Mediat italiane i bëjnë jehonë takimit Meloni-Rama në Samitin ne Tirane

Samiti i Komunitetit Politik Europian ishte rasti për një takim dypalësh midis Kryeministres së Italisë, Giorgia Meloni, dhe Kryeministrit të Shqipërisë, Edi Rama, në fund të të cilit u nënshkrua një deklaratë e përbashkët.

Ndër pikat e prekura nga të dy udhëheqësit ishte organizimi i një samiti ndërqeveritar (do të ishte i pari) midis Italisë dhe Shqipërisë në Romë brenda vitit. Meloni dhe Rama ranë dakord gjithashtu të forcojnë bashkëpunimin në industrinë e Mbrojtjes, për furnizimin me mjete dhe teknologji në sektorin e Sigurisë dhe Mbrojtjes dhe për ndërtimin dhe menaxhimin e infrastrukturave detare dhe të ndërtimit të anijeve në Shqipëri, për ndërtimin dhe mirëmbajtjen e njësive detare dhe për zbatimin e nismave të trajnimit teknik dhe profesional.

U riafirmua gjithashtu dëshira për të thelluar marrëdhëniet në sektorin e energjisë, për zhvillimin e burimeve të rinovueshme dhe për një bashkëpunim më të madh në luftën kundër imigracionit të paligjshëm.

Deklarata e përbashkët Itali-Shqipëri 

Samiti i parë ndërqeveritar midis Italisë dhe Shqipërisë do të mbahet në Itali deri në fund të vitit, siç është rënë dakord nga Meloni dhe homologu i saj shqiptar Rama. Deklarata e përbashkët, e miratuar në fund të takimit dypalësh, specifikon se samiti do të jetë një mundësi për të vlerësuar bashkëpunimin dypalësh dhe për të rënë dakord mbi iniciativa të mëtejshme që synojnë forcimin e partneritetit strategjik midis Romës dhe Tiranës, duke identifikuar disa sektorë kyç, duke përfshirë: mbrojtjen dhe sigurinë, energjinë, migracionin, mbrojtjen civile, shëndetësinë, mjedisin, zhvillimin ekonomik dhe infrastrukturor dhe me fokus në trajnimin profesional në sektorët e bashkëpunimit.

Të dy vendet ranë dakord të forcojnë bashkëpunimin që synon ofrimin e mjeteve dhe teknologjive në fushën e sigurisë dhe mbrojtjes dhe në ndërtimin dhe menaxhimin e infrastrukturës detare dhe të ndërtimit të anijeve në Shqipëri, për ndërtimin dhe mirëmbajtjen e njësive detare dhe për zbatimin e nismave të trajnimit teknik dhe profesional, thuhet në deklaratën e përbashkët. “Masa është pjesë e Marrëveshjes për Bashkëpunim në Mbrojtje të 10 tetorit 1995 dhe Memorandumit të Mirëkuptimit për Bashkëpunim në Mbrojtje të 18 shtatorit 2009”.

Italia dhe Shqipëria ranë dakord gjithashtu të zgjerojnë bashkëpunimin në sektorin e energjisë, në bazë të marrëveshjes trepalëshe midis Italisë, Emirateve të Bashkuara Arabe dhe Shqipërisë të nënshkruar në Abu Dhabi më 15 janar 2025, e cila parashikon prodhimin e energjisë së rinovueshme në vendin ballkanik dhe një ndërlidhës nëndetës për energjinë e rinovueshme që do të lidhë Italinë dhe Shqipërinë. Marrëveshja midis Italisë, Shqipërisë dhe Emirateve të Bashkuara Arabe u nënshkrua më 15 janar në Abu Dhabi, në kuadër të Samitit Botëror të Energjisë për të Ardhmen, dhe parashikon ndërtimin e një infrastrukture për të prodhuar dhe transportuar energji të pastër nga Shqipëria në Itali, nëpërmjet një lidhjeje nëndetëse.

Të dy vendet do të identifikojnë së bashku sektorë specifikë me vlerë të lartë të shtuar për të mbështetur procesin e pranimit të Shqipërisë në Bashkimin Evropian brenda kuadrit të asistencës teknike para-pranimit që është tashmë në fuqi, thuhet në deklaratë. “Kryeministrja italiane dhe Rama kujtuan me kënaqësi fillimin në Shqipëri të edicionit të 108-të të Giro d’Italia, i cili u zhvillua më 9 maj nga Durrësi, si një dëshmi e fortësisë së lidhjes midis dy vendeve, e cila shtrihet edhe në diplomacinë sportive si një mjet për bashkëpunim dhe rritje të përbashkët.”

Për më tepër, Italia dhe Shqipëria kanë rënë dakord të krijojnë një grup të përbashkët pune për të thelluar bashkëpunimin në luftën kundër emigracionit të parregullt dhe për të forcuar aftësitë e patrullimit detar të Shqipërisë.

Italia dhe Shqipëria njoftuan gjithashtu përfundimin e një Marrëveshjeje Kornizë që synon njohjen zyrtare të Cassa Depositi e Prestiti në Shqipëri si një institucion financiar për zhvillim, funksional për forcimin e mëtejshëm të bashkëpunimit dypalësh në fushat ekonomike dhe infrastrukturore, gjithashtu në lidhje me mbështetjen teknike italiane për krijimin e Bankës së re Shqiptare të Zhvillimit.

Si pjesë e bashkëpunimit midis dy vendeve, është edhe përfundimi i një marrëveshjeje për krijimin e përbashkët të një qendre panairesh tregtare në Tiranë, të quajtur “ExpoAlbania”; krijimin e instrumenteve ligjore dhe teknike që synojnë forcimin e bashkëpunimit në fushën e ekonomisë detare dhe zhvillimin e projekteve që lidhen me industrinë e peshkimit në Shqipëri; forcimin e bashkëpunimit midis Simest dhe Këshillit Ekonomik Kombëtar të Shqipërisë përmes nismave të trajnimit dhe mbështetjes për ndërmarrjet e vogla dhe të mesme italiane dhe shqiptare mbi mundësitë e tregjeve të tyre përkatëse, duke promovuar partneritete dhe investim.

Rama: Zgjedhjet në Shqipëri, vullnet 100% i popullit shqiptar! Procesi zgjedhor në pajtim me standardet e OSBE—ODIHR

Kryeministri Edi Rama, gjatë konferencës për mediat me homologen daneze, u pyet për raportin e BE-së për Shqipërinë.

Një gazetar i huaj i tha kryeministrit Edi Rama se BE, në lidhje me Shqipërinë, ka folur për “lojë të pabarabartë” në zgjedhje. Por, Rama tha se rreshtat janë shkëputur nga një pasazh i gjatë, ku në tërësi flitet pozitivisht për procesin zgjedhor në Shqipëri. Rama tha se procesi zgjedhor në Shqipëri ishte 100 përqind vullnet i popullit shqiptar.

Edi Rama: Më duhet të them që ajo çfarë cituat janë pak fjali të një deklarate shumë më të gjatë, ku praktikisht përshëndeti zgjedhjet shqiptare. Raporti i është referuar kritikave të raportit paraprak, që ka nevojë për shqyrtim e doja të thosha se zgjedhjet shqiptare janë shprehje e vullnetit të popullit shqiptar 100 përqind. Kritikat duhet të përmirësohen, nuk ka diskutim. Procesi ynë zgjedhor nuk është si në Danimarkë, por është në pajtim me standardet e OSBE—ODIHR.

Nis protesta e opozitës: “Duam votat tona”

Ndërsa në Tiranë po mbahet sot Samiti i 6 i Komunitetit Politik Europian, ku në kryeqytet kanë zbarkuar të gjithë liderët europianë, nga ana tjetër koalicioni opozitar që humbi thellë në zgjedhjet parlamentare, është mbledhur për protestë.

Kjo ishte një protestë e paralajmëruar, por që policia nuk ka dhënë leje.Përfaqësues të PD, si Flamur Noka, Jorida Tabuku, Enno Bozdo e të tjerë janë mbledhur në afërsi të bulevardit Zogu i Parë.Deri tani protesta ka nisur me nota të qeta, nën “moton”: Poshtë diktatura, Duam votat tona, Edi Rama kriminel.

Gjithashtu një grup protestuesish bënë thirrje: E duam Shqipërinë me Sali Berishën.

Vuçiç shfaqet në sheshin “Skënderbej”

Për herë të parë u zhvillua në Shqipëri, Samiti i 6-të i Komunitetit Politik Europian duke mbledhur në Tiranë liderët e 47 vendeve, përfshirë edhe ato të Bashkimit Europian. Ky Samit u shoqërua edhe me disa momente pikante, krahas trajtimit të çështjeve madhore si ato të sigurisë nisur nga situata në Lindje ku lufta në Ukrainë vijon ndërsa përpjekjet për paqe ende nuk kanë dhënë rezultat.

Veprim i papritur ka qenë edhe ai i presidentit serb, Aleksandar Vuçiç i cili ka lënë për disa momente mbledhjen e liderve dhe është shfaqur në sheshin “Skënderbej”.

Siç duket edhe nga pamjet që sjell BalkanWeb, Vuçiç duket teksa ecën lirshëm dhe flet në telefon, ndërsa pranë tij janë truprojat dhe agjentë të tjerë të angazhuar për garantimin e sigurisë. Në një moment ai i afrohet shtyllës ku valëvitet flamuri shqiptar në sheshin qendror të kryeqytetit.

Rastësi apo mesazh nga ana e Vuçiç, për të dërguar një sinjal bashkëpunimi dhe pajtimi mes shqiptarëve dhe serbëve?

Kujtojmë që kombëtarja shqiptare do të ndeshet në 7 qershor pikërisht me Serbinë në Tiranë dhe ky veprim i Vuçiç mund të vlerësohet si shenjë afrimi dhe zbutje të retorikës mes tifozerisë së dy vendeve, e acaruar në ekstrem pas ngjarjeve të Beogradit, në 14 tetor 2014.

Macron mbërrin i fundit në Samitin e Tiranës, pritet me përqafime nga Rama

Mbërrin i fundit i liderëve europianë në tapetin e kuq ku kryeministri Rama priti pjesëmarrësit e Samitit Komunitetit Politik Eurpian. i cili zhvillon sot punimet në Tiranë.

Presidenti francez Emmanuel Macron pati një përqafim me kryeministrin Rama, ndërsa nuk pati një prononcim për mediat, ndryshe nga liderët e tjerë.

Q*lloi me a*me bashkejetuesen prokuroria FIER dergon per gjykim te pandehurin R.K. 

Prokuroria pranë Gjykatës së Shkallës së Parë të Juridiksionit të Përgjithshëm Fier përfundoi hetimet dhe dërgoi në gjyq shtetasin R.K. për veprat penale ‘Vrasja për shkak të marrëdhënieve familjare’, e mbetur në tentativë si dhe ‘Mbajtja pa leje dhe prodhimi i armëve, armëve shpërthyese dhe municionit’, parashikuar nga neni 79/c e 22 dhe 278/1 të Kodit Penal.

Nga hetimi i kryer në kuadër të procedimit penal nr.908, të vitit 2023 rezultoi se më datë 29.07.2023, i pandehuri R.K., ka tentuar të vrasë për motive të dobëta, shtetasen N.F., duke e qëlluar atë me armë zjarri pistoletë në bark. Ngjarja ka ndodhur për motive të dobëta, pasi për rreth një javë para ngjarjes, dy shtetasit ishin konfliktuar në lidhje me kursimet që ata i mbanin në një kuti për vajzën e tyre. Pasi i pandehuri R.K., ka parë se brenda saj nuk ishin aq lekë, sa ai mendonte se mund të ishin në kuti, nisën konfliktet ndërmjet tyre, arsye për të cilën shtetasja N.F. është larguar nga banesa dhe ka shkuar në shtëpinë e prindërve të saj.

Më datë 29.07.2023, i pandehuri R.K., ka shkuar për të biseduar me familjarët e bashkëjetueses me qëllim kthimin e kësaj të fundit në banesën e tyre por situata është përshkallëzuar dhe pasi e ka kërcënuar për jetën, duke e fyer edhe me fjalë fyese, i pandehuri ka nxjerrë nga brezi armën pistoletë dhe pasi e ka mbushur armën e ka qëlluar viktimën.

Në vijim, Prokuroria pranë Gjykatës së Shkallës së Parë Juridiksionit të Përgjithshëm Fier, shpreh angazhimin e plotë dhe vënien para përgjegjësisë ligjore të personave që kryejnë vepra penale kundër shëndetit dhe familjes.
 

Rikthehet bora në aksin Bogë–Theth

Rikthehen reshjet e borës në aksin Bogë-Theth në Shkodër. Aktualisht nga moti i përkeqësuar në 24 orët e fundit ka një shtresë të hollë bore dhe për momentin rruga është e kalueshme për automjetet. Aktualisht rruga e Thethit vijon që të jetë pa mirëmbajtje për shkak të anikimimit që kanë bërë firmat ndaj njëra-tjetrës. Në orët në vazhdim në rast se bora ngrihet duke u kthyer në akull mund të sjellë vështirësi për automjetet që lëvizin në atë aks. Përvecc borës, në disa pjesë rruga e Thethit ka edhe rënie gurësh

Diaspora/ Mbetet pa u numeruar vetëm vota e Greqisë, mbyllet për shtetet e tjera

Ka përfunduar numërimi i votave të të gjitha shteteve, ndërsa mbetet peng vetëm Greqia. Për 53 mijë votat e emigrantëve të Greqisë pritet të vendosë sot Celibashi, të cilët janë ‘bllokuar’ për shkak të kontestimeve të PD që çdo zarf i ardhur nga shteti helen të ndahet veç.Ka përfunduar numërimi i votës së diasporës në të gjitha shtetet, por 53 mijë votat e emigrantëve të Greqisë kanë mbetur ende peng, pas kontestimeve të PD  

Me 12 qarqet që u numëruan nga diaspora nuk kemi ndryshim mandatesh. PS mbetet me 83 mandate në rang vendi, PD me aleatët me rënie drastike me 50 mandate nga 63 që kishte në vitin 2021, PSD merr 3 mandate, 2 Partia Mundësia e Agron Shehajt, dhe nga 1 mandat Lëvizja Bashkë e Arlind Qorit dhe Nisma Shqipëria Bëhet e Adriatik Lapajt. Pritet të shihet se çfarë vendimi do të marrë Celibashi mbi fatin e votës së Greqisë. 

Jo vetëm brenda vendit, por edhe në diasporë, Partia Socialiste ka marrë mbështetjen më të madhe nga diaspora me 77 901, ose 54.18% të totalit të votave të numëruara. Koalicioni Partia Demokratike – Aleanca për Shqipërinë Madhështore (PD-ASHM) renditet i dyti me 40 510vota ose 28.17%. Në vend të tretë është Koalicioni Nisma Shqipëria Bëhet (NISMA-SHB) me 11 651 vota (8.10%).Partia Mundësia ka marrë 5 358 vota (3.73%), ndërsa Lëvizja Bashkë ka siguruar 3 848 vota (2.68%). Partia Socialdemokrate (PSD) ka marrë 1,947 vota (1.35%), ndërsa Partia Koalicioni Euroatlantik (KEA) ka grumbulluar 1 058 vota (0.74%). Ndër partitë më të vogla, Partia Aleanca Kombëtare Shqiptare (AKSH) ka marrë 779 vota (0.54%), Koalicioni Djathtas për Zhvillim (DZH) ka marrë 432 vota (0.30 %), Lëvizja Atdheu (LA) ka fituar 223 vota (0.16%), dhe Partia Aleanca Demokracia e Re (ADR) ka marrë 81 vota, që përfaqësojnë 0.06% të votave të numëruara.
Votat preferenciale për kandidatët nga diaspora ende nuk kanë nisur të numërohen, por panorama është thuajse e qartë se cilët do të jenë kandidatët e listës së hapur që futen në Kuvend, pasi nuk pritet të ketë ndryshim të madh në votat për preferenciale. 

Nga vota e diasporës, Partia Socialiste ishte e vetmja që arriti të marrë një mandat. Bëhet fjalë për mandatin në qarkun e Vlorës, që e rriti PS nga 8 mandate që kishte fituar me votën brenda vendit, në 9 mandate dhe PD-ASHM zbriti nga 4 mandate që kishte në vetëm 3. Në Tiranë, Partia Mundësia e Agron Shehajt mbrojti mandatin e dytë me disa dhjetëra vota, dhe nuk u rrëzua as nga diaspora duke e lënë PD-në këtë qark, me 13 mandate.
Partia Socialiste ka fituar bindshëm edhe me votën e diasporës, ku kryeson në 10 qarqet e vendit dhe me fitore të thellë. PD ka marrë fitore vetëm në dy qarqe, Shkodër dhe Kukës.
Sot në 09:30 mblidhet KQZ të vendosur se çfarë do të bëhet me votat e Greqisë. Procesi u fut në krizë për shkak të vendimmarrjes së kreut të KQZ-së Celibashi, për të veçuar zarfet e ardhura nga Greqia. 
Aktualisht të gjitha votat nga vendi fqinj janë të ndara veçmas, në kuti të ndryshme për të 12 qarqet. Shkak për këtë ndarje u bë një kërkesë e Partisë Demokratike që kur kutia e parë u hap, me pretendimin e manipulimeve, kërkesë që u pranua nga Kryekomisioneri Celibashi. Çdo zarf i Greqisë u kontestua dhe u veçua. Vendimi i Celibashit u rrëzua nga Komisioni i Ankimeve dhe Sanksioneve, vendimmarrja e të cilit u dërgua në Kolegjin Zgjedhor nga Partia Demokratike.

1...112113114...311Faqja 113 nga 311