Me nisjen e sezonit veror, Policia e Shtetit ka intensifikuar masat dhe kontrollet në terren me qëllim parandalimin e zjarreve, të cilat çdo vit shkaktojnë dëme të konsiderueshme në pyje, kullota dhe prona private.
Drejtori i Përgjithshëm i Policisë së Shtetit, Skënder Hita, deklaroi se strukturat policore do të jenë në gatishmëri të shtuar gjatë gjithë sezonit, ndërsa theksoi se çdo rast zjarrvënieje do të hetohet dhe autorët do të përballen me përgjegjësinë ligjore.
Sipas autoriteteve, fokusi i punës do të jetë si në zonat e rrezikuara nga zjarret, ashtu edhe në ndërgjegjësimin e qytetarëve për të shmangur veprimet që mund të çojnë në ndezje të pakontrolluara të flakëve.
Policia u ka bërë thirrje banorëve që të raportojnë menjëherë çdo rast të dyshimtë, duke theksuar se parandalimi mbetet elementi kyç për shmangien e emergjencave gjatë muajve të verës.
