520 të arrestuar, 16 prej tyre në kërkim ndërkombëtar

520 të arrestuar, 16 prej tyre në kërkim ndërkombëtar

59
SHPËRNDAJE

Njoftimi i policisë:

Strukturat e Policisë së Shtetit, gjatë muajit shkurt, kanë qenë të angazhuara maksimalisht, me të gjitha burimet njerëzore dhe ato logjistike, për përmbushjen e misionit, atë të sundimit të ligjit në territorin e vendit.

Informacionet e siguruara përmes inteligjencës informative dhe bashkëpunimi me qytetarët i kanë shërbyer Policisë së Shtetit, për të parandaluar ngjarje të rënda kriminale dhe për të goditur veprimtari të ndryshme që bien ndesh me ligjet e vendit.

Gjatë muajit shkurt 2023, janë finalizuar 94 operacione policore dhe janë vënë në pranga 520 shtetas, 16 prej tyre në kërkim ndërkombëtar.

Bashkëpunimi profesional i strukturave të Policisë së Shtetit me partnerët ndërkombëtarë, me koordinimin nga Qendra e Interpolit në Lyon, Francë, solli finalizimin e operacioneve për kapjen e 12 shtetasve në kërkim ndërkombëtar që fshiheshin në vendet e BE-së, në Dubai dhe në Shqipëri.

Plani operacional mbarëkombëtar i koduar “Fijet” vijoi me fazën e dymbëdhjetë dhe të trembëdhjetë të tij, si rezultat i të cilave u çmontuan dhe u sekuestruan 40 kamera të tjera të vendosura në kundërshtim me ligjin, në disa qarqe. 15 shtetas u vunë në hetim, për cenim të privatësisë. Që nga nisja e operacionit deri tani, janë çmontuar 548 kamera dhe janë vënë në hetim 116 shtetas.

Si rezultat i hetimeve të pandërprera në të gjithë vendin, janë evidentuar dhe goditur 123 raste të krimeve ekonomike dhe financiare.

Janë goditur 15 raste të kontrabandës së naftës, ilaçeve, cigareve, kafes, lëndëve piroteknike e mallrave të tjera. Gjatë operacionit “Embargo”, u sekuestrua një anije çisternë me të cilën u tentua të futeshin kontrabandë 22 500 tonë naftë, në Shqipëri, nëpërmjet portit të Durrësit. Gjithashtu, gjatë 2 operaciove dhe rasteve të tjera të goditura, janë sekuestruar medikamente mjekësore, celularë, lëndë pesticide, kafe dhe mallra të tjera të kontrabanduara.

Në kuadër të punës hetimore për gjurmimin dhe identifikimin e pasurive që rrjedhin nga aktiviteti kriminal është organizuar nga DVP Tiranë, operacioni policor i koduar “Resort 2012”, i cili është finalizuar me sekuestrimin e pasurive që arrijnë vlerën 3 milionë euro, në emër të një shtetasi të dënuar për trafikim droge. Gjithashtu, Policia e Shtetit ka sekuestruar 2 apartamente dhe 1 automjet, në pronësi të një shtetasi të akuzuar si pjesëtar i një grupi kriminal.

Reagimi i menjëhershëm dhe ndërhyrja në kohë e Policisë, parandaloi përshkallëzimin e konflikteve mes shtetasve të ndryshëm, në 8 raste.

Falë inteligjencës informative, shërbimet e Policisë parandaluan ngjarje të rënda kriminale në fushën e krimeve kundër personit, në Elbasan dhe në Vlorë. Në Elbasan u sekuestruan 4 armë zjarri, 2 bidona me lëndë djegëse dhe 1 automjet i vjedhur, ndërsa në Vlorë u sekuestruan 3 mina me telekomandë.

Si rezultat i veprimeve hetimore të thelluara nga Policia, janë zbardhur 3 ngjarje kriminale të ndodhura në Tiranë, Librazhd dhe Maliq dhe 1 aksident i ndodhur në Durrës. 3 autorë të dyshuar janë vënë në pranga, 1 tjetër është shpallur në kërkim.

Goditja e armëmbajtjes pa leje ka qenë prioritet i punës së Policisë, gjatë këtij muaji. 14 operacione dhe 68 raste për goditjen e kësaj veprimtarie kriminale, kanë vënë në sekuestro: 276 kg lëndë plasëse, 33 armë zjarri, 6 armë gjahu, 30 kallëpe me lëndë plasëse, 4 mina të montuara me C4, 8 granata, 2 ndezës granatash, 290 kapsolla detonatore dhe municion luftarak.

Parandalimi i kultivimit të bimëve narkotike ka qenë një tjetër prioritet i punës së strukturave policore, në të gjithë vendin. Gjatë muajit shkurt u zhvilluan 17 operacione dhe u goditën 196 raste, si rezultat i të cilave u sekuestruan rreth 27 kg kanabis, 2.2 kg kokainë, 4 kg heroinë, fara kanabisi dhe shumat 186 700 euro, 400 dollarë dhe rreth 1 milionë e gjysmë lekë të rinj, të përfituara nga shitja e lëndëve narkotike në doza.

Kontrolli i imtësishëm i ambienteve, bazuar dhe në inteligjencën policore, çoi në goditjen e 3 rasteve të kultivimit të bimëve narkotike. Gjatë operacionit “Indoors” të zhvilluar në Vlorë dhe operacionit “Vila” të zhvilluar në Fier, janë bllokuar 2 ndërtesa (vila) dhe një ambient në një fshat të Selenicës, të cilat ishin përshtatur për kultivimin e bimëve narkotike, me anë të llambave.

Operacionet e zhvilluara në Fier dhe në Vlorë, çuan në pranga 9 shtetas, nga të cilët 6 punonjës të OSHEE-së, si dhe në sekuestrimin e 715 bimëve narkotike, qindra llambave elektrike, gjeneratorëve dhe aksesorëve të tjerë që shërbenin për kultivimin e bimëve narkotike, me anë të llambave.

Kontrolli i pandërprerë i territorit solli rezultat edhe goditjen 49 rasteve të krimeve mjedisore, në zonat e mbrojtura dhe në zona të tjera. Prerja e paligjshme e pyjeve, nxjerrja e pllakave dekorative, në malin e Tomorrit, gërryerja e paligjshme e lumenjve, ndërtimet pa leje dhe shkatërrimi i pronës me zjarr, çuan në pranga 9 shtetas dhe në  hetim 45 shtetas të tjerë.

14 operacione për goditjen e veprimtarisë së kundërligjshme të lojërave të fatit janë finalizuar me sekuestrimin e 7 makinetave, 6 tavolinave të pokerit, dhjetëra aparateve celulare, sendeve të tjera dhe shumave të parave që janë përfituar nga kjo paligjshmëri.

Monitorimi i akseve rrugore, me pajisje logjistike bashkëkohore, ka vijuar çdo ditë të këtij muaji, me qëllim rritjen e parametrave të sigurisë rrugore. Si rezultat janë pezulluar lejet e drejtimit të 2279 shtetasve që kanë kryer shkelje të ndryshme, janë vënë në pranga 406 shtetas që drejtonin automjetin, nën efektin e alkoolit apo pa leje drejtimi, dhe 7 të tjerë që e drejtonin atë, nën efektin e lëndëve narkotike.

Shërbimet e Policisë Kufitare, krahas ofrimit të shërbimit sa më cilësor për qytetarët që hyjnë apo dalin nga territori i Republikës së Shqipërisë, kanë shtuar kontrollet edhe për evidentimin e paligjshmërisë.

Si rezultat, janë goditur: 36 raste të kalimit të paligjshëm të kufirit, 8 raste të dhënies ndihmë për kalim të paligjshëm të kufirit, 13 raste të falsifikimit të dokumenteve, 11 raste të mosdeklarimit të të hollave, 6 raste të kontrabandës së mallrave, 1 rast në fushën e narkotikëve, 2 raste të trafikimit të mjeteve motorike dhe 1 rast i korrupsionit aktiv.

Janë sekuestruar rreth 237 000 euro, 21 790 paund dhe 10 000 franga, të padeklaruara në pikat e kalimit kufitar.

Gjatë muajit shkurt, nga shërbimet e Policisë Kufitare dhe ato të drejtorive vendore në qarqe, janë evidentuar dhe goditur 43 raste të dhënies ndihmë për kalim të paligjshëm të kufijve.

Shërbimet e Policisë do të vijojnë kontrollin në të gjithë territorin e vendit, me qëllim evidentimin, parandalimin dhe goditjen e çdo veprimtarie kriminale, si dhe do të forcojnë akoma më tej bashkëpunimim me partnerët dhe agjencitë ligjzbatuese, brenda dhe jashtë vendit, për të luftuar krimin e organizuar dhe për kapjen e personave në kërkim ndërkombëtar.

Bashkëpunimi me qytetarët mbetet arma më e fortë e Policisë së Shtetit, në luftën kundër krimit, ndaj i ftojmë ata që të denoncojnë pranë strukturave të Policisë së Shtetit, çdo rast të veprimtarive kriminale, duke iu siguruar anonimat të plotë dhe reagim të menjëhershëm e profesional.

S'KA KOMENTE