhënat eInstitutit të Statistikave (INSTAT) ofrojnë një panoramë të detajuar për shpërndarjen e punësimit sipas sektorëve kryesorë të ekonomisë shqiptare gjatë vitit 2024. Rezultatet tregojnë një ndarje të qartë të fuqisë punëtore mes bujqësisë, industrisë dhe shërbimeve, me dallime sipas qarqeve të vendit.

Në sektorin e bujqësisë janë të punësuar gjithsej rreth 432 mijë persona. Pagat në këtë sektor mbeten ndër më të ulëtat, duke lëvizur mes 40 dhe 50 mijë lekësh në muaj, çka pasqyron vështirësitë dhe natyrën sezonale të punës bujqësore. Nga ana e ndarjes gjeografike, qarku i Fierit mban kryesimin me rreth 75 mijë punëtorë, duke u ndjekur nga Elbasani dhe Berati, ndërsa Lezha ka numrin më të vogël të të punësuarve në këtë fushë.

Sektori i industrisë ka regjistruar një total prej 241 mijë punonjësish gjatë vitit 2024. Tirana zë vendin e parë me 93 mijë të punësuar, duke reflektuar zhvillimin e lartë të aktiviteteve prodhuese dhe ndërtimore në kryeqytet. Përveç Tiranës, Fieri dhe Durrësi shënojnë gjithashtu shifra të larta punësimi në këtë sektor, ndërsa më pak të punësuar numërohen në Dibër dhe Kukës. Sipas të dhënave të INSTAT, ky sektor ka pësuar rritjen më të madhe të punësimit krahasuar me vitin 2023, duke u bërë një ndër motorët kryesorë të shtimit të vendeve të punës.

Ndërkohë, sektori i shërbimeve përfaqëson pjesën më të madhe të tregut të punës në vend, me një total prej 503 mijë të punësuarish. Tirana vijon të mbajë rolin kryesor, falë përqendrimit të aktiviteteve ekonomike dhe administratës, e ndjekur nga Durrësi dhe Elbasani. Kjo strukturë punësimi pasqyron faktin se shërbimet janë segmenti dominues i ekonomisë shqiptare, që përthith pjesën më të madhe të fuqisë punëtore.

Fier — Drejtoria Vendore e Policisë Fier njofton se specialistët për Hetimin e Krimeve të Komisariatit të Policisë Mallakastër kanë shpallur në kërkim shtetasin M. B., 26 vjeç.

I riu dyshohet se për motive të dobëta ka plagosur lehtë me mjet prerës një 45-vjeçar. Ky i fundit pasi mori ndihmën mjekësore në spital, është larguar për në banesë.

Policia bën me dije se vijon puna për kapjen e autorit, ndërsa materialet procedurale i janë referuar Prokurorisë së Fierit, për veprime të mëtejshme.

Albcontrol nuk ka arkëtuar 135 mln euro deri në fund të 2024-s, për shkak të bllokimit të llogarive nga konflikti me Becchettin.Shuma që Albcontrol, kompania me pronësi shtetërore, që menaxhon trafikun ajror, nuk ka arritur të arkëtojë për shkak të bllokimit të llogarive të saj në Eurocontrol, si rrjedhojë e konfliktit mes qeverisë shqiptare dhe investitorit italian, Francesco Becchetti, ka arritur në 13.5 miliardë lekë në fund të vitit 2024, ose 135 milionë euro sipas bilancit zyrtar të kompanisë.

Përfshirë dhe interesat bankare në pritje, shuma arrin në 13.7 miliardë lekë.

“Gjatë vitit 2024 ashtu si edhe gjatë vitit 2023, shoqëria nuk ka arkëtuar asnjë të ardhur nga shërbimi en route dhe terminal charge si pasojë e një vendimi të gjykatës së shkallës së parë të Brukselit, për bllokimin e të ardhurave nga shërbimet en route dhe terminal charge, të ofruara nga Albcontrol”, thuhet në përshkrimin e pasqyrave financiare.

Shuma që Albcontrol nuk arrin të arkëtojë po rritet vit pas viti. Nga 607 milionë lekë që ishte ky zë në dhjetor 2020, arriti në 2.9 miliardë lekë në 2021, u rrit në 6.7 miliardë lekë në vitin 2022 për të arritur në 10.5 miliardë lekë në 2023,  dhe 13.5 miliardë lekë në 2024-n.

Këto të ardhura, Albcontrol duhet t’i kishte marrë nga aktiviteti normal i saj, ulje­ngritje e mbikalime për periudhën 2021-2024 nga Eurocontrol, organizatë paneuropiane e dedikuar në mbështetjen e aviacionit europian, me seli në Bruksel.

Fillimisht këto detyrime ishin në zërin “Llogari të arkëtueshme nga kompanitë ajrore”, i cili paraqet të drejtat për arkëtim për shoqërinë, por që nuk janë arkëtuar paratë për këto të ardhura, ndërsa në 2024-n kanë kaluar në zërin “Klientë në pritje”.

Në vitin 2024, kompania raportoi të ardhura prej 3.6 miliardë lekësh, në rritje me 9% në krahasim me vitin e mëparshëm, si rrjedhojë e gjallërimit të aktivitetit ajror pas pandemisë.

Shpenzimet e personelit ndërkohë u rritën me 47%, duke arritur në 1.47 miliardë lekë.

Mori 74 milionë euro kredi për të përballuar aktivitetin, nuk shlyen asgjë në 2024-n

Pamundësia për të arkëtuar paratë nga shërbimet që ajo ofron kanë detyruar Albcontrol që të marrë kredi dhe ndihma pranë institucioneve shtetërore në 2023-n. Në 2024-n, kompania raporton që nuk ka filluar akoma të shlyejë huatë, teksa do të duhet ti paguajë brenda 7 muajve të parë të 2025-s.

Në fund të vitit 2024, Albcontrol kishte një principal kredie për tu paguar prej 7.4 miliardë lekë, nga 2.4 miliardë lekë në 2022 dhe e pandryshuar nga 2023-shi. Nga kjo shumë, 421 milionë lekë janë dhënë hua nga Drejtoria e Përgjithshme e Shërbimeve të transportit Rrugor.

Për këtë kredi afati i shlyerjes është shtyre brenda 6 mujorit të parë 2025, së bashku me interesat dhe komisionet që do ti paguhen huadhënësit.

Qeveria nga ana e saj ka dhënë një mbështetje financiare prej 3 miliardë lekë përmes një akti normativ të miratuar në dhjetor 2023.  Shoqëria do të kthejë shumën e marrë brenda 31.07.2026 (shlyerja do të bëhet me 3 këste të barabarta gjashtëmujore duke filluar me këstin e pare të pagueshëm në date 31.07.2025).

4 miliardë lekë të tjera janë dhënë mbështetje financiare me vendim të Asamblesë së Aksionarit, përkatësisht nga 2 miliardë lekë në dhjetor 2022 dhe nëntor 2023. Aksioneri i Albcontrol është Ministria e Ekonomisë, Kulturës dhe Inovacionit.

“Gjatë vitit 2024, Shoqëria nuk ka shlyer këste për huatë e marra dhe gjendja e principalit mbetet e pandryshuar nga ajo e vitit 2023”, thuhet në raportin financiar..

Konflikti me Becchetti, shteti ende njeh detyrim 108 milionë euro

Zanafilla e përplasjes mes shtetit dhe investitorit nisi në qershor të 2015-ës,  kur u bllokuan asetet e Francesco Becchetti-t.

Bllokimi i këtyre aseteve çoi edhe në mbylljen e televizionit Agon Channel, element që u përdor nga Beccheti për të çuar çështjen në Arbitrazh.

Përballja e Shqipërisë me investitorin italian, Francesco Becchetti, në Qendrën Ndërkombëtare për Zgjidhjen e Mosmarrëveshjeve të Investimeve, përfundoi me një vendim në favor të tij, duke i akorduar një kompensim prej 110 milionë eurosh në vitin 2020.

Në 26 maj 2021, në Qendrën Ndërkombëtare për Zgjidhjen e Mosmarrëveshjeve të Investimeve (ICSID) u paraqit një tjetër kërkesë e Shqipërisë sa i takon përplasjes me investitorin italian Francesco Becchetti ku u regjistrua një kërkesë për korrigjim të vendimit për anulim të paraqitur nga Republika e Shqipërisë.

Por në prill 2023, Becchetti fiton përfundimisht Arbitrazhin me qeverinë shqiptare.

Ky i fundit, pasi ftoi gjyqin me qeverinë shqiptare për një shumë prej 110 milionë eurosh, po synon mbledhjen e parave në llogaritë që shteti shqiptar ka jashtë kufijve, ku një prej tyre është llogaria e Albcontrol në Eurocontrol në Bruksel, e cila ka ngrirë që prej vitit 2021.

Në total, Qeveria shqiptare përballet me një faturë prej gati 180 milionë eurosh nga çështjet e humbura dhe ato në proces në arbitrazh ndërkombëtar, me biznese të ndryshme, sipas të dhënave të Ministrisë së Financave për fundin e vitit 2024. Rreth 60% e kësaj shumë është vetëm detyrimi për çështjen “Becchetti”.

Financat ende e njohin këtë shumë, që i detyrohen investitorit italian si detyrim kontingjent, ku përfshihen detyrime të mundshme financiare që mund t’i ngarkohen shtetit shqiptar si rezultat i çështjeve të hapura në gjykatat e arbitrazhit ndërkombëtar, në rast se vendimi jepet në favor të palës paditëse kundër shtetit. /Monitor

Njoftimi i policisë:

Drejtoria Vendore e Policisë Vlorë

Specialistët e Seksionit të Trafikut Urban dhe Interurban Vlorë arrestuan për veprën penale “Shkelja e rregullave të qarkullimit rrugor”, shtetasen italiane A. T., 28 vjeçe, banuese në Napoli, pasi ditën e djeshme, duke drejtuar automjetin në afërsi të vendit të quajtur “Kripa”, në autostradën “100 Vjetori”, është përplasur me një kamionçinë tip “Benz”. Si pasojë e aksidentit ka humbur jetën në vendngjarje drejtuesi i kamionçinës, shtetasi F. H., 63 vjeç, banues në Vlorë. Gjithashtu, si pasojë e dëmtimeve të marra, ka humbur jetën në spital edhe pasagjeri në këtë mjet, shtetasi D. M., 47 vjeç, banues në Vlorë.

Materialet iu referuan Prokurorisë, për veprime të mëtejshme.