Sigurimi i banesave në Shqipëri mbetet në nivele shumë të ulëta, edhe pse vendi përballet shpesh me tërmete, përmbytje dhe zjarre. Aktualisht, më pak se 6% e banesave janë të siguruara, një tregues që nxjerr në pah mungesën e mbrojtjes financiare për shumicën e familjeve.
Sipas të dhënave zyrtare, në vend numërohen mbi 1.08 milion banesa (Censi 2023), ndërkohë që numri i kontratave të sigurimit të pronës ka arritur në rreth 63 mijë në fund të vitit 2025. Krahasuar me vitin 2020, kur regjistroheshin rreth 47 mijë kontrata, rritja është e pranishme, por mbetet e ngadaltë dhe e pamjaftueshme për të mbuluar nevojat reale.
Një faktor që rrit më tej rrezikun është edhe mosha e ndërtesave. Rreth 63% e banesave janë më të vjetra se 30 vite: 26.1% janë ndërtuar para vitit 1981 dhe 37.5% në periudhën 1981–2000. Vetëm 36.4% e banesave janë ndërtuar pas vitit 2001, çka nënkupton se një pjesë e madhe e stokut është më e ekspozuar ndaj dëmtimeve.
Në praktikë, sigurimi i pronës mbetet i detyrueshëm vetëm për qytetarët që blejnë banesa me kredi bankare. Për pjesën tjetër, ai është vullnetar dhe shpesh anashkalohet. Edhe sigurimi 10-vjeçar që ofrohet nga ndërtuesit mbulon vetëm defektet strukturore dhe jo rreziqe si zjarri apo përmbytjet.
Ndërkohë, institucionet po shqyrtojnë vendosjen e një skeme të detyrueshme sigurimi për fatkeqësitë natyrore. Sipas draftit në diskutim, sigurimi do të përfshijë të gjithë pronarët dhe primi do të përcaktohet në bazë të rrezikut sizmik dhe ekspozimit ndaj përmbytjeve.
Shifrat tregojnë qartë hendekun mes rrezikut real dhe nivelit të mbrojtjes, duke theksuar nevojën për politika më të forta dhe ndërgjegjësim më të lartë publik.
