Një ngjarje tragjike ka ndodhur mëngjesin e sotëm në Divjakë, ku një 62-vjeçar ka humbur jetën si pasojë e një aksidenti me një mjet bujqësor.

Sipas informacionit paraprak, shtetasi M. M., teksa po punonte në një tokë arë, dyshohet se mjeti bujqësor që po drejtonte është përmbysur aksidentalisht, duke i shkaktuar atij vdekjen e menjëhershme.

Grupi hetimor ndodhet në vendngjarje dhe po punon për të zbardhur rrethanat dhe shkakun e saktë të aksidentit.

Një valë e pazakontë thatësire që ka nisur që në muajin maj ka përfshirë të gjithë Ballkanin Perëndimor, duke shkaktuar pasoja serioze për popullsinë, kafshët dhe prodhimin bujqësor. Reshjet e pakta dhe temperaturat e larta kanë çuar në kufizime të furnizimit me ujë dhe energji, ndërprerje në rrjedhën e lumenjve dhe dëme të mëdha në sektorin bujqësor.

Në Serbinë juglindore, më shumë se një mijë lopë dhe kuaj në malësinë e Suva Planina (“Mali i Thatë”) kanë mbetur pa ujë, pasi burimet që furnizonin zonën janë tharë për herë të parë që para mesit të gushtit. Autoritetet kanë ndërhyrë me furnizime emergjente uji, duke përdorur kamionë dhe tuba për të mbushur pellgje për bagëtitë e etura.

Në Bosnje, meteorologët paralajmërojnë se qershori i këtij viti mund të hyjë në histori si muaji më i thatë i regjistruar ndonjëherë, me pasoja shkatërruese për bujqësinë vendase. Ndërsa në Kroaci, situata ka detyruar autoritetet të shpallin masa emergjente në disa komuna përgjatë kufirit me Hungarinë, ku kultivuesit e perimeve përballen me rrezikun e falimentimit.

Edhe Shqipëria dhe Kosova kanë raportuar mungesa të ujit gjatë korrikut, që kanë ndikuar drejtpërdrejt në prodhimin e energjisë elektrike në Shqipëri, duke thelluar më tej krizën.

Ekspertët paralajmërojnë se ndryshimet klimatike po e bëjnë më të shpeshtë dhe më të ashpër këtë lloj thatësire në Evropën Juglindore. Përveç pasojave në bujqësi dhe furnizimin me ujë, rritet rreziku për shëndetin e popullatës dhe për përhapjen e zjarreve në natyrë. Sipas parashikimeve, një tjetër valë nxehtësie pritet të godasë rajonin në ditët e ardhshme, duke e rënduar situatën edhe më shumë.

Ish-drejtori i Përgjithshëm i Policisë së Shtetit, Gledis Nano, ka fituar betejën ligjore me qeverinë shqiptare, pasi Gjykata Administrative e Apelit ka lënë në fuqi vendimin e Shkallës së Parë, duke e shpallur të paligjshëm shkarkimin e tij nga detyra.

Vendimi është marrë nga trupa gjykuese e përbërë nga gjyqtarët Ardian Dvorani, Gentian Hamiti dhe Sokol Ibi, të cilët rrëzuan ankimimin e Këshillit të Ministrave dhe Ministrisë së Brendshme, të cilat kishin kërkuar anulimin e vendimit që i dha të drejtë Nanos.

Në bazë të këtij vendimi përfundimtar, shteti shqiptar detyrohet t’i paguajë Gledis Nanos një dëmshpërblim prej 60 pagash mujore, që përkon me afatin pesëvjeçar të mandatit të tij të ndërprerë, në vlerën totale prej rreth 100 mijë euro.

Nano u shkarkua nga detyra më 31 gusht 2022, me propozim të ish-ministrit të Brendshëm Bledi Çuçi, ndërsa kryeministri Edi Rama kishte deklaruar publikisht se i kishte kërkuar dorëheqjen. Arsyeja zyrtare për largimin e tij ishte “mosrealizimi i objektivave”.

Vendimi i Gjykatës së Apelit është dhënë më 26 qershor 2025 dhe ende nuk dihet nëse qeveria do të paraqesë rekurs në Gjykatën e Lartë, brenda afatit 30-ditor.

Sakaq, Gledis Nano është në garë për kreun e ri të Byrosë Kombëtare të Hetimit, duke kaluar fazën e parë të vlerësimit nga Komisioni i Posaçëm i SPAK.

Një 51-vjeçar ka gjetur vdekjen sot në banesën e tij, në fshatin Kutalli, në Njësinë Administrative Kutalli në bashkinë Dimal.

Mësohet se 51-vjeçari Altin Hajdari ka qënë duke shembur një mur rrethues në banesën e tij dhe muri është rrëzuar dhe e ka zënë poshtë.Menjëherë familjarët e kanë transportuar 51-vjeçarin drejt Spitalit Rajonal Berat por mjekët e spitalit konfirmojnë se ai mbërriti pa shenja jete.

Trupi i tij është transportuar drejt Repartit të Morgur, ku do i nënshtrohet autopsisë mjeko-ligjore. Në vendngjarje kanë shkuar forcat e policisë të DVP-së Berat, që po punojnë për zbardhjen e rrethanave dhe shkaqeve të kësaj ngjarjeje aksidentale.

Një kurorë me lule, simbol i qartë kërcënimi, është lënë në portën e banesës së prindërve të Emiljano Nikës, drejtor i IKMT-së Shkodër. Ngjarja është regjistruar në fshatin Sektor të Velipojës dhe është denoncuar menjëherë në polici.

Nika është një nga zyrtarët që ka drejtuar aksionin për shembjen e ndërtimeve pa leje në zonën e mbrojtur të Thethit një operacion që ka hasur kundërshtime të forta nga banorët e zonës.

Sipas Policisë: “Më datë 18.07.2025, shtetasi E. N., 44 vjeç, banues në Shkodër, ka kallëzuar se në banesën ku jetojnë prindërit e tij, në fshatin Sektor, Velipojë, është vendosur një kurorë me lule mbi kangjellat e portës. Vijojnë hetimet për zbardhjen e plotë të rrethanave dhe identifikimin e autorit.”

Materialet janë referuar në Prokurorinë pranë Gjykatës së Shkallës së Parë Shkodër për veprime të mëtejshme.

Nika është përballur edhe më parë me kërcënime për shkak të funksionit të tij si drejtues i ndërhyrjeve kundër ndërtimeve të paligjshme. Policia po heton për zbardhjen e plotë të rastit dhe garantimin e sigurisë së tij dhe familjes.

Konflikti në Ksamil – Arrestohen 3 persona, procedohet një i mitur dhe bashkëshortja e të dëmtuarit

Tre persona janë arrestuar dhe një i mitur është proceduar penalisht në gjendje të lirë, në lidhje me konfliktin e dhunshëm të ndodhur një ditë më parë në plazhin publik të Ksamilit, ku u dhunua 46-vjeçari Albert Pashaj. Sipas policise ,në pranga kanë rënë shtetasit Agim Taraj (43 vjeç, banues në Berat), Silvjan Sulku (18 vjeç, nga Dibra) dhe Aldo Zeqiraj (35 vjeç, banues në Durrës). Ndërsa një 17-vjeçar nga Kamza është proceduar penalisht në gjendje të lirë, për shkak të moshës së mitur.

Njoftimi i Policisë:

Sipas Policisë së Sarandës, katër personat dyshohet se e kanë goditur me sende të forta 46-vjeçarin A. P., duke i shkaktuar dëmtime trupore, gjatë një konflikti për motive të dobëta.

Gjithashtu, është proceduar penalisht edhe bashkëshortja e të dëmtuarit, shtetasja O. P., 40 vjeçe, e cila pas ngjarjes ka shkaktuar dëme materiale në ambientet e një “beach bar”-i që zotërohet nga një prej të arrestuarve.

Ngjarja ndodhi në sy të pushuesve dhe fëmijëve të familjes Pashaj, duke shkaktuar shqetësim të madh publik dhe reagime të forta në rrjetet sociale.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për vijimin e hetimeve dhe marrjen e masave ligjore përkatëse.

Ngjarja është ende në hetim dhe priten zhvillime të mëtejshme