Gazeta prestigjioze amerikane The New York Times i ka kushtuar një artikull debatit të krijuar në Shqipëri për financimin me fonde publike të koncertit të reperit amerikan Kanye West, i njohur si “Ye”, si dhe polemikave që shoqërojnë projektet e mëdha turistike në vend.
Sipas artikullit, kryeministri Edi Rama ka mbrojtur vendimin e qeverisë për të financuar koncertin me rreth 4.5 milionë dollarë, duke e cilësuar atë një investim strategjik për promovimin e Shqipërisë si destinacion turistik. Në reagimet e tij publike, Rama është shprehur se eventi pritet të sjellë përfitime të konsiderueshme ekonomike dhe të forcojë imazhin e vendit në arenën ndërkombëtare.
The New York Times thekson se, megjithëse qeveria ka argumentuar rëndësinë e koncertit, nuk janë bërë publike detaje të plota mbi përdorimin e fondeve. Gazeta rikujton gjithashtu deklaratën e ministrit të Turizmit, Blendi Gonxhja, sipas së cilës për këtë aktivitet po ndërtohet një stadium i përkohshëm me kapacitet rreth 60 mijë spektatorë.
Sipas raportimit, qeveria shqiptare pret që koncerti të gjenerojë rreth 114 milionë dollarë për ekonominë, përmes rritjes së turizmit, konsumit dhe aktivitetit të biznesit. Rama ka deklaruar se mbështetja financiare ishte e nevojshme për të garantuar organizimin e eventit dhe për të shmangur dëmtimin e reputacionit të Shqipërisë përballë vizitorëve që kanë siguruar tashmë biletat.
Artikulli e lidh këtë debat edhe me protestat që po zhvillohen kundër projektit turistik në bregdetin e Adriatikut, ku është i përfshirë Jared Kushner, dhëndri i presidentit amerikan Donald Trump. Sipas gazetës, Rama i ka cilësuar kritikat ndaj koncertit dhe projektit si pjesë të një fushate dezinformimi me motive politike, duke deklaruar se Shqipëria do të vijojë me projektet e saj të zhvillimit.
Në vijim, The New York Times ndalet edhe te figura e Kanye West, duke rikujtuar polemikat ndërkombëtare që artisti ka shkaktuar pas deklaratave antisemite dhe komenteve në mbështetje të Adolf Hitlerit dhe nazizmit, për të cilat më vonë ka kërkuar falje.
Në përfundim, gazeta vëren se turneu evropian i Kanye West është shoqëruar me reagime të ndryshme, ku disa koncerte janë anuluar, ndërsa të tjera janë zhvilluar me pjesëmarrje të lartë.
