Drejtuesja politike e qarkut Fier nga Partia Socialiste, Belinda Balluku, ka festuar 8 Marsin së bashku me gratë socialiste të Fierit, në një aktivitet ku u përcollën mesazhe për forcimin e rolit të gruas në shoqëri dhe rritjen e pjesëmarrjes së saj në vendimmarrje.
Gjatë këtij takimi, Balluku theksoi rëndësinë që kanë gratë dhe vajzat në zhvillimin e vendit, duke nënvizuar se angazhimi i tyre në politikë, në institucione dhe në sektorë të rëndësishëm të ekonomisë është thelbësor për një shoqëri më të barabartë dhe më të drejtë.
Ajo vlerësoi kontributin e grave socialiste në Fier dhe i inkurajoi ato që të jenë edhe më aktive në jetën publike dhe politike, duke theksuar se fuqizimi i gruas mbetet një nga prioritetet kryesore të Partisë Socialiste.
Aktiviteti u zhvillua në kuadër të festimeve për 8 Marsin, ku gratë pjesëmarrëse ndanë urime dhe mesazhe solidariteti për rolin dhe kontributin e gruas në familje, shoqëri dhe politikë.
