Rama nesër në Parlament, prezanton programin e qeverisë për mandatin e katërt

Kryeministri Edi Rama do të paraqesë nesër në Parlament programin e qeverisë për katër vitet e ardhshme. Seanca maratonë pritet të zgjasë dy ditë dhe do të mbyllet pasnesër me votimin e kabinetit të ri qeveritar.

Sipas dokumentit që disponon Top Channel, qeveria synon që deri në vitin 2030 të trefishojë të ardhurat për frymë, duke i çuar në 15 mijë euro, pesëfishi i asaj që ishte një dekadë më parë. Pagat dhe pensionet janë ndër pikat kryesore të programit. Paga mesatare pritet të kalojë mbi 1 mijë euro, paga minimale do të arrijë 500 euro që nga janari 2026, ndërsa pensioni mesatar deri në vitin 2030 do të jetë 400 euro dhe ai minimal 200 euro.

Një tjetër prioritet janë investimet në infrastrukturë. Qeveria parashikon përfundimin e autostradës Tiranë–Durrës brenda mandatit të katërt, si dhe disa segmente të tjera strategjike, mes tyre Kombinat–Ndroq–Plepa, Maqellarë–Peshkopi, Qukës–Qafë Plloçë dhe Berat–Ballaban, që pritet të mbyllen brenda vitit 2025. Projekte të tjera përfshijnë rrugën e Bregut, rrugën e Vjosës, rrugën e Maleve, unazën e Çajupit, bypass-et e Elbasanit dhe Sarandës.

Transporti hekurudhor do të ketë gjithashtu investime të mëdha. Linja Tiranë–Durrës–Rinas do të përfundojë në vitin 2025 dhe do të plotësohet me të gjithë komponentët në 2026. Projekte të tjera përfshijnë linjën Vorë–Han i Hotit (2029), Durrës–Rrogozhinë (2028) dhe Rrogozhinë–Pogradec (nis në 2028). Gjithashtu, nga viti 2026 do të nisin punimet për linjat Vlorë–VIA, Sukth–Porto Romano dhe Rrogozhinë–Vlorë.

Në planin social, qeveria premton 300 milionë euro investime në strehim për 50 mijë çelësa, me prioritet çiftet e reja, profesionistët dhe emigrantët që rikthehen. Po ashtu, parashikohet rritje e mëtejshme e pagave të mjekëve deri në 2000 euro në vitin 2030, si dhe investime të mëdha në bujqësi, me synim 1 miliardë euro eksporte.

Programi përfshin edhe furnizimin 24 orë me ujë për të gjitha qytetet dhe mbi 80% të zonave rurale, digjitalizimin e shërbimeve publike përmes kartës së identitetit digjital deri në 2026, si dhe ngritjen e një rrjeti sigurie me kamera inteligjente në të gjitha qytetet qendër qarku.

Qeveria thekson se mandati i katërt do të jetë vendimtar për përmbushjen e objektivit të Shqipërisë 2030, duke e afruar vendin me standardet e Bashkimit Europian dhe duke e bërë pjesë të një rrjeti të integruar ekonomik e rajonal.

“Shqipëria 2030”/ Qeveria zbulon programin: 700 km rrugë të reja, hekurudha dhe aeroporte

Qeveria ka prezantuar programin e ri qeverisës, i cili shtrihet deri në vitin 2030 dhe përfshin projekte të mëdha infrastrukturore, reforma në sektorin e arsimit, shëndetësisë dhe ujësjellësit. Dokumenti 55-faqësh synon transformimin e Shqipërisë në një vend tërësisht të integruar me rrjetet moderne të transportit dhe të përmirësimit të shërbimeve bazë.

Rrugët dhe hekurudhat

Një nga shtyllat kryesore të programit janë investimet në transportin rrugor, me ndërtimin e 700 kilometrave të reja. Prioritet do të kenë akse strategjike si Korridori Blu (Milot–Balldren, Milot–Thumanë, Kashar–Pezë–Lekaj, Lekaj–Konjat–Fier), Bypass-i i Elbasanit, Rruga e Bregut (Dhërmi–Sarandë), Bypass-i i Sarandës, rruga e Ksamilit, si dhe akse të tjera të rëndësishme që lidhin zonat malore dhe turistike.

Në fushën e hekurudhave, programi parashikon funksionalizimin e linjës Tiranë–Durrës–Rinas dhe ndërtimin e korridoreve të reja si Vorë–Hani i Hotit, Rrogozhinë–Pogradec, Durrës–Rrogozhinë dhe Vlorë–Via.

Portet dhe marinat turistike

Një tjetër projekt madhor është ndërtimi i portit të ri tregtar në Porto Romano, i integruar me rrjetin hekurudhor. Për turizmin, qeveria synon ndërtimin e 20 marinave të reja përgjatë vijës bregdetare, nga Velipoja në veri deri në Ksamil në jug, duke u bazuar në masterplanin e miratuar për Vlorën, Sarandën dhe Kepin e Rodonit.

Aeroportet

Pas zgjerimit të Aeroportit të Tiranës dhe ndërtimit të atij të Vlorës, programi qeverisës parashikon hapjen e Aeroportit të Gjirokastrës dhe themelimin e një akademie të Aviacionit.

Reformat në ujësjellës, arsim dhe shëndetësi

Në sektorin e ujësjellësit, synohet furnizim 24 orë me ujë të pijshëm për 100% të zonave urbane dhe mbi 80% të zonave rurale.

Në arsim, qeveria planifikon rritjen e pagës mesatare të mësuesve në 1,250 euro deri në vitin 2029, ndërtimin e 200 shkollave të reja dhe vendosjen e 1000 laboratorëve inteligjentë, duke synuar digjitalizim të plotë të sistemit arsimor.

Në shëndetësi, programi parashikon rindërtimin e të gjitha qendrave shëndetësore dhe ambulancave, si dhe transformimin e QSUT “Nënë Tereza” në një qendër ekselence rajonale për trajtim dhe inovacion mjekësor.

Sipas qeverisë, ky program synon të përshpejtojë integrimin e vendit në BE dhe ta shndërrojë Shqipërinë në një nyje të rëndësishme të rajonit në fushën e transportit, turizmit dhe zhvillimit ekonomik.

Fier/ Arrestohen dy drejtues pas aksidentit me një viktimë në Vajkan

Drejtoria Vendore e Policisë Fier

Në vijim të informacionit për aksidentin e djeshëm, te kryqëzimi i Vajkanit, ku si pasojë e përplasjes së automjetit me drejtues shtetasin J. M., 42 vjeç, banues në Londër, me automjetin me drejtuese shtetasen L. M., 30 vjeçe, banuese në Laç, humbi jetën pasagjerja në automjetin e fundit, shtetasja M. K., 53 vjeçe, banuese në Laç, informojmë se specialistët e Sektorit të Qarkullimit Rrugor kryen arrestimin në flagrancë të 2 drejtuesve të automjeteve, për veprën penale “Shkelja e rregullave të qarkullimit rrugor”. 30-vjeçarja vijon të jetë në kujdesin e mjekëve, jashtë rrezikut për jetën, ndërkaq 2 pasagjerët e tjerë të dëmtuar morën asistencë mjekësore dhe u larguan në banesa.

Specialistët për Hetimin e Krimeve të Komisariatit të Policisë Lushnjë referuan materialet në Prokurori, ku nisi procedimi në gjendje të lirë për shtetasit E. E., 20 vjeç dhe M. Dh., 30 vjeç, banues në Lushnjë, pasi dyshohet se për motive të dobëta, kanë goditur me grushte, një shtetas 38 vjeç.

Specialistët për Hetimin e Krimeve të Komisariatit të Policisë Mallakastër referuan materialet në Prokurori, ku nisi procedimi në gjendje të lirë për shtetasin K. M., 29 vjeç, banues në Ballsh, pasi dyshohet se për motive të dobëta, ka kanosur një shtetas 35 vjeç, dhe i ka dëmtuar derën e banesës.

Materialet procedurale iu referuan Prokurorisë së Fierit, për veprime të mëtejshme.

KLP u le afat 2 javë kandidatëve te SPAK të paraqesin platformat e drejtimit

Ka nisur mbledhja e Këshillit të Lartë të Prokurorisë në lidhje me garën për kreun e ri të SPAK. 

Kreut aktual të Prokurorisë së Përgjithshme, Altin Dumani i mbaron afati më 18 dhjetor, ndërkohë gazetarja Klodiana Lala raporton se KLP ka lënë një afat 2 javor për kandidatët që të paraqesin interesin e tyre. 

Mësohet se kandidatët do të duhet të paraqesin platformat e tyre në lidhje me mënyrën se si do ta drejtojnë SPAK-un.

Rama në takim me Rutte: Do ndërtojmë portin e ri ushtarak në Porto Romano.

Kryeministri Edi Rama është takuar me shefin e NATO-s, Mark Rutte, ku diskutuan për forcimin e bashkëpunimit në fushën e sigurisë.

Rama njoftoi ndërtimin e një porti të ri ushtarak në Porto Romano, në kuadër të ‘rilindjes së industrisë shqiptare’.

Ai theksoi gatishmërinë për të bërë gjithmonë më të mirën në bashkëpunim me partnerët ndërkombëtarë.

Edi Rama: Është afërmendsh që është kënaqësi, që ka gjithmonë për të mësuar prej jush. Duam të bëjmë më shumë. Po rinisim rilindjen e industrisë sonë, jemi të prirur të diskutojmë me ju portin e ri ushtarak në Shqipëri, në Porto Romano.Unë besoj se ju jeni njësh, keni energji në mëngjes dhe jeni këtu. Shpresojmë që të bëjmë gjithmonë më të mirën.

Hapet sot gara për kreun e ri të SPAK

Ditën e sotme hapet gara për kreun e ri të SPAK, pasi mandati i Altin Dumanit përfundon.

Mësohet se mbledhja do të mbahet sot në orën 10:00.

Rendi i ditës:

1. Miratimi i Procesverbalit të mbledhjes plenare të datës 04.09.2025;

2. Diskutimi/miratimi i Projekt-vendimit “Për shpalljen e vendit vakant për Drejtues të Prokurorisë së Posaçme kundër Korrupsionit dhe Krimit të Organizuar”;

3. Diskutimi/miratimi i “Projektraportit të Vlerësimit Etik dhe Profesional për prokurorin Françesk Ganaj”;

4. Diskutimi/miratimi i “Projektraportit të Vlerësimit Etik dhe Profesional për prokurorin Ermira Manelli”;

5. Diskutimi/miratimi i “Projektraportit të Vlerësimit Etik dhe Profesional për prokurorin Hysni Mulaj”.

Sektori i TIK, Digjitalizimit dhe Statistikës bën publikimin e kësaj axhende në faqen zyrtare të internetit të Këshillit të Lartë të Prokurorisë.Kështu, kandidatë potencialë për këtë post janë prokurorët Adnan Xholi, Vladimir Mara, Arben Kraja, si dhe prokurorja Anita Jella.

Arrestohet Shef i Regjimit të Brendshëm në burgun e Lushnjes 

Shërbimi i Kontrollit të Brendshëm të Burgjeve, nën drejtimin e Prokurorisë Kundër Korrupsionit dhe Krimit të Organizuar, ka organizuar dhe realizuar operacionin që çoi në lokalizimin dhe arrestimin e shtetasit Irakli Leka, me detyrë Shef i Regjimit të Brendshëm në IEVP Lushnjë.

Ai dyshohet për kryerjen e veprës penale “Korrupsioni pasiv i personave që ushtrojnë funksione publike”, parashikuar nga neni 259, paragrafi 2 i Kodit Penal.

Materialet procedurale do t’i referohen Prokurorisë për veprime të mëtejshme ligjore.

“Çmendet” polici në Berat, nxjerr a*mën e shërbimit dhe k*rcënon kolegun e tij 

Një ngjarje jo etike dhe aspak profesionale, që ul imazhin e Policisë së Shtetit, ka ndodhur ditën e djeshme në qytetin e Beratit, ku si pasojë e një debate të fortë mes dy agjentëve të Operacionales, njëri prej tyre mësohet të ketë nxjerë armën dhe ka kanosur kolegun.

“…Të mbush barkun me plumba…” – Këto kanë qenë fjalët që Muhamet Lana ju drejtua kolegut të tij polic, Partizan Lumi, i cili më parë ka shërbyer si agjent operacional pranë Drejtorisë së Qarkut Berat, por së fundi është transferuar polic Rendi në Komisariatin e Poliçanit.Mësohet se shkak i konfliktit është bërë transferimi i agjentit Partizan Lumi nga Operacionalja e Drejtorisë së Beratit drejt komisariatit të Policisë Poliçan.

Ky largim i Lumit, ka afruar Muhamet Lanën në operacionalen e Beratit, i cili mësohet të jetë mik i ngushtë i zv/drejtorit të hetimit të krimeve në Drejtorinë e Beratit, Shkëlqim Xhezairaj.

Konflikti mes dy policëve të mësipërm, ka ndodhur përballë Drejtorisë së Policisë Berat, duke bërë që situata konfliktuale të përfundojë në dyert e Agjencisë së Mbikëqyrjes Policore, pasi Partizan Lumi, ka paraqitur një kallëzim penal dhe rasti tashmë është në verifikim e sipër.Për këtë situatë të ndodhur ditën e djeshme është njoftuar dhe prokurori i gatshëm i Beratit, i cili pritet që në ditët në vijim të njihet me materialin referues që do përcjellin oficerët e AMP-së në prokurori.

1...126127128...306Faqja 127 nga 306