Policia e Shtetit ka hartuar planin e masave për garantimin e rendit dhe sigurisë gjatë protestës kombëtare të thirrur nga opozita, e cila do të zhvillohet të martën, më 10 shkurt, në orën 17:00, para Kryeministrisë.

Sipas burimeve për Euronews Albania, mbi 1.000 efektivë do të jenë në terren dhe në gatishmëri. Përveç forcave të rendit, do të angazhohen edhe Forcat Kombëtare të Sigurisë, RENEA, si dhe agjentë civilë.

Kufizime dhe bllokime të qarkullimit

Duke nisur nga ora 23:45 e së hënës, do të ndalohet parkimi i automjeteve në bulevardin “Dëshmorët e Kombit”, nga zona e njohur si “Ura e Dajtit” deri te rruga “Ismail Qemali”, deri në përfundim të tubimit.

Ndërsa nga ora 15:00 e së martës dhe deri në mbylljen e protestës, do të bllokohet qarkullimi i automjeteve në:

• Bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”
• Rrugët “Ukraina e Lirë”, “Papa Gjon Pali II” dhe “Ismail Qemali”

Në varësi të situatës, kufizime mund të vendosen edhe në akse të tjera rrugore. Policia e Tiranës ka parashikuar devijime të qarkullimit në rrugë alternative.

Apel për qytetarët

Policia u bën thirrje qytetarëve që të shmangin lëvizjen me automjete në akset e bllokuara, për të mos penguar zhvillimin e tubimit dhe lëvizjen e pjesëmarrësve.

Çfarë ndodhi në protestën e mëparshme

Në protestën e 24 janarit, u arrestuan 18 persona, 17 të tjerë u proceduan penalisht dhe dy protestues u shpallën në kërkim. Gjithashtu, u dëmtuan 11 punonjës policie, të cilët morën ndihmë mjekësore në spital.

Po ashtu, u procedua penalisht edhe sekretari organizativ i Partisë Demokratike, për veprën penale “Organizimi dhe pjesëmarrja në grumbullime dhe manifestime të paligjshme”.

Drejtoria Vendore e Policisë Fier

Specialistët e Qarkullimit Rrugor të DVP Fier arrestuan shtetasin P. H., 36 vjeç, banues në Patos, pasi u konstatua duke drejtuar automjetin, në gjendje të dehur.

Specialistët për Hetimin e Krimeve të Komisariatit të Policisë Fier arrestuan shtetasin F. P., 39 vjeç, banues në Fier, pasi gjatë kontrollit të celularit të tij, u gjetën faqe online për baste sportive. Celulari u sekuestrua në cilësinë e provës materiale.

Specialistët për Hetimin e Krimeve të Komisariatit të Policisë Mallakastër arrestuan shtetasin Sh. Sh., 50 vjeç, banues në fshatin Kapaj, pasi dyshohet se ka ushtruar dhunë ndaj bashkëshortes së tij.

Specialistët për Hetimin e Krimeve të Stacionit të Policisë Patos arrestuan shtetasin F. B., 28 vjeç, banues në Patos, pasi dyshohet se ka vjedhur një shumë parash në një dyqan në Patos.

Në Komisatiatin e Policisë Fier, ka kallëzuar shtetasi A. Rr., 35 vjeç, banues në Fier, se janë vjedhur disa materiale pune në kantierin në pronësi të tij. Po punohet për identifikimin dhe kapjen e autorit/ve.

Materialet procedurale iu referuan Prokurorisë së Fierit, për veprime të mëtejshme.

Ndoshta është një rast i përsëritur kur forca politike që të vesh me pushtet e keqpërdor atë, duke mos njohur më fuqinë që e ka marrë nga vetë qytetarët. Pas Vlorës me ish-kryebashkiakun Dritan Leli, një situatë e ngjashme po shfaqet në Fier, Durrës, Elbasan etj. Per ilustrim le ti referohemi Fierit të cilin e njoh në detaje per shkak të profilit të punës time.

Duke përfituar nga pezullimi nga detyra i zëvendëskryeministres Belinda Balluku, në Fier ka nisur një valë reagimesh dhe sulmesh në rrjetet sociale, që kundërshtojnë hapur strategjinë e kryeministrit Edi Rama për ristrukturimin e drejtimit të punës dhe shërbimeve në aparatin e bashkisë. Lëkundja e pozitave të Ballukut dhe vëmendja e madhe publike ndaj kësaj çështjeje, për shkak të vendimit të fundit të Gjykatës Kushtetuese, kanë ringjallur ambicie të vjetra për pushtet lokal.

Në Fier po përpiqen të rikthehen skema të njohura, ku disa individë kërkojnë të vendosin sërish se kush emërohet, kush largohet dhe kush kontrollon institucionet, jo vetëm në bashki, por në të gjithë administratën publike.

Për të ringjallur shpresë tek mbështetësit e tyre dhe për të mbjellë përçarje, njerëz pa integritet dhe pa autoritet moral janë hedhur në sulm në rrjetet sociale, duke përdorur një tezë të rrezikshme: se Fier nuk drejtohet nga fierakë, por nga “të ardhur nga rrethet e tjera”.

Kjo propagandë, e verbuar nga urrejtja anti-PS, nuk kupton se tronditja e strukturave dhe nxitja e ndasive dëmton në radhë të parë vetë Partinë Socialiste, veçanërisht në prag të zgjedhjeve vendore, kur në krye të Bashkisë Fier pritet të jetë një emër i ri, ose dhe aktuali Subashi ( kjo varet nga “konjuktura” e brendshme politike e PS-se)

Më kryesorja është se ky argument nuk qëndron. Faktet flasin ndryshe. Ja lista e drejtuesve aktualë në institucionet kryesore të Fierit:
• Drejtoria e Tatimeve – Saimir Zotaj (Fier)
• Drejtoria e Hetimit Tatimor – Xhuljo Rushi (Fier)
• Bordi i Kullimit – Theodor Stefa (Fier)
• Drejtoria e Transportit dhe Automjeteve – Alban Toska (Fier)
• Drejtoria e Spitalit Rajonal – Arben Voja (Fier)
• Zyra e Hipotekës – Everest Gazheli (Lushnje)
• Drejtoria e Sigurimeve Shoqërore – Andius Olldashi (Fier)
• Fondi i Sigurimit Shëndetësor – Nevila Doko (Fier)

Ndërkohë, Ujësjellësi, OSHEE dhe Albpetrol janë shoqëri aksionare që drejtohen nga borde, dhe drejtuesit e tyre, pas marrjes së detyrës, janë rezidentë në Fier.

Pra, narrativa se institucionet “drejtohen nga të huaj” nuk është veçse një alibi politike për të justifikuar etjen për pushtet dhe për të destabilizuar strukturat në një moment delikat për qytetin dhe për vendin.

Fieri nuk ka nevojë për përçarje, por për stabilitet, profesionalizëm dhe përgjegjësi. Çdo tentativë për ta kthyer administratën në pronë personale është një hap pas – dhe qytetarët e Fierit e meritojnë më shumë se kaq.