Situata alarmante në Gramsh – Evakuohen edhe 3 fshatra të tjerë, 1 viktimë dhe 6 të plagosur
Zjarret masive që kanë përfshirë prej disa ditësh zonën e Gramshit kanë marrë përmasa alarmante, duke detyruar autoritetet të urdhërojnë evakuimin e tre fshatrave të tjerë: Ërmenj, Harunas dhe Zenelas.
Ministria e Mbrojtjes u ka bërë thirrje banorëve të largohen menjëherë nga banesat dhe të bashkëpunojnë me forcat e emergjencës për një evakuim të sigurt.
Nën pushtetin e flakëve ndodhen tashmë fshatrat Skënderbegasi, Kullollas, Bletëz, Menkollar, Shimër, Ërmenj, Harunas, Zenelas, Spanesh dhe Kazie.
Bilanci paraprak është i rëndë: 6 persona të plagosur dhe 1 viktimë – një 80-vjeçar që dyshohet të jetë autori i zjarrvënies. Ai ka humbur jetën mes flakëve.
Ndërhyrja nga ajri me helikopterë të ushtrisë ka nisur, por operacioni vështirësohet nga terreni i pyllëzuar, era e fortë dhe temperaturat e larta që favorizojnë përhapjen e shpejtë të zjarrit.
Autoritetet mbeten në gatishmëri të plotë, ndërsa situata vijon të jetë kritike.
