Rritja e çmimeve të karburanteve, e nxitur nga zhvillimet në Lindjen e Mesme dhe tensionet në tregjet ndërkombëtare të energjisë, po rëndon gjithnjë e më shumë buxhetet familjare në Shqipëri.
Në vendin tonë, një mbushje prej 50 litrash naftë kushtonte rreth 8,750 lekë përpara përshkallëzimit të konfliktit, me një çmim prej rreth 175 lekësh për litër. Kjo shumë përfaqësonte 17.5% të pagës minimale bruto, e cila është 50 mijë lekë.
Në shtator, çmimi tavan i naftës arriti në 219 lekë për litër, duke e çuar koston e 50 litrave në 10,950 lekë. Kjo do të thotë se një furnizim i vetëm i makinës përfaqësonte 21.9% të pagës minimale bruto.
Pra, në vetëm disa muaj, kostoja e së njëjtës sasi karburanti u rrit me 2,200 lekë, ndërsa pesha që ajo zë në pagën minimale u shtua me 4.4 pikë përqindjeje.
Edhe benzina është shtrenjtuar. Me çmimin tavan prej 195 lekësh për litër, 50 litra kushtojnë 9,750 lekë, ose rreth 19.5% të pagës minimale.
Në një krahasim me vende të tjera europiane, diferenca bëhet më e dukshme. Për një mbushje prej 50 litrash naftë, pesha ndaj pagës minimale ishte rreth 15.4% në Bullgari, 13.9% në Letoni, 13.8% në Turqi dhe 12.7% në Rumani, ndërsa në Luksemburg rreth 3.8%.
Në Shqipëri, me çmimin prej 219 lekësh për litër, paga minimale prej 50 mijë lekësh mund të blejë teorikisht rreth 228 litra naftë. Për krahasim, sipas të dhënave të përdorura në analizë, paga minimale në Bullgari blinte rreth 324 litra, ndërsa në Luksemburg rreth 1,311 litra.
Rritja e karburanteve nuk prek vetëm drejtuesit e automjeteve. Nafta është pjesë e kostove të transportit dhe logjistikës, ndaj një rritje e qëndrueshme e saj mund të reflektohet edhe në çmimet e mallrave dhe shërbimeve.
Shifra që tregon më qartë barrën për qytetarët është 21.9%: aq nga paga minimale bruto në Shqipëri nevojitej në shtator për të mbushur një makinë me 50 litra naftë.
