Kompanitë greke po rikthejnë vëmendjen për të investuar në Shqipëri, në sektorë të ndryshëm që cilësohen me potencial. Në një intervistë për televizionin Scan, Marios Belibassakis, Këshilltari i parë i Ambasadores Greke për Çështjen Ekonomike dhe Tregtare, deklaroi se tashmë që Greqia e ka kaluar krizën ekonomike dhe financiare, kompanitë kanë një oreks dhe kapitale për tu zgjeruar në Shqipëri dhe në rajon.
“Me Greqinë që e ka kaluar tashmë krizën ekonomike, ka një dëshirë të madhe dhe oreks mes kompanive greke për tu zgjeruar në tregje të reja, duke përfshirë edhe Shqipërinë. Afërsia gjeografike dhe kulturore mes dy vendeve tona, e forcojnë klimën e të bërit biznes dhe e bëjnë më të thjeshtë për të pasur bashkëpunim dhe marrëdhënie efektive. Shumë shqiptarë jetojnë në Greqi, kanë jetuar në Greqi apo kanë lidhje familjare. Kjo e lehtëson akoma më shumë mirëkuptimin reciprok mes dy vendeve tona,” u shpreh Marios Belibassakis, Këshilltari i parë për Çështjen Ekonomike dhe Tregtare në Ambasadën Greke.
Gjithashtu, Belibassakis evidenton edhe disa prej sektorëve në vendin tonë, që kanë potencial të madh për tu zhvilluar, duke përfshirë këtu edhe inteligjencën artificiale.
“Interesi i tyre është një tregues i klimës së favorshme të të bërit biznes dhe i potencialit që ekziston në tregun shqiptar. Gjatë qëndrimit tim në Shqipëri, kam identifikuar disa sektorë për investime, veçanërisht sektori i ndërtimit, sektori i materialeve të ndërtimit që janë të ndërlidhur së bashku, këshillimi, farmaceutika apo industria e ushqimit. Gjithashtu, besoj se infrastruktura e fibrave optike, rrjetet “smart” të komunikimit dhe inteligjenca artificiale e lidhur me teknologjinë, kanë një potencial të madh për zhvillim të mëtejshëm për Shqipërinë,” tha Belibassakis.
Kompanitë greke kanë qenë ndër të parat që kanë investuar në Shqipëri pas viteve 90. Por, kriza financiare globale, që nxorri në pah problemet e borxhit të Greqisë dekadën e kaluar, detyroi shumë kompani të tërhiqen nga tregje kryesisht të vogla, për të reduktuar shpenzimet.
SCAN
