Socialistët mblidhen të shtunën në Durrës, fokusi te organizimi i brendshëm dhe zgjedhjet në parti
E shtuna e kësaj jave nuk pritet të jetë pushim për socialistët, pasi është thirrur mbledhja e radhës e Asamblesë Kombëtare në Durrës, në orën 10:00.
Njoftimi u është dërguar anëtarëve të Asamblesë, ndërsa mbledhja ishte paralajmëruar më herët nga Edi Rama gjatë takimit të fundit të kryesisë së Partisë Socialiste. Sipas tij, fokusi kryesor tashmë do të jetë tek organizimi i brendshëm i partisë.
Rama u ka kërkuar strukturave socialiste të angazhohen në një dialog të gjerë dhe të përgatiten për zgjedhjet e brendshme në nivel organizatash.
Sipas burimeve, edhe pse ende nuk është publikuar një agjendë zyrtare, mbledhja pritet të hapet nga Sekretari i Përgjithshëm i PS-së, Blendi Klosi, ndërsa më pas fjalën do ta marrë kryesocialisti dhe njëkohësisht Kryeministri, Edi Rama.
