Sektori i ndërtimit në Shqipëri ka regjistruar sërish rritje të kostove gjatë tremujorit të parë të vitit 2026. Sipas të dhënave zyrtare të INSTAT, Indeksi i Kushtimit në Ndërtim arriti në 114.4 pikë, duke shënuar një rritje vjetore prej 1.1%.
Ndikimin më të madh në këtë rritje e ka dhënë grupi “Shpenzime për paga”, i cili u rrit me 4.8% krahasuar me të njëjtën periudhë të vitit 2025. Në rritjen e kostove kanë ndikuar gjithashtu “Kosto të tjera” me 2.5%, transporti me 1.7% dhe makineritë me 1.5%.
Ndërkohë, materialet e ndërtimit kanë shënuar një ulje mesatare prej 0.9%. Rënia më e madhe është regjistruar te materialet bazë të ndërtimit (-1.4%) dhe ato hidro-sanitare e të ventilimit (-0.9%), ndërsa materialet elektrike dhe të komunikimit janë shtrenjtuar me 0.5%.
Krahasuar me tremujorin e katërt të vitit 2025, Indeksi i Kushtimit në Ndërtim u rrit me 0.3%, i nxitur kryesisht nga rritja e kategorisë “Kosto të tjera” me 1.7% dhe e shpenzimeve për paga me 0.6%.
Sipas INSTAT, megjithëse çmimet e materialeve po shfaqin shenja stabilizimi, kostot e punës, transportit dhe operimit vazhdojnë të ushtrojnë presion mbi sektorin, duke ndikuar në koston përfundimtare të projekteve të reja të ndërtimit.
