Përplasjet mes protestuesve dhe forcave të policisë jashtë ambienteve të Kuvendit kanë sjellë shoqërimin në komisariat të disa personave, mes tyre edhe Dritan Goxhaj.
Sipas informacioneve paraprake, tensionet u regjistruan pas përfundimit të seancës plenare, kur një grup protestuesish tentoi të bllokonte hyrje-daljet e Kuvendit. Gjatë incidenteve, disa prej protestuesve kanë goditur me vezë edhe deputetë që po largoheshin nga godina e Parlamentit.
Policia ndërhyri për shpërndarjen e turmës dhe shoqëroi disa persona për verifikime dhe procedura të mëtejshme. Deri tani nuk ka informacion zyrtar për akuza konkrete apo për persona të lënduar nga incidenti.
Situata jashtë Kuvendit mbeti e tensionuar për disa minuta, ndërsa forca të shumta policie u vendosën në perimetrin e sigurisë për të shmangur përshkallëzimin e protestës.
