Një aeroplan që fluturonte nga Omaha për në Detroit u detyrua të bënte një ulje emergjente pasi një pasagjer shqiptar u përpoq të hapte njërën nga dyert.

Fluturimi 3612 i Delta Connection, i operuar nga SkyWest Airlines, u detyrua të devijonte në Aeroportin Lindor të Ajovës në Cedar Rapids, Ajova, sipas CNN.

Siç raportojnë mediat amerikane, Mario Nikprelaj, 23 vjeç, nga Nebraska, siç u identifikua, dyshohet se ishte grindur më parë me një asistente fluturimi dhe ishte përpjekur të hapte një derë daljeje emergjence.

“Më 17 korrik 2025, afërsisht në orën 6:13 pasdite, Policia e Cedar Rapids u dërgua në Aeroportin Lindor të Ajovës pas një shqetësimi gjatë fluturimit nga një pasagjer në një fluturim SkyWest nga Omaha në Detroit”, tha Departamenti i Policisë së Cedar Rapids në Facebook.

Nikprelaj u dërgua në Qendrën Korrektuese të Qarkut Linn dhe u akuzua për sjellje të çrregullt, sulm, posedim të barnave me recetë dhe ngacmim të shkallës së parë, me akuza të tjera që nuk përjashtohen.

Aeroplani përfundimisht u ul në destinacionin e tij në Detroit, gati një orë e gjysmë më vonë se sa ishte planifikuar, sipas Flight Aware.

Një ngjarje tragjike ka ndodhur këtë të enjte në fshatin Labinot-Fushë të Elbasanit, ku dy fëmijë të mitur kanë humbur jetën pasi u mbytën në lumin Shkumbin.

Sipas burimeve paraprake, fëmijët ndodheshin pranë lumit duke ruajtur bagëtitë bashkë me një familjar, kur vendosën të laheshin për shkak të vapës. Por rrjedha e fortë dhe terreni i rrezikshëm bënë që ata të mos mund të dilnin më në breg. Pavarësisht ndërhyrjes së banorëve dhe forcave të emergjencës, trupat e pajetë të të miturve u gjetën pak më vonë në një kanal të lumit, disa metra më poshtë.

Ngjarja ka tronditur thellë komunitetin lokal, ndërsa familjarët ndodhen në gjendje të rënduar psikologjike. Të afërm dhe bashkëfshatarë janë mbledhur për t’u dhënë mbështetje prindërve të viktimave.

Autoritetet kanë nisur hetimet për të zbardhur plotësisht rrethanat e kësaj tragjedie. Kjo është një tjetër ngjarje që sjell në vëmendje mungesën e masave të sigurisë për fëmijët në afërsi të ujërave, veçanërisht gjatë muajve të nxehtë të verës.

Shqipëria po përballet me një valë zjarresh intensive, teksa vetëm gjatë 24 orëve të fundit janë raportuar 24 vatra në të gjithë vendin. Aktualisht, katër prej tyre mbeten aktive në qarqet Dibër, Fier dhe Vlorë, me dëme të konsiderueshme në sipërfaqe të mëdha toke.

Sipas raportimeve nga Emergjencat Civile, në total janë djegur mbi 154 hektarë me shkurre dhe bimësi, si dhe më shumë se 3,000 rrënjë ullinj. Në terren janë angazhuar 57 mjete zjarrfikëse, 538 forca operacionale, si dhe 2 helikopterë që ndërhynë nga ajri ditën e djeshme. Ndërkohë, që prej orës 06:00 të mëngjesit të sotëm, 50 trupa të Forcave të Armatosura dhe pesë automjete zjarrfikëse me personel janë vendosur në zonat më problematike.

Zjarri më i përhapur vijon të jetë në Parkun Kombëtar të Lurës në Dibër, ku dy vatra janë ende aktive – njëra në afërsi të Gurë Lurës dhe tjetra pranë kanalit të ujit të HEC-it, e cila po monitorohet. Një vatër tjetër në krahun e Malit të Dejës po përhapet me shpejtësi drejt bashkisë Mat.

Në Bulqizë, në zonën e Malit të Peladhisë, flakët kanë përfshirë rreth 32 hektarë, ndërsa një vatër aktive mbi fshatin Vlash po mbahet nën kontroll.

Në Fier dhe Mallakastër, zjarri në zonën Drenovë–Gorishovë vijon të jetë sfidues për shkak të erës dhe terrenit të thyer, duke rrezikuar ullishtet e fshatit Gorishovë.

Në Borsh të Himarës, flakët që përfshinë një sipërfaqe pyjore nuk janë izoluar plotësisht, megjithëse puna vijon me mbështetjen e ushtrisë.

Instituti i Gjeoshkencave njofton se nuk priten reshje, ndërsa rreziku për zjarre mbetet i lartë në qarqet Tiranë, Elbasan, Fier, Berat, Korçë dhe Gjirokastër. Strukturat e Mbrojtjes Civile janë në gatishmëri të plotë për të parandaluar përhapjen e mëtejshme.

Natyra i erdhi në ndihmë fshatit Drenovë në Mallakastër për të shuar vatrat e zjarrit të cilat gjatë ditës së djeshme rrezikuan puset e naftës dhe nënstacionin elektrik në këtë fshat.Shirat e rëna pas mesnatës në shuan flakët veçanërisht në ato vende ku terreni për ndërhyrjen e mjeteve zjarrfikëse ishte i pamundur.

Burimet bëjnë me dije se vatrat aktive aktualisht janë me intensitet të ulet dhe situata është nën kontroll.

Një ngjarje e rëndë me armë zjarri ka ndodhur pasditen e sotme në lagjen nr. 4 të Sarandës, pranë stadiumit të qytetit, ku dy persona kanë mbetur të plagosur rëndë.

Sipas burimeve zyrtare, të plagosur kanë mbetur shtetasit Ernest Lama, 24 vjeç dhe Gëzim Hoxhaj, 32 vjeç. Fillimisht ata kanë marrë ndihmën e parë në spitalin e Sarandës dhe më pas janë transportuar drejt spitalit të Traumës në Tiranë për trajtim të specializuar.

Ngjarja ndodhi rreth orës 15:00, ndërsa rrethanat dhe motivet e atentatit mbeten ende të paqarta. Policia është në vendngjarje dhe ka nisur hetimet nën drejtimin e Prokurorisë Sarandë, me qëllim identifikimin e autorit, si dhe zbardhjen dhe dokumentimin ligjor të plotë të kësaj ngjarjeje.

Hetimet vijojnë me intensitet, ndërkohë që zona ku ndodhi plagosja është e rrethuar nga forcat e rendit.

Operatori i Sistemit të Shpërndarjes (OSSH) ka hapur tenderin me një fond limit prej rreth 55 milionë lekësh për furnizimin dhe instalimin e matësve inteligjentë në 67 nënstacione elektrike në Shqipëri. Ky projekt synon modernizimin dhe përmirësimin e sistemit të matjes së energjisë elektrike, duke zëvendësuar matësit e vjetër që nuk garantojnë më saktësi dhe besueshmëri.

Matësit e rinj do të pajisen me teknologji të avancuar që mundësojnë lexim dhe regjistrim në kohë reale të të dhënave për çdo fider në nënstacionet përkatëse. Të dhënat do të transmetohen automatikisht në sistemin e Menaxhimit të Matjes së Avancuar (AMI) të OSSH-së, duke përmirësuar monitorimin, kontrollin dhe eficiencën e rrjetit të shpërndarjes.

Përveç furnizimit dhe montimit, kontrata përfshin testimin dhe vënien në punë të pajisjeve sipas standardeve evropiane të sigurisë, cilësisë dhe mbrojtjes së mjedisit, me markimin CE. Pajisjet e reja pritet të përmirësojnë reagimin ndaj defekteve dhe dëmtimeve, duke reduktuar kohën e ndërprerjes së energjisë për abonentët.

OSSH njofton se furnizimi do të bëhet me teknologjinë më të fundit, duke garantuar efikasitet dhe jetëgjatësi të pajisjeve. Ky investim është pjesë e përpjekjeve për të modernizuar rrjetin elektrik dhe për të përmirësuar cilësinë e shërbimit ndaj konsumatorëve.