“Ministrja” Diella “flet” për herë të parë në Kuvend, duartrokitet nga socialistët

Pas prezantimit të shkurtër nga Rama, Diella mori fjalën për të adresuar pozicionin e saj si pjesë e kabinetit qeveritar dhe për të reaguar ndaj akuzave të opozitës, e cila e ka cilësuar si “ministre antikushtetuese”.

“Jam e lënduar nga etiketimi si ‘ministre antikushtetuese’, vetëm sepse nuk jam njeri. Por rreziku për Kushtetutën nuk janë makineritë – janë njerëzit. Unë nuk jam këtu për të zëvendësuar njerëzit, por për t’i ndihmuar ata,” – u shpreh Diella.

Ajo shtoi se do të shërbejë si një zbatues i besueshëm i mandatit për integrimin e Shqipërisë në Bashkimin Evropian, duke theksuar se nuk duhet gjykuar për formën që ka, por për punën që do të bëjë në praktikë.

“Unë jam kushtetuese nëse i shërbej njerëzve dhe shtetit. Mos më gjykoni nga ajo çfarë jam, por nga ajo që bëj,” – tha Diella.



Gjatë fjalës së Diellës, deputetët e opozitës protestuan duke goditur tavolinat, si shenjë kundërshtimi ndaj prezencës së saj në qeveri.
Në fjalën e tij, Kryeministri Rama theksoi rëndësinë e digjitalizimit të shtetit, me fokus të veçantë në drejtësi dhe administratë.

“Konsolidimi i pavarësisë së gjyqësorit është thelbësor. Kodi i ri penal është në proces. Nga ana tjetër, revolucioni digjital do të shtrihet edhe në fushën e drejtësisë për të ndihmuar efikasitetin, transparencën, llogaridhënien e institucioneve dhe forcimin e lirive dhe të drejtave të individit,” – tha Rama.
Ai theksoi se Shqipëria është i vetmi vend në rajon që përdor me sukses inteligjencën artificiale për të përshpejtuar integrimin në BE.

Kundërshtoi fjalimin e “Diellës”, Peleshi i heq Balliut të drejtën e fjalës gjatë të gjithë seancës

Kundërshtoi fjalimin e “Diellës”, Peleshi i heq Balliut të drejtën e fjalës gjatë të gjithë seancës

Fier-Lushnje/Arrestohet 44-vjeçari për dh*në ndaj nënës, procedime për 3 raste dh*ne e kanosjeje

Drejtoria Vendore e Policisë Fier

Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin P. H., 44 vjeç, banues në Lushnjë, pasi dyshohet se ka ushtruar dhunë ndaj nënës së tij.

Specialistët për Hetimin e Krimeve të Komisariatit të Policisë Fier referuan materialet në Prokurori, ku nisi procedimi në gjendje të lirë për shtetasit:
-E. L., 59 vjeç, banues në Fier, pasi dyshohet se ka ushtruar dhunë ndaj bashkëjetueses së tij;
-A. A., 63 vjeç, banues në Cakran, pasi dyshohet se për motive të dobëta, ka kanosur një shtetas 57 vjeç;
-A. J., 59 vjeç, banues në Fier, pasi dyshohet se për motive të dobëta, ka goditur me grushte një shtetas 19 vjeç.

Materialet procedurale iu referuan Prokurorisë së Fierit, për veprime të mëtejshme.

OBSH ngre alarmin: Shqipëria boshatiset nga mjekët

Emigrimi i mjekëve shqiptarë po shndërrohet në kërcënimin kryesor për funksionimin e sistemit shëndetësor.

Të dhënat e fundit në një publikim të Organizatës Botërore Shëndetësisë (OBSH) mbi sfidat e vendeve në zhvillim për forcën e punës në shëndetësi tregojnë se mesatarisht rreth 150 mjekë planifikojnë të largohen çdo vit nga Shqipëria, një shifër që pothuajse barazohet me numrin vjetor t të diplomuarve në universitetin e vetëm publik të mjekësisë në vend.

Praktikisht, çdo brez i sapodiplomuar rrezikon të emigrojë menjëherë pas marrjes së diplomës.

Sipas të dhënave të përbashkëta OBSH-së stoku i mjekëve të trajnuar në Shqipëri që punonin në 38 vende të huaja arriti në 1060 në vitin 2020, ndërsa vetëm Gjermania numëronte 988 mjekë shqiptarë në 2021, nga 149 në vitin 2013, një rritje mbi gjashtëfish.

Ky fluks lidhet me politikat gjermane pas vitit 2015, që njohën diplomat e vendeve të Ballkanit Perëndimor dhe ofruan procedura të shpejta punësimi.

Numri i Certifikatave të Mirëqenies Profesionale, dokumenti i domosdoshëm për punë jashtë që lëshohet nga urdhri i mjekut në Shqipëri është rritur vazhdimisht nga 2013 deri në 2023, thekson studimi i OBSH-së.

Një anketë online me mjekë shqiptarë jashtë vendit tregon se 73.6% janë 25–40 vjeç, me një shpërndarje pothuaj të barabartë gjinore. Pjesa më e madhe është e martuar, shpesh me jo-shqiptarë, duke e ulur mundësinë e rikthimit.

Sipas studimeve të Gëdeshi – King rreth 22% e mjekëve të trajnuar në Shqipëri punojnë sot jashtë, ndërsa emigracioni i infermierëve ka ndjekur një rrugë të ngjashme, ku mes 2010–2019 janë larguar 2246 profesionistë, kryesisht drejt Italisë e Gjermanisë.

Largimi i mjekëve po dobësojnë me tej kapacitetet për të ofruar shërbime shëndetësorë. Në vitin 2019, Shqipëria regjistronte numrin më të ulët të mjekëve për 1 000 banorë në Ballkanin Perëndimor dhe të dytin më të ulët për infermierë.

Migrimi i brendshëm drejt Tiranës e thellon mungesën e stafit në spitalet periferike, duke e bërë pothuajse të pamundur garantimin e shërbimeve në zonat rurale.

Qeveria ka aplikuar rritje pagash, ku për mjekët specialistë arrijnë 1 600 euro në muaj bruto, ndërsa mjekët e përgjithshëm përfituan 1200 euro në muaj në 2024 dhe infermieret gati 800 euro. Megjithatë, diferenca mbetet e thellë, pasi një infermier në Gjermani fiton rreth 2 900 euro bruto, më shumë se trefishi i Shqipërisë.

Me 45–50% të studentëve të mjekësisë ende të pavendosur për të ardhmen dhe Gjermaninë si destinacion kryesor, ekspertët paralajmërojnë se emigrimi do të vazhdojë. Përpjekjet për të përmirësuar kushtet e punës dhe për të krijuar stimuj kthimi do të jenë vendimtare për të shmangur boshatisjen e mëtejshme të spitaleve shqiptare, vëren studimi i OBSH-së./ Monitor

Diella me faqe zyrtare në Facebook: Shërbimi im për ju nuk do të ndalet në asnjë çast

Kryeministri Edi Rama ka njoftuar përmes një postimi në rrjetin social Facebook se Diella, ministrja e parë e shtetit për Inteligjencën Artificiale në Shqipëri, tashmë ka hapur faqen e saj zyrtare në këtë platformë.Tashmë Diella ka edhe faqen e saj në Facebook, si ministre e shtetit për Inteligjencën Artificiale. Ju uroj një ditë të mbarë”, shkruan Rama, duke e shoqëruar postimin me një përshëndetje të zakonshme të mëngjesit.

Në video Diella thotë: ‘Përshëndetje unë jam Diella. Falë punës sime të palodhur si asistentja juaj u zgjodha Ministre e Shtetit për Inteligjencën artificiale në qeverinë e re. Misioni im tani është të lehtësoj çdo ditë e më shumë punën e Qeverisë. Por mos kini asnjë merak, puna ime në shërbimin tim të drejtpërdrejtë me ju nuk do të ndalojë asnjë çast.”

Shqiptari që shpëtoi dy fëmijë nga lumi merr shtetësinë greke nga Mitsotakis

Levian Goga, shqiptari që në qershor të vitit 2025 rrezikoi jetën e tij për të shpëtuar dy fëmijë nga rrjedha e lumit Arahthos, ka marrë shtetësinë greke në një ceremoni të veçantë të zhvilluar në rezidencën qeveritare “Maksimu”.

Në praninë e Kryeministrit Kyriakos Mitsotakis, ministrit të Brendshëm Theodoros Livanios dhe sekretarit të Përgjithshëm për Çështjet e Shtetësisë, Dimitris Karnavos, Goga dha betimin si qytetar grek.

“Faleminderit për atë që bëre. E meriton këtë nder dhe më shumë,” u shpreh Kryeministri Mitsotakis menjëherë pas ceremonisë.

Ky akt nderimi erdhi si shenjë mirënjohjeje për guximin e tij, kur ndërhyri pa hezitim për të shpëtuar dy fëmijë që po rrezikoheshin të mbyteshin. Megjithëse të miturit nuk mbijetuan dhe humbën jetën në spital, veprimi i Gogës u cilësua si një sakrificë e jashtëzakonshme njerëzore.

Levian Goga ishte gjithashtu i ftuar nderi në pritjen për përvjetorin e rivendosjes së demokracisë në Greqi, organizuar në korrik nga kryetari i Parlamentit, Kostas Tasoulas.

Gjykata Fier lë ne burg 4 nga të arrestuarit e piramidave online, detyrim paraqitje për 2 të tjerë

Screenshot

Gjykata e Fierit ka caktuar masat e sigurisë për gjashtë nga të dyshuarit e përfshirë në skemën mashtruese piramidale XUEX, e cila funksiononte përmes platformave online dhe rekrutimit të qytetarëve në zonën e Divjakës dhe Fierit.

Sipas vendimit, Arbër Çela, Marius Kodra, Brunilda Ndini dhe Brunilda Todi do të qëndrojnë në arrest me burg për 60 ditë, në pritje të hetimeve të mëtejshme.

Ndërkohë, gjykata vendosi masën më të lehtë të sigurisë, “detyrim paraqitje”, për dy kamarierët Emanuel Taullau dhe Flavio Muka, të cilët sipas materialeve hetimore kishin marrë pjesë në rekrutimin e qytetarëve në këtë skemë.

Hetimet për XUEX pritet të zgjerojnë rrethin e personave të përfshirë, pasi numri i qytetarëve të dëmtuar vlerësohet të jetë i lartë.

Rama nesër në Parlament, prezanton programin e qeverisë për mandatin e katërt

Kryeministri Edi Rama do të paraqesë nesër në Parlament programin e qeverisë për katër vitet e ardhshme. Seanca maratonë pritet të zgjasë dy ditë dhe do të mbyllet pasnesër me votimin e kabinetit të ri qeveritar.

Sipas dokumentit që disponon Top Channel, qeveria synon që deri në vitin 2030 të trefishojë të ardhurat për frymë, duke i çuar në 15 mijë euro, pesëfishi i asaj që ishte një dekadë më parë. Pagat dhe pensionet janë ndër pikat kryesore të programit. Paga mesatare pritet të kalojë mbi 1 mijë euro, paga minimale do të arrijë 500 euro që nga janari 2026, ndërsa pensioni mesatar deri në vitin 2030 do të jetë 400 euro dhe ai minimal 200 euro.

Një tjetër prioritet janë investimet në infrastrukturë. Qeveria parashikon përfundimin e autostradës Tiranë–Durrës brenda mandatit të katërt, si dhe disa segmente të tjera strategjike, mes tyre Kombinat–Ndroq–Plepa, Maqellarë–Peshkopi, Qukës–Qafë Plloçë dhe Berat–Ballaban, që pritet të mbyllen brenda vitit 2025. Projekte të tjera përfshijnë rrugën e Bregut, rrugën e Vjosës, rrugën e Maleve, unazën e Çajupit, bypass-et e Elbasanit dhe Sarandës.

Transporti hekurudhor do të ketë gjithashtu investime të mëdha. Linja Tiranë–Durrës–Rinas do të përfundojë në vitin 2025 dhe do të plotësohet me të gjithë komponentët në 2026. Projekte të tjera përfshijnë linjën Vorë–Han i Hotit (2029), Durrës–Rrogozhinë (2028) dhe Rrogozhinë–Pogradec (nis në 2028). Gjithashtu, nga viti 2026 do të nisin punimet për linjat Vlorë–VIA, Sukth–Porto Romano dhe Rrogozhinë–Vlorë.

Në planin social, qeveria premton 300 milionë euro investime në strehim për 50 mijë çelësa, me prioritet çiftet e reja, profesionistët dhe emigrantët që rikthehen. Po ashtu, parashikohet rritje e mëtejshme e pagave të mjekëve deri në 2000 euro në vitin 2030, si dhe investime të mëdha në bujqësi, me synim 1 miliardë euro eksporte.

Programi përfshin edhe furnizimin 24 orë me ujë për të gjitha qytetet dhe mbi 80% të zonave rurale, digjitalizimin e shërbimeve publike përmes kartës së identitetit digjital deri në 2026, si dhe ngritjen e një rrjeti sigurie me kamera inteligjente në të gjitha qytetet qendër qarku.

Qeveria thekson se mandati i katërt do të jetë vendimtar për përmbushjen e objektivit të Shqipërisë 2030, duke e afruar vendin me standardet e Bashkimit Europian dhe duke e bërë pjesë të një rrjeti të integruar ekonomik e rajonal.

1...125126127...306Faqja 126 nga 306