Policia e Fierit ka arrestuar dy drejtues automjetesh për shkelje të qarkullimit rrugor, ndërsa ka nisur procedime penale për disa shtetas të përfshirë në raste aksidentesh, narkotikësh, njoftimi të rremë dhe dëmtim prone.
Në pranga ranë një 41-vjeçar nga Zharrneci i Divjakës, i cili dyshohet se drejtonte mjetin pa leje dhe në gjendje të dehur, duke humbur kontrollin dhe u përplasur me një mur, si dhe një 60-vjeçar nga Fieri, i kapur duke drejtuar automjetin në gjendje të dehur.
Ndërkohë, nisi procedimi penal për një 71-vjeçar nga Zhërrneci, i cili dyshohet se aksidentoi një këmbësore që ndodhet jashtë rrezikut për jetën, si dhe për një 20-vjeçar nga Ballshi që drejtonte automjetin pa leje.
Po ashtu, u proceduan penalisht dy persona pasi iu gjetën doza të dyshuara kanabisi gjatë kontrollit fizik.
Në një tjetër rast, një 39-vjeçar nga Patosi u procedua për njoftim të rremë në sallën operative, ndërsa një 57-vjeçar nga Divjaka akuzohet për dëmtim të të mbjellave në tokën e një shtetasi tjetër.
Materialet i kaluan Prokurorisë së Fierit për veprime të mëtejshme.
