Prokuroria pranë Gjykatës së Shkallës së Parë të Juridiksionit të Përgjithshëm Fier ka reaguar pas publikimit në rrjetet sociale të videos ku shfaqet dhunimi i një të miture, duke bërë të ditur se ngjarja është nën hetim dhe se është regjistruar procedim penal për veprën “Heqja e paligjshme e lirisë”, e kryer në bashkëpunim.
Sipas Prokurorisë, më 10 qershor 2026 Komisariati i Policisë Fier referoi materialet procedurale për ngjarjen e ndodhur më 8 qershor, ku një 17-vjeçare kallëzoi se ishte dërguar në një banesë në Fier dhe më pas ishte dhunuar fizikisht nga disa të mitura.
Në kuadër të hetimeve, Prokuroria kërkoi caktimin e një mase sigurimi personal për një nga të miturat në konflikt me ligjin. Me vendim të datës 1 korrik 2026, Gjykata pranoi kërkesën dhe masa e sigurimit vijon të jetë në fuqi.
Hetimet po vazhdojnë për zbardhjen e plotë të rrethanave të ngjarjes, përcaktimin e përgjegjësive penale të personave të përfshirë, si edhe verifikimin e mënyrës së realizimit, ruajtjes dhe shpërndarjes së videos në rrjetet sociale.
Prokuroria thekson se, për shkak se në këtë procedim janë të përfshirë të mitur, mbrojtja e privatësisë dhe identitetit të tyre është detyrim ligjor. Për këtë arsye, u bën thirrje qytetarëve, administratorëve të faqeve në rrjetet sociale dhe mediave të mos publikojnë apo ripublikojnë pamje ose të dhëna që mund të çojnë në identifikimin e të miturve, në respekt të legjislacionit shqiptar dhe standardeve ndërkombëtare për mbrojtjen e fëmijëve.
