Një aksident i rëndë rrugor është regjistruar në autostradën Lushnjë–Rrogozhinë, në afërsi të fshatit Zhamë-Sektor, ku një automjet tip fuoristradë ka përplasur një këmbësore që po kalonte rrugën.
Sipas informacioneve paraprake, e aksidentuara është Bajame Ramazani, 75 vjeçe, banuese në Zhamë-Sektor. Mësohet se ajo po kalonte autostradën për të shkuar drejt tokave të saj bujqësore, duke kaluar mbi trafikndarëse, rreth 50 metra larg një mbikalimi për këmbësorët.
Si pasojë e përplasjes, e moshuara ka pësuar dëmtime të rënda dhe është transportuar me urgjencë në Spitalin e Lushnjës. Burime spitalore bëjnë me dije se ajo ndodhet në gjendje kritike dhe po merr trajtim në repartin e kujdesit intensiv.
Në vendngjarje kanë mbërritur shërbimet e Policisë Rrugore, të cilat kanë nisur hetimet për zbardhjen e plotë të shkaqeve të aksidentit, si edhe kanë ndërhyrë për normalizimin e qarkullimit në këtë segment. Drejtuesi i fuoristradës është shoqëruar në polici për veprimet procedurale dhe sqarimin e rrethanave të ngjarjes.
Sipas të dhënave paraprake, 75-vjeçarja kishte tentuar të kalonte autostradën për të arritur në pronat e saj bujqësore në anën tjetër të rrugës. Edhe pse në këtë segment ndodhet një mbikalim për këmbësorët, autoritetet kanë konstatuar se banorë të zonës shpesh zgjedhin ta kalojnë autostradën jashtë pikave të lejuara, duke rritur ndjeshëm rrezikun për aksidente.
Policia vijon hetimet për të përcaktuar përgjegjësitë dhe rrethanat e plota të ngjarjes.
