Autoritetet sllovene bllokuan dhe asgjësuan 3.2 ton speca me origjinë nga Shqipëria, pasi analizat treguan ngarkesë të lartë me kimikate. Edhe pse tre insekticidet e përdorura janë të miratuara nga Ministria e Bujqësisë dhe nga BE, dy fermerë nga Zharrëza e Fierit kishin tejkaluar dozën e lejuar.
Sipas një specialisti të agronomisë, Agjencia Kombëtare e Veterinarisë dhe Mbrojtjes së Bimëve ka realizuar gjurmueshmërinë dhe ka konstatuar se fermerët e pranuan përdorimin e tepruar të preparateve bujqësore. Për këtë rast u mor një masë administrative – paralajmërim – ndërsa në rast përsëritjeje, ligji parashikon gjoba dhe deri në burgim.
Eksperti i bujqësisë, Shpend Shahini, shpjegon se kushtet klimaterike kanë rritur rezistencën e sëmundjeve në kultura, duke shtyrë fermerët të shtojnë spërkatjet dhe të mos respektojnë karencën, që është periudha e shpërbërjes së kimikatit.
Ai shton se një alternativë e sigurt dhe e qëndrueshme është kontrolli biologjik, ku përdorimi i organizmave të gjallë për të luftuar dëmtuesit redukton ndjeshëm numrin e spërkatjeve me kimikate.
