Kreu i Grupit Parlamentar të PD, Gazment Bardhi ka deklaruar se Presidenti i Republikës Bajram Begaj përveç detyrës së tij si kreu i Shtetit rezulton i punësuar në një klinikë mjekësore private.

Ai u shpreh se Begaj punon “paradite si President dhe pasdite si mjek”.

Bardhi theksoi ndalimin ligjor për Presidentin e Republikës që të ushtrojë detyra të tjera veç asaj të Kreut të Shtetit.

Tensionet mes punonjësve dhe kompanisë “Bankers Petroleum” kanë arritur kulmin. Sindikata e Punonjësve ka njoftuar se nesër, në orën 07:00, të gjithë punonjësit do të pezullojnë punën, duke nisur grevën e përgjithshme përballë zyrave të kompanisë në Marinëz.

Vendimi vjen pas dështimit të negociatave me kompaninë, që sipas Sindikatës, ka refuzuar të pranojë kërkesat për rritjen e fondit të përgjithshëm të pagave me 9% dhe për uljen e pabarazisë mes pagave të larta dhe të ulëta.

Në njoftimin publik, Sindikata akuzon kompaninë se po përpiqet të manipulojë opinionin dhe të përçajë punonjësit, duke përhapur pretendime të pavërteta rreth një “rritjeje për disa individë”.

“Kërkesa jonë është e qartë: rritje e fondit total të pagave dhe shpërndarje e drejtë për punonjësit me paga të ulëta. Nuk kërkojmë përfitime për ata që marrin mijëra euro, por dinjitet për ata që mbajnë mbi shpinë punën më të rëndë,” – thuhet në deklaratën e Sindikatës.

Përfaqësuesit sindikalë paralajmërojnë se, nëse kërkesat nuk merren parasysh, pas pezullimit të punës do të ndërmerret greva e urisë, si formë e fundit e protestës.

“Kauza jonë është e drejtë dhe e ligjshme. Nëse nuk dëgjohen zërat tanë, do të vijojmë me grevë urie, derisa të realizohen kërkesat për paga dinjitoze dhe barazi,” – thuhet në njoftim.

Sipas Sindikatës, oferta e kompanisë për 4200 lekë shtesë në muaj për dietën ushqimore është konsideruar “fyese” dhe “larg realitetit të kostos së jetesës”.

Punonjësit shprehen të vendosur se nuk do të tërhiqen deri në plotësimin e kërkesave të tyre, ndërsa greva do të nisë nesër në mëngjes në Marinëz, ku pritet pjesëmarrje masive e punonjësve të sektorëve të ndryshëm.

Deputeti i Partisë Demokratike, Saimir Korreshi, nuk i kursente ironitë gjatë raportimit të kryeprokurorit Olsjan Cela në Komisionin e Ligjeve. Ai e krahasoi kryeprokurorin me një “magazines pa mall”, duke vënë në dyshim rolin dhe kompetencat e tij.

“Do ta nis nga Fieri, se aty ke transferuar hartën e re. I nderuar zoti prokuror, dukesh si magazinier pa magazinë. Duket sikur inventarizon, por nuk mund të kontrollosh hyrje e dalje,” tha Korreshi.

Deputeti theksoi se perceptimi i qytetarëve për reformën në drejtësi lidhet kryesisht me SPAK, por sipas tij, reforma ka dështuar. “Ka më shumë të dënuar për vepra penale dhe kundërvajtje, duke prekur drejtpërdrejt jetën e të rinjve,” shtoi ai.

Korreshi ngriti pyetje për ligjin e Prokurorit të Përgjithshëm, duke sugjeruar nevojën për një balancim të kompetencave: “A duhet të ndërhyjmë për të pasur një kontroll efektiv mbi prokurorët e niveleve më të ulëta, pa kthyer kompetencat aty ku ishin më parë? Sot duket sikur kryeprokurori ka humbur fuqinë e tij.”

Gjatë fjalës së tij, deputeti solli shembuj të rasteve që sipas tij reflektojnë padrejtësi, nga dhuna në familje deri te penalizimet për sasi të vogla droge. Ai ironizoi kontrastin mes rasteve: “Njeri dënohet për një cigare hashash, tjetri për një ton del nga burgu. Çfarë logjike ka kjo?”

Fjala e tij u prit me të qeshura në sallë, ndërsa ai iu drejtua edhe prokurorëve të pranishëm: “Zoti Ulsi, mos u mërzisni. Nuk mërzitem unë që jam hero, jo ti që je armik. Kaq kisha.”