Kryeministri Edi Rama mori pjesë këtë të hënë në Konferencën Ndërparlamentare mes përfaqësuesve të institucioneve shqiptare, Parlamentit Europian dhe parlamenteve të vendeve europiane, ku përcolli një mesazh të fortë për të ardhmen e rajonit në raport me Bashkimin Europian.
Në fjalën e tij, Rama kërkoi që Bashkimi Europian të mos e lërë Ballkanin Perëndimor në pritje të pafundme, duke theksuar se rajoni ka nevojë për mbështetje konkrete dhe një perspektivë të qartë integrimi.
Kreu i qeverisë shqiptare nënvizoi se sfidat gjeopolitike dhe zhvillimet e viteve të fundit kanë treguar rëndësinë strategjike të Ballkanit Perëndimor për vetë Evropën, duke argumentuar se procesi i zgjerimit duhet të mbetet një prioritet real dhe jo vetëm një premtim politik.
Rama theksoi se vendet e rajonit kanë bërë përpjekje të vazhdueshme për të avancuar reformat dhe për t’u afruar me standardet europiane, ndërsa kërkoi që Bashkimi Europian të tregojë vendosmëri dhe vizion në raport me integrimin e Ballkanit Perëndimor.
Konferenca Ndërparlamentare mblodhi në Tiranë përfaqësues të institucioneve shqiptare, eurodeputetë dhe delegacione parlamentare nga vende të ndryshme europiane, me fokus bashkëpunimin, procesin e zgjerimit dhe sfidat e përbashkëta të kontinentit.
