Platforma qeveritare e-Albania ka hyrë në një fazë të re transformimi digjital me prezantimin e versionit më të fundit, “e-Albania 2.0”. Platforma, e cila prej vitesh përdoret gjerësisht nga qytetarët shqiptarë për marrjen e shërbimeve publike online, tashmë vjen me infrastrukturë të modernizuar dhe dizajn të ri, me synimin për të ofruar një eksperiencë më të shpejtë, më praktike dhe më efikase për qytetarët dhe bizneset.
Sipas postimit të kryeministrit Edi Rama në Facebook, një nga elementët kryesorë të “e-Albania 2.0” është fokusimi te aksesueshmëria dhe gjithëpërfshirja. Platforma është përshtatur për t’u përdorur më lehtë edhe nga personat me aftësi të kufizuara, duke synuar krijimin e një shërbimi publik digjital pa barriera dhe të barabartë për të gjithë qytetarët.
Të dhënat e publikuara tregojnë rritjen e vazhdueshme të përdorimit të shërbimeve online në vend. Vetëm gjatë muajit prill janë realizuar mbi 44.7 milionë transaksione në e-Albania, ndërsa numri i përdoruesve të regjistruar në portal ka arritur në rreth 3.48 milionë.
Aktualisht, platforma ofron 1,279 shërbime elektronike, që përfshijnë dokumente personale, aplikime administrative, certifikata, pagesa dhe procedura të ndryshme shtetërore. Digjitalizimi i këtyre proceseve ka reduktuar ndjeshëm nevojën për paraqitje fizike në institucionet publike, duke kursyer kohë dhe procedura burokratike për qytetarët dhe bizneset.
Një tjetër tregues i zgjerimit të shërbimeve digjitale është edhe numri i dokumenteve me vulë elektronike, i cili gjatë këtij muaji ka kaluar 962 mijë. Përdorimi në rritje i dokumenteve elektronike po forcon besimin te shërbimet online dhe po përshpejton procesin e digjitalizimit të administratës publike në vend.
Modernizimi i e-Albania konsiderohet një hap i rëndësishëm drejt ndërtimit të një administrate më moderne dhe më efikase, në një kohë kur teknologjia dhe shërbimet digjitale po marrin një rol gjithnjë e më të madh në jetën e përditshme të qytetarëve.
