Kuvendi shpenzoi 200 mln lekë për përfitimet e deputetëve në 2025, 44.2% e shpenzimeve operative
Kuvendi i Shqipërisë ka publikuar analizën e zbatimit të buxhetit për vitin 2025, ku rezulton se një pjesë e konsiderueshme e shpenzimeve operative është dedikuar për përfitimet financiare të deputetëve.
Sipas raportit, rreth 200 milionë lekë, ose 44.2% e totalit të shpenzimeve operative, janë përdorur për përfitime që burojnë nga “Statusi i Deputetit”. Këto përfshijnë rimbursime për telefon, karburant, dieta brenda vendit, honorare për pjesëmarrje në komisione parlamentare dhe mbulimin e qirasë për deputetët që nuk banojnë në Tiranë.
Ndërkohë, 60 milionë lekë janë shpenzuar për udhëtime jashtë shtetit, duke përfshirë bileta, dieta dhe akomodim, një zë që Kuvendi e cilëson si “të konsiderueshëm” në kuadër të shpenzimeve operative.
Buxheti i institucionit është ndarë në dy programe kryesore: atë të veprimtarisë legjislative dhe një program mbështetës për administrimin. Programi legjislativ zë peshën më të madhe dhe përfshin pagat, kontributet, përfitimet e deputetëve, si dhe shpenzimet për aktivitete ndërkombëtare dhe ekspertizë të jashtme.
Pagat dhe kontributet shoqërore arrijnë në rreth 1.2 miliardë lekë, ndërsa përbërja e stafit ndahet në: 32% deputetë, 14% staf politik, 44% nëpunës civilë dhe 10% punonjës mbështetës.
Në kategorinë e shpenzimeve operative përfshihen gjithashtu:
- 11 milionë lekë për ekspertë të jashtëm
- 16 milionë lekë për ekzekutime vendimesh gjyqësore dhe mirëmbajtje sistemesh
- 49 milionë lekë për shpenzime të ndryshme operative
- 14 milionë lekë për mirëmbajtje zyrash
- 28 milionë lekë për ujë, energji, transport dhe kancelari
Gjatë vitit 2025, Kuvendi ka realizuar edhe investime në teknologji, ku veçohen:
- 30 milionë lekë për transkriptim audio-video me inteligjencë artificiale
- 5.6 milionë lekë për sistem ndërveprimi me publikun
- 1.2 milionë lekë për aplikacionin “Kuvendi i Shqipërisë”
Po ashtu, janë blerë dy automjete me vlerë 14.5 milionë lekë dhe janë investuar 23 milionë lekë për pajisje dhe arredim zyrash.
BIRN
