Çmimi i naftës po shënon një tjetër javë rritjeje, i nxitur nga frika për një ndërprerje të zgjatur të furnizimeve përmes Ngushticës së Hormuzit, pas përshkallëzimit të tensioneve mes SHBA-së dhe Iranit.
Nafta Brent është ngjitur pranë 96 dollarëve për fuçi, me një rritje ditore rreth 0.3% dhe mbi 7% gjatë javës. Ndërsa WTI amerikan tregtohet rreth 92 dollarë për fuçi, duke regjistruar një rritje prej afërsisht 0.6%.
Tregjet po reagojnë me shqetësim ndaj zhvillimeve të fundit ushtarake në Lindjen e Mesme. Sulmet amerikane janë pasuar nga kundërpërgjigjja iraniane ndaj bazave amerikane në rajon, ndërsa tensionet janë shtrirë edhe në trafikun detar në Hormuz.
Ngushtica, përmes së cilës kalon një pjesë e konsiderueshme e tregtisë botërore të naftës, është kthyer sërish në pikën kryesore të shqetësimit për tregjet energjetike.
Nëse qarkullimi i tankerëve vijon të pengohet, analistët paralajmërojnë se presioni mbi çmimet mund të shtohet edhe më tej. Ndërkohë, mundësia e rifillimit të operacioneve ushtarake nga Izraeli mbetet një tjetër faktor që ushqen pasigurinë në tregjet ndërkombëtare.
