Një valë e re reformimi po përfshin pushtetin vendor në Shqipëri. Disa prej bashkive kryesore të vendit, përfshirë Durrësin, Shkodrën, Korçën, Dibrën, Fierin, Lushnjën dhe Elbasanin, kanë shpallur thirrje të hapura publike për aplikime në pozicione të rëndësishme drejtuese brenda sektorëve të tyre funksionalë.
Qëllimi kryesor i këtij procesi është përfshirja e prurjeve të reja me vizion, përvojë dhe integritet në strukturat vendore, duke fuqizuar qeverisjen lokale në përputhje me objektivat e Shqipërisë drejt integrimit europian.
“Aplikoni me kurajo dhe besim” – është mesazhi që shoqëron këtë nismë të gjerë, e cila synon të krijojë një administratë më të aftë, më transparente dhe të hapur ndaj qytetarëve. Kjo iniciativë konsiderohet një hap domethënës drejt profesionalizimit të mëtejshëm të administratës vendore dhe rritjes së besimit publik në institucionet lokale.
Vlora, si një nga bashkitë më aktive, e nisi e para këtë proces dhe aktualisht ndodhet në fazën e intervistave me kandidatët e përzgjedhur. Sipas burimeve nga pushteti vendor, procesi po zhvillohet me transparencë dhe vlerësim të thelluar të kapaciteteve dhe ideve të aplikantëve.
Ndërkohë, në Bashkinë e Tiranës po ndërtohet një strukturë e re organizative, e konceptuar në bashkëpunim me Institutin Tony Blair, një model i cili synohet të aplikohet më pas edhe në bashki të tjera të vendit. Kjo strukturë fokusohet në shtyllat themelore të mirëqeverisjes vendore, duke rritur llogaridhënien, efikasitetin dhe koordinimin institucional.
Ky transformim i administratës vendore është pjesë e vizionit më të gjerë të “Shqipërisë 2030 në Bashkimin Europian”, duke vendosur në qendër qytetarin, shërbimet cilësore dhe zhvillimin e qëndrueshëm.
Të gjithë të interesuarit janë të ftuar të aplikojnë në thirrjet e shpallura në faqet zyrtare të bashkive përkatëse.
Ky është momenti për të kontribuar drejtpërdrejt në ndërtimin e një Shqipërie më të drejtë, më funksionale dhe më europiane.
