Pamjet që janë shpërndarë ne disa faqe ne rrjetet sociale apo media si “dëshmi ndotjeje me naftë” pranë grykëderdhjes së Vjosës, në të vërtetë tregojnë një ligatinë të cekët, tipike për zonat bregdetare ku uji përzihet me rërë deti, bimësi nënujore dhe sedimente natyrore.
Kjo është arsyeja pse uji duket i errët nga sipër, sidomos në verë kur dielli përthan sipërfaqen dhe ul nivelin e ujit, duke nxjerrë më shumë në pah algat dhe shtresat organike në fund.

Ky fenomen natyror krijon lehtësisht idenë e njollave të naftës kur shihet nga lart, por nuk ka lidhje me derdhje hidrokarburesh.

Nëse shihet më me kujdes, uji i grykëderdhjes vetë është i pastër dhe i kaltër, pa gjurmë ndotjeje të dukshme për syrin e lirë. Ajo që është quajtur “shenjë ndotjeje” është thjesht një pjesë e peizazhit natyror, që çdo verë merr këtë pamje për shkak të veçorive të lagunës.

Ky nuk është “zbulim”, por një keqinterpretim i nxituar. Para se të alarmohet publiku me lajme të pasakta, mediat duhet te bëjne dallimin dhe investigimin mes ndotjes reale dhe fenomeneve natyrore që ngatërrohen lehtë me të.

Gabime ndodhin — por ky gabim meriton të pranohet dhe të sqarohet nga mediat qe e kane publikuar duke akuzuar edhe deputeten e PS Fier Antoneta Dhima per publikimin e pamjeve Neoalb

Qarku Fier

Identifikohen dhe procedohen penalisht 3 autorët e dyshuar të zjarrëvënieve në fshatrat 📍Drenovë, 📍Suk 2 dhe 📍Frakull e Madhe.

Si rezultat i hetimeve dhe veprimeve të tjera procedurale, të kryera menjëherë pas njoftimeve për vatra zjarri në këto fshatra, shërbimet e komisariateve të Policisë Mallakastër dhe Fier referuan materialet në Prokurori, ku filloi procedimi penal për shtetasit:
E. V., 70 vjeç, banues në fshatin Drenovë;
Xh. R., 59 vjeç, banues në fshatin Suk 2;
R. Ç., 48 vjeçe, banuese në fshatin Frakull e Madhe.

Nga hetimet dyshohet se si pasojë e përhapjes së flakëve të zjarreve që këta 3 shtetas kanë ndezur në tokat e tyre, për djegien e mbeturinave, janë djegur sipërfaqe pyjore, si dhe sipërfaqe të mbjella me vreshta dhe pemë frutorë.

Materialet procedurale iu referuan Prokurorisë së Fierit, për veprime të mëtejshme.

Drejtoria Vendore e Policisë Fier apelon për të gjithë qytetarët, që në asnjë rast të mos ndezin zjarre me qëllim apo nga pakujdesia, pasi do të përballen me ligjin. Policia fton qytetarët që të denoncojnë në numrin 112, çdo rast të kësaj veprimtarie kriminale dhe të paligjshmërive në tërësi, dhe iu garanton anonimat, reagim të shpejtë dhe të paanshëm.

Një banesë dykatëshe është përfshirë nga flakët paraditen e sotme në Çeligrad të Fierit, duke alarmuar jo vetëm familjarët por edhe fqinjët. Në vendngjarje kanë mbërritur menjëherë shërbimet zjarrfikëse të cilat kanë bërë të mundur neutralizimin e tyre.

Skerdi Tase, i njohur si pjesë e grupit të vrasësve me pagesë të Nuredin Dumanit, ka dëshmuar këtë të martë për herë të parë në cilësinë e bashkëpunëtorit të drejtësisë Skerdi Tase, në procesin “Plumbi i artë”Më herët kanë dëshmuar në këtë proces të penduarit Nuredin Dumani dhe Erion Alibej.

Pyetet nga prokurori i SPAK-ut, Behar Dibra, për atentatin në vitin 2017 ndaj tregtarit të vajrave Aredin Behari.

Skerdi Tase: “Me Henkrik Hoxhaj jam njohur nga një shok i përbashkët. Ky shtetas Viron Tavanxhiu na foli për një atentat që do i bëhej një personi në Fier. Henriku kishte siguruar një makinë, armët dhe i ishin vënë në ndjekje të këtij personi.

Ditën e ekzekutimit Henriku më tha se porositësi e kishte marrë në telefon dhe i kishte thënë “Pse po e vononi atë punë?” I shkuam në lokal për ta qëlluar, por u fut poshtë tavolinës e më pas brenda në lokal. Nuk u futa më tej se isha pa doreza.

Vironi më ka kontaktuar edhe për të bërë vrasjen e Agim Boriçit po në qytetin e Fierit. U realizuan veprimet në vitin 2018. Me Henrikun takoheshim përditë për të bërë planet.

Riku më tha se kishte marrë dhe një punë tjetër për Aredin Beharin”.

30 forca të ushtrisë i kanë ardhur në ndihmë mëngjesin e sotëm operacionit të përbashkët të shërbimeve zjarrfikëse dhe atyre bashkiake, për shuarjen e zjarrit në Drenovë të Mallakastrës.

Vatra e zjarrit vijon të jetë aktive dhe është shtrirë në një sipërfaqe të madhe në brendësi të pyllit me pisha.

Aktualisht po punohet me mjete rrethanore për shkak të terrenit të vështirë që pamundëson ndërhyrjen e mjeteve zjarrfikëse ndërsa pritet sërish ndërhyrje nga ajri për të vënë nën kontroll flakët.

Bankers Petroleum Albania Emëron Kryetarin e Bordit Mbikëqyrës dhe Bashkëkryetarin për të Mbështetur Vazhdimësinë e Bashkëpunimit me Autoritetet Shtetërore
Bankers Petroleum Albania ka emëruar z. Andrija Kojaković si Kryetar të Bordit Mbikëqyrës dhe Bashkëkryetar, I cili mbart një karrierë të spikatur në pozicione drejtuese të sektorit të energjisë, diplomaci dhe këshillim strategjik.
Z. Kojaković do të ketë një rol qendror në mbikqyrjen e angazhimit të kompanisë me autoritetet shqiptare dhe në mbështetjen për një sqarim të plotë të situatës aktuale.
Z. Kojaković mbart një përvojë të spikatur në poste drejtuese në sektorin e naftës dhe gazit në Ballkan, përfshirë periudhën kur ka qenë Drejtor Ekzekutiv i kompanisë kroate INA d.d. (1995–1997), ku ka udhëhequr nismat e rëndësishme për ristrukturim financiar dhe ligjor. Ai gjithashtu ka shërbyer si Ambasador i Republikës së Kroacisë në disa shtete kyçe (përfshirë Kinën dhe Mbretërinë e Bashkuar), si dhe si Anëtar Bordi në Bankën Evropiane për Rindërtim dhe Zhvillim (BERZH), ku ka këshilluar për zhvillimin ekonomik dhe qeverisjen. Në sektorin privat, ai themeloi dhe drejtoi Central European Oil Company, e mbështetur nga institucione të rëndësishme financiare ndërkombëtare.
Emërimi i tij përforcon angazhimin tonë për menaxhim të fortë, transparencë dhe udhëheqje të përgjegjshme ndërsa ecim përpara.
Ndërkohë, operacionet tona mbeten të qëndrueshme. Ne kemi riformuar ekipin tonë kryesor dhe punonjësit tanë janë duke u mbështetur në mënyrë të plotë. Aktivitetet e përditshme vazhdojnë pa ndërprerje të mëdha, falë drejtimit të inxhinierëve shumë të kualifikuar dhe me përvojë që po e çojnë kompaninë përpara.
Bankers Petroleum Albania mbetet plotësisht bashkëpunues me të gjitha institucionet dhe autoritetet përkatëse. Ne jemi të përkushtuar ndaj një dialogu konstruktiv dhe përputhshmërisë së plotë gjatë gjithë këtij procesi, duke vazhduar njëkohësisht të kontribuojmë në sigurinë e sektorit të energjisë dhe zhvillimin afatgjatë të Shqipërisë.