Rritja e çmimeve të naftës në tregjet ndërkombëtare, në mënyrë të pashmangshme do të reflektohet edhe në tregun e brendshëm të shitjes me pakicë të hidrokarbureve.

Eksperti i ekonomisë, Adrian Civici, deklaroi në një intervistë për TV Scan se, e rëndësishme është që të tregu të reflektojë në kohë rritjen ose rënien e çmimeve dhe të mos abuzohet.

Gjithashtu, Civici shprehet se Shqipëria mund të preket nga dy faktorë; rritja e inflacionit të brendshëm, si pasojë e rritjes së çmimeve të naftës, dhe nga inflacioni i importuar.

Nafta Brent e Londrës, që është referenca globale, është rritur me rreth 10 dollarë për fuçi, që kur filloi konflikti dhe po tregtohet në rreth 83 dollarë për fuçi.

Ndërsa, nafta e përpunuar në bursën e Londrës, që merret si referencë nga importuesit e hidrokarbureve në Shqipëri, është rritur nga 730 dollarë për ton, përpara konfliktit, në rreth 1,075 dollarë të enjten.   

Burimi -/Scan/-

Një numër i lartë automjetesh nuk kanë arritur të kalojnë kontrollin teknik gjatë dy muajve të parë të vitit 2026. Sipas të dhënave të publikuara nga Drejtoria e Përgjithshme e Shërbimeve të Transportit Rrugor, në periudhën janar–shkurt plot 16.301 mjete nuk kanë përmbushur kriteret e kërkuara për të kaluar kontrollin.

Nga statistikat rezulton se pjesa më e madhe e problemeve lidhet me sistemin e shkarkimit të gazrave, që përbën rreth 34.5 për qind të rasteve të konstatuara. Defektet në këtë sistem ndikojnë në funksionimin e automjetit dhe në rritjen e ndotjes së ajrit.

Një tjetër pjesë e konsiderueshme e mangësive lidhet me elementët vizualë dhe funksionalë të mjeteve, të cilat përbëjnë rreth 30 për qind të rasteve. Ndërkohë, rreth 20 për qind e automjeteve kanë shfaqur probleme në sistemin e drejtimit dhe të amortizimit, elementë të rëndësishëm për stabilitetin gjatë lëvizjes.

Po ashtu, rreth 15.5 për qind e automjeteve nuk kanë kaluar kontrollin për shkak të defekteve në sistemin e frenimit, i cili konsiderohet ndër komponentët më të rëndësishëm për sigurinë në rrugë.

Autoritetet u bëjnë thirrje drejtuesve të mjeteve që të kontrollojnë rregullisht gjendjen teknike të automjeteve dhe të kryejnë mirëmbajtjen e nevojshme, për të rritur sigurinë në qarkullim dhe për të shmangur rrezikun e aksidenteve.

Një grabitje me armë raportohet të ketë ndodhur në Tiranë, në një pikë këmbimi valutor. Sipas burimeve, 1 milionë e 200 mijë lekë të vjetra dyshohet se është shuma që ai ka marrë. Autori pas grabitjes dyshohet se është larguar me motorr nga qendra tregtare.Sipas informacioneve, autori ishte me jelek të zi, xhup blu dhe me kapuç. Më konkretisht, autori ka kryer vjedhjen në një exchange në 5 Maj.

Euro ka humbur pikë përballë monedhës tonë kombëtare, dhe në kursin zyrtar të Bankës Qendrore këmbehet me 96.1 lekë.

Rënia e monedhës Europiane është pjesë e një cikli më të gjerë të dobësimit të disa monedhave kryesore kundrejt lekut. Edhe dollari amerikan ka pësuar një rënie të mëtejshme, duke u këmbyer me 82.6 lekë, ose 0.3 lekë më pak se në përditësimin e mëparshëm. Ndërkohë, në të njëjtën linjë kanë lëvizur edhe dollari australian, dollari kanadez dhe juani kinez, të cilat gjithashtu kanë shënuar rënie të lehtë në raport me monedhën shqiptare.

Forcimi relativ i lekut është lidhur shpesh me disa faktorë, mes tyre rritja e hyrjeve valutore nga turizmi, investimet e huaja direkte, si dhe remitancat nga emigrantët.

Ky trend ka ndikime të ndryshme në ekonomi. Nga njëra anë, një euro më e dobët favorizon importet dhe ndihmon në frenimin e inflacionit, pasi produktet e importuara bëhen relativisht më të lira. Nga ana tjetër, zhvlerësimi i monedhës europiane mund të ndikojë negativisht te eksportuesit dhe sektorët që gjenerojnë të ardhura në euro, të cilët përballen me të ardhura më të ulëta në lekë.

Autoriteti i Konkurrencës njofton se ka nisur monitorimin e tregut të karburanteve me shumicë dhe me pakicë, me fokus të veçantë te çmimet e benzinës dhe naftës në pikat e shitjes me pakicë.

Sipas njoftimit zyrtar, të gjitha ndërmarrjet që ushtrojnë veprimtarinë e tregtimit të karburanteve janë aktualisht nën monitorim. Në rast se konstatohet se luhatjet e çmimeve në tregun vendas tejkalojnë masën e ndryshimeve të çmimeve në bursat ndërkombëtare, Autoriteti do të ndërmarrë masat e nevojshme në përputhje me kompetencat e tij.

“Në praktikë, çmimet e karburanteve në tregjet ndërkombëtare përditësohen vazhdimisht, duke reflektuar faktorë si oferta dhe kërkesa, kostot e përpunimit, si edhe zhvillime ekonomike apo gjeopolitike. Për rrjedhojë, pritet që edhe çmimet në tregun vendas të ndjekin të njëjtin drejtim dhe të jenë proporcionale me ndryshimet e regjistruara në bursë. Çdo devijim i pajustifikuar, përfshirë rritje më të shpejta apo më të theksuara se ecuria e çmimeve ndërkombëtare, përbën tregues të mundshëm të sjelljeve jo konkurruese në treg”, thuhet në njoftim.

Autoriteti thekson se nuk do të tolerojë luhatje të pajustifikuara të çmimeve, praktika që bien ndesh me logjikën e tregut ndërkombëtar, si dhe çdo formë koordinimi të çmimeve, abuzimi me pozitën dominuese apo praktika të bashkërenduara mes operatorëve të tregut.

Me këtë proces monitorimi synohet garantimi i transparencës, funksionimi i rregullt i tregut dhe mbrojtja e konsumatorëve nga çmime të padrejta apo sjellje që cenojnë konkurrencën.

Autoriteti sqaron se të gjitha monitorimet dhe procedurat e mundshme hetimore kryhen vetëm në zbatim të ligjit nr. 9121/2003 “Për mbrojtjen e konkurrencës”, pa u ndërthurur me kompetencat e institucioneve të tjera ligjzbatuese në vend.

Rreth 160 predha të mbetura nga Lufta e Dytë Botërore janë zbuluar pranë urës së Vodiçës, në fshatin Vodiçë, Njësia Administrative Kotë, Bashkia Selenicë.
Zbulimi u bë nga një firmë që po kryente punime në zonë, e cila njoftoi menjëherë forcat xheniere për praninë e municioneve të rrezikshme. Ekspertët e xhenios mbërritën në vendngjarje dhe për dy ditë me radhë zhvilluan operacionin për identifikimin dhe largimin e predhave.

Gjatë ditës së djeshme u gjetën dhe u siguruan rreth 140 predha mortaje, ndërsa gjatë ditës së sotme u evidentuan edhe 20 predha të tjera.
Në total, në zonë janë zbuluar 160 predha të Luftës së Dytë Botërore, të cilat janë transportuar nga specialistët për në Tiranë, ku do të kryhen procedurat për asgjësimin e tyre në mënyrë të kontrolluar.

Ndërhyrja e shpejtë e forcave xheniere shmangu çdo rrezik të mundshëm për banorët dhe për punonjësit që po kryenin punimet në këtë zonë.