Operatori i Sistemit të Shpërndarjes (OSSH) ka hapur tenderin me një fond limit prej rreth 55 milionë lekësh për furnizimin dhe instalimin e matësve inteligjentë në 67 nënstacione elektrike në Shqipëri. Ky projekt synon modernizimin dhe përmirësimin e sistemit të matjes së energjisë elektrike, duke zëvendësuar matësit e vjetër që nuk garantojnë më saktësi dhe besueshmëri.

Matësit e rinj do të pajisen me teknologji të avancuar që mundësojnë lexim dhe regjistrim në kohë reale të të dhënave për çdo fider në nënstacionet përkatëse. Të dhënat do të transmetohen automatikisht në sistemin e Menaxhimit të Matjes së Avancuar (AMI) të OSSH-së, duke përmirësuar monitorimin, kontrollin dhe eficiencën e rrjetit të shpërndarjes.

Përveç furnizimit dhe montimit, kontrata përfshin testimin dhe vënien në punë të pajisjeve sipas standardeve evropiane të sigurisë, cilësisë dhe mbrojtjes së mjedisit, me markimin CE. Pajisjet e reja pritet të përmirësojnë reagimin ndaj defekteve dhe dëmtimeve, duke reduktuar kohën e ndërprerjes së energjisë për abonentët.

OSSH njofton se furnizimi do të bëhet me teknologjinë më të fundit, duke garantuar efikasitet dhe jetëgjatësi të pajisjeve. Ky investim është pjesë e përpjekjeve për të modernizuar rrjetin elektrik dhe për të përmirësuar cilësinë e shërbimit ndaj konsumatorëve.

Fier – Zëvendëskryeministrja dhe Ministrja e Infrastrukturës dhe Energjisë, Belinda Balluku, së bashku me Kryetarin e Bashkisë Fier, Armando Subashi, kanë inspektuar disa zona të qytetit ku hapësirat publike janë të zëna në mënyrë të paligjshme dhe do të çlirohen, në kuadër të nismës kombëtare për rikthimin e tyre në përdorim nga qytetarët.

-Gjatë vizitës në Fier, u promovua gjithashtu shërbimi “Zyra me një Ndalesë”, ku qytetarët, e veçanërisht të moshuarit , mund të marrin asistencë falas për përfitimin e dokumenteve dhe shërbimeve përmes portalit e-Albania.

-Autoritetet theksuan se asnjë qytetar nuk duhet të paguajë për shërbimet e e-Albania, pasi ofrimi i tyre nga zyrat e noterëve apo avokatëve kundrejt pagesës është shkelje ligjore dhe do të ndëshkohet.

-Të dyja këto nisma synojnë përmirësimin e jetës urbane dhe garantimin e aksesit të barabartë në shërbimet publike për të gjithë qytetarët.

Zjarri që ka përfshirë zonën e Drenovës në Mallakastër është përshkallëzuar ndjeshëm, duke u kthyer në një emergjencë serioze. Flakët janë përhapur me shpejtësi për shkak të erërave të forta, duke përfshirë një sipërfaqe të madhe pyjesh dhe kullotash.

Forca zjarrfikëse nga disa bashki të qarkut Fier, si dhe trupa të ushtrisë dhe të kompanisë Albpetrol, janë angazhuar në përpjekje të pandërprera për shuarjen e zjarrit. Ndërhyrjet nga ajri me helikopterë nuk kanë arritur ta ndalojnë përparimin e flakëve, që mbeten jashtë kontrollit.

Emergjencat civile kanë vënë theksin tek rreziku në rritje që i kanoset zonave të banuara, ndërsa mundësia e evakuimit të popullsisë në disa lagje të afërta nuk përjashtohet nëse situata vijon të përkeqësohet.

Autoritetet lokale u bëjnë thirrje banorëve për bashkëpunim dhe vigjilencë të shtuar. Ndërkohë, strukturat e mbrojtjes civile janë në gatishmëri të lartë për çdo zhvillim të mëtejshëm.

Gjykata e Apelit të Posaçëm ka rrëzuar kërkesën e Ilir Metës për lehtësimin e masës së sigurisë, duke lënë në fuqi vendimin për “arrest me burg”. Ish-presidenti dhe kreu i Partisë së Lirisë do të vazhdojë të qëndrojë në qeli, pas vendimit të dhënë sot nga trupa gjykuese.

Meta kërkonte zëvendësimin e masës me një më të butë, si “arrest në shtëpi” apo “detyrim për paraqitje”, duke e cilësuar masën aktuale si të padrejtë dhe me prapavijë politike, por Apeli i Posaçëm konfirmoi masën e sigurisë të vendosur më herët nga GJKKO.

Ilir Meta dhe ish-bashkëshortja e tij, Monika Kryemadhi, janë marrë të pandehur nga SPAK për një sërë veprash penale, përfshirë korrupsionin, pastrimin e parave dhe fshehjen e pasurisë. Meta ndodhet në paraburgim që prej 21 tetorit 2024.

Kryeministri Edi Rama, përmes një postimi në rrjetet sociale, bëri të ditur se një prej lejeve dhënë ndaj një biznesi është anuluar, ndërsa paralajmëroi se do të ndiqet një qasje me zero tolerancë ndaj rasteve të ngjashme në të gjithë vendin.

“Për të gjitha këto lloj çmendurish me qëllim fitimi në kurriz të komunitetit, të cilat kanë marrë dokument legalizimi në hapësirën publike duke ngritur tenda hekuri, jo vetëm që do të reagohet me zero tolerancë duke i anulluar ligjërisht, por do të miratohet së shpejti, si pjesë e reformës së re të kontrollit të territorit edhe një masë për ndëshkimin penal të të gjithë atyre nëpunësve të Aluiznit dje apo të Kadastrës më pas, që kanë firmosur për këto legalizime kriminale në mes të lagjeve të qyteteve tona”, shkruan Rama

Qeveria ka miratuar vendimin për hapjen e pikës së kalimit kufitar në Aeroportin Ndërkombëtar të Vlorës, duke i hapur rrugë funksionimit të plotë të aeroportit për qarkullimin ndërkombëtar të shtetasve.

Vendimi është marrë në mbështetje të ligjit “Për kontrollin kufitar” dhe me propozim të Ministrit të Brendshëm. Sipas dokumentit zyrtar, pika kufitare do të jetë e dedikuar për qarkullimin ajror ndërkufitar, duke mundësuar kështu operimin e rregullt të fluturimeve ndërkombëtare.

Ky zhvillim përbën një hap të rëndësishëm në drejtim të vënies në funksion të plotë të një prej investimeve më strategjike në jug të vendit.

Për zbatimin e këtij vendimi janë ngarkuar Ministria e Brendshme, Ministria e Infrastrukturës dhe Energjisë, Ministria e Financave si dhe Ministria e Bujqësisë dhe Zhvillimit Rural.

Vendimi do të hyjë në fuqi pas botimit në Fletoren Zyrtare.

Aeroporti i Vlorës u certifikua më 8 maj 2025, me uljen e avionit të parë në pistë. Ky aeroport pritet të shndërrohet në një nga portat kryesore hyrëse të jugut të Shqipërisë dhe të japë një shtysë të re për zhvillimin e turizmit dhe ekonomisë në rajon.

Një zjarr i përmasave të mëdha ka përfshirë fshatin Drenovë në Mallakastër, duke rrezikuar seriozisht zonat përreth. Flakët janë përhapur me shpejtësi në një sipërfaqe të gjerë dhe tashmë po i afrohen një pusi nafte, një magazine dhe një nënstacioni elektrik, duke e bërë situatën tejet të rrezikshme.

Në errësirë dhe nën rrezikun e flakëve, shërbimet zjarrfikëse lokale janë në gatishmëri të plotë, duke u përpjekur të frenojnë përparimin e zjarrit. Ndërkohë, pritet mbërritja e përforcimeve nga strukturat e Albpetrolit për të ndihmuar në kontrollimin e situatës kritike.

Operacioni i shuarjes së flakëve po zhvillohet me mjete rrethanore dhe me angazhimin e forcave në këmbë, ndërsa banorët janë të alarmuar për sigurinë e banesave dhe pasurive të tyre. Autoritetet lokale kanë bërë thirrje për kujdes të shtuar dhe bashkëpunim të qytetarëve me strukturat e emergjencës.