Si rezultat i bashkëpunimit shumë të ngushtë të Interpol Tiranës me Interpol Abu Dhabi dhe me partnerët në Emiratet e Bashkuara Arabe, në kuadër të operacionit policor ndërkombëtar të koduar “The Wanted”, pritet që gjatë ditës së sotme të finalizohen procedurat për ekstradimin nga Dubai, Emiratet e Bashkuara Arabe, në Shqipëri, të shtetasit shqiptar D. B., 37 vjeç, shtetas i shpallur në kërkim ndërkombëtar, me rrezikshmëri shumë të lartë shoqërore, i akuzuar për një sërë veprash penale në fushën e krimeve kundër personit, të kryera në formën e grupit të strukturuar kriminal dhe për armëmbajtje pa leje.

Ky shtetas ishte i shpallur në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar Tiranë i ka caktuar masën e sigurisë “Arrest në burg”, për veprat penale: “Vrasja me paramendim”, kryer në formë të veçantë të bashkëpunimit, atë të grupit të strukturuar kriminal; “Prodhimi dhe mbajtja pa leje e armëve luftarake dhe municioneve”; “Grupi i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”; dhe “Sigurimi i kushteve dhe i mjeteve materiale për të kryer vrasje”, kryer në formën e veçantë të bashkëpunimit, atë të grupit të strukturuar kriminal.

Në lidhje me orën e mbërritjes, do të ketë një njoftim tjetër.

SPAK mori zyrtarisht të pandehur Erion Veliajn për akuzat e korrupsionit, pastrimit të parave dhe fshehjes së pasurisë. Mesohet se akuzat do t’i komunikohet sot dhe se avokatët dhe Veliaj janë njoftuar zyrtarisht nga Prokuroria e Posaçme.

Nuk dihet nëse kryebashkiaku i Tiranës do të lërë për pak orë qelitë e paraburgimit në Durrës për t’u përballur me prokurorët e posaçëm, Altin Dumani dhe Ols Dado.

Ajo çfarë mbetet e paqartë është nëse SPAK do ta përcjellë dosjen për në Gjykatën e Posaçme apo do të shtyjë afatet e hetimit.

Erion Veliaj mbahet në paraburgim prej 10 shkurtit të këtij viti.

Ai po hetohet bashkë me bashkëshorten Ajola Xoxa dhe 6 biznesmenë për akuzat e korrupsionit, fshehje pasurie dhe pastrim parash.

Ditën e djeshme u mor i pandehur dhe iu komunikuan akuzat dhe biznesmenit Abule.

Shqipëria ka shënuar një rritje të ndjeshme në përdorimin e mjeteve mekanike në sektorin bujqësor gjatë vitit 2024, me një total prej 34 mijë njësish të regjistruara në të gjithë vendin. Të dhënat e publikuara nga “Scan Intel” japin një pasqyrë të qartë të shpërndarjes së këtyre mjeteve sipas qarqeve, duke theksuar një prani dominuese të qarkut të Fierit dhe Korçës në krye të listës.

Fieri, lider absolut në mekanizimin bujqësor

Qarku i Fierit konfirmon edhe një herë rolin e tij udhëheqës në bujqësi, duke regjistruar 3,141 traktorë me rrota dhe 1,354 minitraktorë. Me një total prej 4,495 mjete mekanike, ky qark vlerësohet për infrastrukturën bujqësore të zhvilluar dhe sipërfaqet e mëdha të tokës së punueshme që favorizojnë përdorimin e mekanikës moderne.

Korça, vendi i dytë me potencial të lartë

Korça renditet menjëherë pas Fierit me 1,624 traktorë me rrota dhe 1,223 minitraktorë, duke arritur një total prej 2,847 njësish. Investimet në bujqësi dhe tradita shumëvjeçare në kultivimin e kulturave të ndryshme e kanë bërë këtë qark një pikë referimi për bujqësinë e mekanizuar në vend.

Qarqet verilindore në fund të listës

Në kontrast me qarqet e mësipërme, Dibra dhe Kukësi paraqesin shifra dukshëm më të ulëta. Dibra ka vetëm 321 traktorë me rrota dhe 49 minitraktorë, ndërsa Kukësi rezulton me 313 traktorë dhe 164 minitraktorë. Ekspertët vlerësojnë se këto shifra reflektojnë ndikimin e terrenit malor, sipërfaqeve më të kufizuara bujqësore dhe aksesit më të vështirë në infrastrukturën rrugore dhe mbështetjen financiare.

Statistika kombëtare

Në nivel kombëtar, traktorët me rrota përbëjnë grupin më të madh të mjeteve mekanike, me 10,632 njësi të regjistruara. Më tej pasojnë minitraktorët me 6,168 njësi dhe makinat mbjellëse me 4,362 njësi, duke reflektuar rritjen e interesit për mekanizimin si një mjet për rritjen e produktivitetit në bujqësi.

Perspektiva për të ardhmen

Rritja e përdorimit të mekanikës në bujqësi është një tregues pozitiv për modernizimin e sektorit, por shpërndarja e pabarabartë tregon se qarqet më të izoluara dhe me më pak mbështetje kanë ende nevojë për politika më të fokusuara zhvillimi. Zonat malore dhe verilindore të vendit përballen me sfida që kërkojnë zgjidhje të përshtatura për të mundësuar një zhvillim më të balancuar dhe gjithëpërfshirës në sektorin bujqësor.

Këto pamje vijnë nga një lagje në zemër të Fierit, ku një shesh i përbashkët, i krijuar mes tre pallateve 🏢, është uzurpuar prej 5 vitesh nga një individ që e ka kthyer në biznes privat.

Në vend që të shfrytëzohet si hapësirë publike për komunitetin, ky shesh është kthyer në parkim me pagesë, me tabela të vendosura që e shpallin “privat”, duke përfituar padrejtësisht nga prona publike.

Brenda pak minutash, Bashkia e Fierit dhe strukturat e Mbrojtjes së Territorit do të ndërhyjnë për të çliruar çdo metër katror të zënë në mënyrë të paligjshme.

Ju ftojmë të raportoni raste të ngjashme në të gjitha bashkitë e qarkut Fier. Hapësirat publike janë për të gjithë, jo për përfitime private!

Aksioni kombëtar për formalizimin e sektorit bujqësor dhe forcimin e sigurisë ushqimore po zbatohet me intensitet në qarqet Tiranë, Durrës, Fier, Lezhë dhe Korçë.

Nga 151 kontrolle të kryera nga strukturat shtetërore, janë bllokuar 63 ton produkte bujqësore e blegtorale pa faturë, si pjesë e një përpjekjeje të përbashkët mes Ministrisë së Financës dhe asaj të Bujqësisë.

Qëllimi i këtij aksioni është:

• Formalizimi i zinxhirit të prodhimit bujqësor
• Faturimi tatimor dhe përdorimi i NIPT-it
• Gjurmueshmëria e produkteve nga ferma deri tek konsumatori
• Rritja e sigurisë ushqimore dhe transparencës në treg

Autoritetet u bëjnë thirrje fermerëve dhe tregtarëve të zbatojnë ligjin duke lëshuar fatura fiskale në çdo hallkë të zinxhirit, për të garantuar produkte të sigurta dhe një ekonomi të drejtë.

Me rritjen e lëvizjes në pikat kufitare, Doganat Shqiptare kanë rritur kontrollet ndaj udhëtarëve që hyjnë apo dalin nga vendi me shuma të mëdha parash të padeklaruara.

Çdo shumë mbi 10 mijë euro, si para në dorë, metale apo sende të çmuara, duhet të deklarohet në kufi përmes formularit RTVK, të cilin udhëtarët e plotësojnë falas në pikat doganore, përpara kontrollit të pasaportës.

Nëse nuk deklarohet:

• Gjoba për herën e parë shkon nga 20 mijë deri në 60 mijë lekë, në varësi të shumës.
• Për përsëritje, ndëshkimi shkon nga 10% deri në 50% të shumës së fshehur.
• Për rastet më të rënda, parashikohet edhe ndjekje penale.

Dogana thekson se nuk ka rëndësi si udhëtohet apo ku mbahen paratë — deklarimi është i detyrueshëm.