Presidenti amerikan Donald Trump është shprehur optimist për një përfundim të afërt të konfliktit, ndërsa kryeministri izraelit Benjamin Netanyahu ka paralajmëruar zgjerim të mëtejshëm të operacioneve ushtarake në rajon.
Netanyahu deklaroi se Izraeli do të vijojë sulmet ndaj Iranit dhe në Liban, duke theksuar se synimi është dobësimi i kapaciteteve strategjike të kundërshtarëve. Ai u shpreh se po goditen programet raketore dhe bërthamore, ndërsa po shtohen goditjet ndaj Hezbollahut.
Tensionet në Lindjen e Mesme janë rritur ndjeshëm pas sulmeve të ndërmarra nga Shtetet e Bashkuara dhe Izraeli ndaj Iranit. Megjithatë, Trump ka lënë të kuptohet se ekziston ende një mundësi reale për arritjen e një marrëveshjeje me Teheranin.
Ndërkohë, presidenti amerikan ka urdhëruar shtyrjen e sulmeve ndaj termocentraleve dhe infrastrukturës energjetike iraniane, duke sinjalizuar përpjekje për uljen e tensioneve dhe hapjen e rrugës për negociata.
