Prokuroria e Fierit ka goditur një nga skemat më të mëdha të dyshuara të përvetësimit të pronave në vend, duke çuar në arrestimin e katër personave dhe sekuestrimin e 1,143 hektarëve tokë, një sipërfaqe e barabartë me mbi 11.4 milionë metra katrorë ose rreth 1,600 fusha futbolli.
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Fier, është caktuar masa e sigurisë “Arrest në burg” për shtetasit E.Sh. dhe B.K., ish-drejtorë të ASHK-së Fier, P.Ç., specialist jurist pranë këtij institucioni, si dhe K.H., përfitues i pronave. Ata akuzohen për veprat penale të “Falsifikimit të dokumenteve”, “Shpërdorimit të detyrës” dhe “Pastrimit të produkteve të veprës penale”.
Sipas hetimeve, shtetasi K.H. ka paraqitur dy vendime të falsifikuara të Komisionit të Kthimit dhe Kompensimit të Pronave, duke arritur të regjistrojë në bashkëpronësi një sipërfaqe gjigante prej 1,143 hektarësh në zonat kadastrale të Semanit të Ri dhe Sheq Marinasit në Fier.
Prokuroria thotë se më pas kjo tokë është shitur tek dy shoqëri të ndryshme, ndërsa në proces janë përdorur edhe dokumente të tjera të dyshuara si të falsifikuara.
Nga hetimet ka rezultuar se zyrtarët e ASHK-së Fier kanë kryer regjistrimet në kundërshtim me ligjin, pa kryer verifikimet e detyrueshme që do të zbulonin falsifikimin e vendimeve të pronësisë. Gjithashtu, dyshohet se është regjistruar edhe sipërfaqe më e madhe nga ajo që parashikohej në dokumentacionin e paraqitur.
Një tjetër element i konstatuar nga organi i akuzës është ndryshimi i zërit kadastral nga “tokë arë” në “tokë pa frut”, pa miratimet e institucioneve kompetente.
Në kuadër të operacionit janë sekuestruar mbi 76 pasuri me sipërfaqe totale 1,143 hektarë tokë, si dhe 150 mijë euro.
Për të kuptuar përmasën e kësaj pasurie, sipërfaqja e sekuestruar është afërsisht sa 1,600 fusha standarde futbolli, duke e bërë këtë një nga sekuestrimet më të mëdha të tokës të raportuara vitet e fundit në qarkun e Fierit.
