Shqipëria pritet të hedhë një tjetër hap drejt përdorimit të drejtpërdrejtë të gazit që transportohet përmes gazsjellësit TAP. Projekti “Fier South Exit Point”, që parashikon krijimin e një pike daljeje të gazit në Fier, synohet të përfundojë në tremujorin e katërt të vitit 2027.
Sipas agjencisë azerbajxhanase Report.az, e cila citon kompaninë TAP AG, në kuadër të projektit do të ndërtohet një impiant për matjen e gazit dhe uljen e presionit pranë stacionit ekzistues të kompresorëve ACS03 në Fier.
Objekti do të shërbejë si pikë lidhëse mes gazsjellësit TAP dhe infrastrukturës shqiptare të gazit, duke mundësuar që gazi i transportuar përmes TAP-it të dalë nga sistemi i transmetimit dhe të përdoret për nevojat e tregut vendas.
Pas përfundimit të punimeve, objekti pritet t’i dorëzohet shtetit shqiptar dhe të menaxhohet nga pala shqiptare.
Pika e daljes në Fier konsiderohet një komponent i rëndësishëm për zhvillimin e infrastrukturës së gazit në Shqipëri, pasi krijon lidhjen e nevojshme mes TAP-it dhe rrjetit të ardhshëm kombëtar të transmetimit dhe shpërndarjes së gazit.
Sipas afatit të parashikuar nga TAP AG, impianti synohet të jetë i përfunduar dhe funksional deri në fund të vitit 2027.
