Në Shqipëri, policia arrestoi pesë persona dhe ka shpallur në kërkim katër të tjerë nën akuzat se kanë kryer atentat me armë zjarri tre vite më parë ndaj ish-prokurorit Arian Ndoja dhe dy personave të tjerë, në afërsi të mbikalimit të Shkozetit, teksa udhëtonin në autostradën Tiranë – Durrës.

Gjykata e Posaçme kundër Korrupsionit dhe Krimit të Organizuar vendosi të arrestuarit nën akuzat e vrasjes së funksionarëve publikë në tentativë, grup i strukturuar kriminal, mbajtje armësh dhe municioni pa leje si dhe vjedhje të përsëritura.

Tre nga të arrestuarit janë banorë të Durrësit dhe dy të tjerë janë banues në Tiranë.

Ata dhe katër të tjerët e shpallur në kërkim, kanë bashkëpunuar në sulmin me armë zjarri që u krye në nëntor të vitit 2019 ndaj automjetit me të cilin po udhëtonin nga Durrësi në Tiranë ish prokurori Arian Ndoja, Aleksandër Laho dhe Andi Maloku. Ky i fundit ndërroi jetë në spital, ndërsa dy të tjerët u mjekuan nga armët e zjarrit.

Forcat e rendit kontrolluan gjatë operacionit “Komploti” nën koordinimin e SPAK-ut 11 banesa në Tiranë, Durrës dhe Fushë Krujë, ku sekuestruan armë, jelek antiplumb, dylbi, monedha, telefonë dhe dokumente pronash.

SPAK (Struktura e Posaçme kundër Krimit dhe Korruësionit) njoftoi se pas atij atentati ishin identifikuar fillimisht të pandehurit Redjan Rraja dhe Ariol Halilaj, për të cilët po vijon gjykimi pranë Gjykatës së Posaçme.

Ndërsa për identifikimin e bashkëpunëtorëve të tjerë që kanë marrë pjesë në këto ngjarje ishin veçuar aktet ligjore dhe vazhduan hetimet, deri sot kur ata një pjesë u arrestuan dhe pjesa tjetër u shpallën në kërkim.

Organet e rendit po bashkëpunojnë me autoritetet e huaja për kapjen dhe ekstradimin e tyre.

Hetimi u përmbyll nga bashkëpunimi i ngushtë mes policisë Byrosë Kombëtare të Hetimit, si dhe agjencive të huaja të zbatimit të ligjit, bëri të ditur SPAK.

Ish prokurori i Durrësit, Arian Ndoja u sulmua me breshëri automatiku dhe mbeti i plagosur gjatë ecjes në autostradë në një automjet me Aleksandër Laho, ndërsa shoferi Andi Maloku humbi jetën.

Ish prokurori Ndoja kishte urdhëruar atë kohë arrestimin e Drejtorit të Hipotekës së Durrësit, Liridon Pula. Para se të emërohej prokuror, Ndoja kishte punuar si avokat Laho, personi që udhëtonte me të në makinë, është i dyshuar për përfshirje ne aktivitete kriminale, që ka ndryshuar disa herë identitetin.

Arjan Ndoja u shkarkua nga detyra më 6 maj 2022, pasi Komisioni i Pavarur i Kualifikimit konstatoi një sërë problemesh gjatë hetimit në kriterin e figurës dhe profesionalizmit, që u konsideruan se kishin cënuar besimin e publikut tek drejtësia./ VOA

Aldo Bare, i cilësuar ndryshe si ish-kreu i Bandës së Lushnjës, kërkon ulje të dënimit në Gjykatën e Elbasanit. Në procesin e zhvilluar mesditën e sotme avokati mbrojtës i tij kërkoi shtyrje të gjyqit, ndërsa hodhi akuza në drejtim të trupit gjykues.

Mbrojtësi i tij, Oligert Kume tha se është kërkuar ulje dënimi për vitet 2014-2021 referuar Ligjit për trajtimin e të burgosurve pasi për çdo vit ligji parashikon ulje dënimi me 45 ditë kalendarike duke patur parasysh amnistinë e vitit 2014.

“Duke marrë shkas që ne nuk kishim dijeni për këto prova të sjella sot, kemi kërkuar shtyrjen dhe zhvillimin në një datë tjetër të seancës. Në datën 22 dhjetor 2022 nga Gjykata e Lartë në dhomë këshillimi pa prezencë të palëve është marrë një vendim absurd juridik, sepse është shkelmuar vendimi i Gjykatës Kushtetuese i 2017 që urdhëronte Gjykatën e Lartë të merrte në shqyrtim dhe njëherë këtë çështjes duke mos i mohuar të drejtën palëve për t’u përfaqësuar dhe bërë një mbrojtje. Është përdhosur një vendim duke bërë një puç kushtetues sepse vendimet e Gjykatës Kushtetuese janë akte që detyrojnë çdo gjykatë t’i zbatojë.

Trupa gjyqësore që nuk kishte as kualifikimin e duhur për këtë çështjes, pasi dy prej anëtarëve nuk kanë pasur specializimin e duhur dhe në një hark kohor të shkurtër kanë lënë në fuqi vendimin kapital. Ne do të ndërmarrim hapat tona të nevojshëm për ta goditur këtë akt pranë Gjykatës Kushtetuese duke informuar dhe ILD, duke referuar dhe kërkuar hetim disiplinor për këtë çështjes që kanë bërë gjyqtarët për çështjen në fjalë.

Në Gjykatën Kushtetuese do kërkojmë sërish rrëzimin e vendimit të Gjykatës së Lartë pasi na janë mohuar të drejtat për mbrojtje. Nëse Gjykata Kushtetuese nuk do ta marrë në shqyrtim do t’i adresohemi Gjykatës së Strasburgut për të drejtat e njeriut“ u shpreh Kume në një prononcim për mediat.

Aldo Bare është dënuar me “burg përjetë” për 4 vrasje mes tyre dhe Artur Dajës me të cilin banda e tij u konfliktua gjatë viteve ‘97 pasi këta të fundit i vranë vëllain. Të tjerë krime sipas vendimit të 2011 janë 4 vrasje të mbetura në tentativë, krijim i organizatës kriminale dhe armëmbajtje pa leje.

Aldo Bare u ekstradua në Shqipëri më 25 nëntor 2009 nga Ankaraja e Turqisë ku u arrestua për llogari të drejtësisë shqiptare. Nga ana tjetër, Prokuroria për Krimet e Rënda akuzonte Baren për të paktën 15 vrasje, krijim të organizatës kriminale, shkatërrim prone me zjarr si dhe trafik droge

Një person i dëmtuar rëndë është paraqitur mbrëmjen e 18 janarit ne Spital.

I dëmtuari ka dëmtime te renda në fytyrë e trup, thyerje të hundës, thyerje të dhëmbit, thyerje të njërit gisht. Identiteti i te dhunuarit është Gentian Omeri, 39-vjec nga fshati Verve, Bashkia Konispol.

Nga ky konstatim policia ka nisur hetimin për kapje e autorëve të ngjarjes.

Njoftim policie:

Sarandë/Finalizohet operacioni policor i koduar “Pengmarrja”, për zbardhjen e një ngjarjeje kriminale në fushën e krimeve kundër personit.

Operacioni u zhvillua nga Forca Operacionale e DVP Vlorë, në bashkëpunim me Komisariatin e Policisë Sarandë dhe FNSH, nën drejtimin e Prokurorisë së Sarandës.

Rrëmbyen një shtetas, e mbajtën me forcë në automjetin e tyre, e plagosën rëndë atë, me sende të forta dhe e lanë pa ndjenja, në rrugë, Policia identifikon dhe vë në pranga, brenda pak orësh, 4 autorët e dyshuar, njëri prej tyre me precedent kriminal. Shpallet në kërkim bashkëpunëtori i tyre.

Më datë 19.01.2023, rreth orës 01:00, salla operative Sarandë ka marrë njoftim se disa shtetas po ndiqnin me automjet shtetasin G. O. dhe po i rrezikohej jeta prej tyre.

Menjëherë pas marrjes së njoftimit, shërbimet e Policisë kanë reaguar me shpejtësi, duke shkuar në vendngjarje dhe kanë konstatuar në rrugën e fshatit Xarrë, shtetasin G. O., të plagosur rëndë fizikisht, i cili është dërguar menjëherë në spitalin e Sarandës, ku ndodhet aktualisht, nën kujdesin e mjekëve.

Falë veprimeve të shpejta hetimore dhe profesionale nga shërbimet e Policisë, në kuadër të operacionit policor të koduar “Pengmarrja”, bazuar dhe në informacionet e siguruara nga inteligjenca informative, brenda pak orësh është bërë e mundur zbardhja e rrethanave të ngjarjes dhe identifikimi i autorëve të dyshuar të saj.

Në vijim të veprimeve dhe ndjekjes të pandërprerë nga shërbimet e Policisë, rreth orës 04:00, u bë lokalizimi në fshatin Shëndelli dhe prangosja e 4 autorëve të dyshuar, konkretisht e shtetasve:

P. N., 30 vjeç (me precedent të mëparshëm kriminal në fushën e narkotikëve), A. N., 21 vjeç, A. N., 44 vjeç dhe A. N., 21 vjeç (të afërm të njëri-tjetrit), të gjithë banues në fshatin Shëndelli, Sarandë.

Gjithashtu u bë shpallja në kërkim shtetasit A. N., 39 vjeç, banues në Shëndelli, Sarandë. Vijon puna për kapjen e tij.

Nga veprimet hetimore dyshohet se këta shtetas, në bashkëpunim me njëri-tjetrin, për motive të dobëta, kanë përplasur me dashje automjetin që drejtonte shtetasi G. O., të cilin e kanë plagosur duke e goditur me sende të forta, e më pas e kanë futur në automjetin e tyre, duke e mbajtur aty me forcë, dhe më pas e kanë lënë pa ndjenja, në rrugë.

Në cilësinë e provës materiale u sekuestruan 3 automjete që përdoreshin nga të arrestuarit dhe 7 aparate celulare.

Materialet hetimore i kaluan Prokurorisë pranë Gjykatës së Rrethit Gjyqësor Sarandë, për veprat penale “Plagosja e rendë me dashje”, “Heqja e paligjshme e lirisë” dhe “Shkatërrimi i pronës”, të kryera në bashkëpunim.

Të tjera detaje dalin në dritë në lidhje me mësuesin që ra pre e dhunës pak ditë më parë në Tepelenë, i cili ndodhet pas hekurave nën akuzën e ngacmimeve seksuale ndaj të miturve. Mesohet se Kleanthi Laçi rezulton të jetë këshilltar i PS-së në Bashkinë e Tepelenës, ndërkohë që ai është pezulluar nga detyra si mësues deri në zbardhjen e ngjarjes. 

Ai ndodhet pas hekurave pas denoncimit të një vajze 13-vjeçeje, ndërsa vëllai i saj e dhunoi duke e bërë për spital.

Autoritetet britanike kanë kthyer në Shqipëri 26 shqiptarë. Lajmi është bërë i ditur nga Home Office në Londër. Mes të deportuarve janë edhe persona të përfshirë në aktivitete kriminale, mes tyre dhe të dënuar për drogë të klasit A.

Britania e Madhe ka nisur një fushatë për largimin e shqiptarëve ilegalë dhe kthimin e tyre në atdhe. 

Ndërkohë nuk kanë munguar deklaratat e forta të zyrtarëve britanikë ku kërkojnë rikthimin në Shqipëri të emigrantëve që kanë hyrë ilegalisht, madje disa prej tyre nuk e kanë shmangur edhe gjuhën e rëndë kundër shqiptarëve.

DVP Fier/Vihen në pranga 2 shtetas, për dhune ne familje

Specialistët për Hetimin e Krimeve të Komisariatit të Policisë Fier arrestuan në flagrancë shtetasit:

-A. H., 42 vjeç, banues në Fier, pasi ka ushtruar dhunë ndaj babait të tij;

-M. K., 24 vjeç, banues në Fier, pasi ka ushtruar dhunë ndaj nënës së tij.

Nderkohe Specialistët për Hetimin e Krimeve të Komisariatit të Policisë Divjakë arrestuan në flagrancë shtetasen S. B., 48 vjeçe, banuese në Çermë Sektor, Divjakë, pasi dyshohet se ka kanosur me mjet prerës, një shtetas.

Materialet procedurale i kaluan Prokurorisë, për veprime të mëtejshme.